Satu John

2 Bala anak, aku nulis pasal semua tu ngagai kita ngambika kita enda ngereja dosa. Tang, enti siku ari bala kita ke ngereja dosa, kitai bisi siku penulung* ke lurus, iya nya Jesus Kristus, ke bisi enggau Apai. 2 Iya meh pemeri ke nutup dosa* kitai, ukai aja dosa kitai, tang mega dosa semua orang ba dunya. 3 Enti kitai terus ngasika pesan iya,* nya nunjukka kitai ngelala iya. 4 Enti orang madahka: “Aku ngelala iya,” tang enda ngasika pesan iya, orang nya bula, lalu pemendar nadai ba orang nya. 5 Tang orang ke ngasika jaku iya nunjukka diri amat-amat rinduka Petara. Baka nya meh chara kitai nemu diri beserakup enggau iya. 6 Orang ke madahka diri beserakup enggau iya mesti terus nitihka singkang iya.

7 Bala menyadi ti dikerindu, aku ukai nulis ngagai kita pasal pesan ti baru, tang pasal pesan ti lama ke udah diterima kita kenyau ari pun. Pesan ti lama tu jaku ke udah kala didinga kita. 8 Taja pia, pesan ke ditulis aku ngagai kita tu pesan ti baru ke dititihka Jesus sereta bala kita. Nya ketegal pemetang deka nadai agi, lalu penampak ti bendar udah manchar.

9 Enti orang madahka diri ba dalam penampak, tang begedika menyadi diri, orang nya agi ba dalam pemetang. 10 Orang ke rinduka menyadi diri mengkang ba dalam penampak, lalu nadai utai ba orang nya ke tau ngasuh iya* labuh ngagai dosa. 11 Tang, orang ke begedika menyadi diri agi ba dalam pemetang. Iya bejalai ba dalam pemetang, lalu enda nemu kini ke tunga diri laban pemetang nya udah ngasuh mata iya buta.

12 Bala anak, aku nulis ngagai kita laban dosa kita udah diampunka ketegal nama iya.* 13 Bala apai, aku nulis ngagai kita laban kita udah ngelala iya ke udah bisi kenyau ari pun. Bala kita ke biak, aku nulis ngagai kita laban kita udah ngalahka Sitan.* Bala anak mit, aku nulis ngagai kita laban kita udah ngelala Apai. 14 Bala apai, aku nulis ngagai kita laban kita udah ngelala iya ke udah bisi kenyau ari pun. Bala kita ke biak, aku nulis ngagai kita laban kita kering, jaku Petara seruran ba kita, lalu kita udah ngalahka Sitan.*

15 Anang rinduka dunya tauka utai ba dunya. Enti orang rinduka dunya, pengerindu Apai nadai ba iya. 16 Nya ketegal semua utai ba dunya, iya nya pengingin ti bedosa, pengingin mata, sereta pengingin deka ngeso* reta ke dikembuan diri, ukai datai ari Apai, tang ari dunya. 17 Kelimpah ari nya, dunya enggau pengingin iya deka nadai agi, tang orang ke ngereja peneka Petara deka meruan idup belama iya.

18 Bala anak, diatu meh maya ke penudi. Baka ke udah didinga kita, munsuh Kristus* deka datai. Indah diatu deh munsuh Kristus udah mayuh. Nya alai, kitai nemu, diatu meh maya ke penudi nya. 19 Sida udah ninggalka kitai laban sida ukai bala kitai. Enti sida bala kitai, sida tentu terus begulai enggau kitai. Tang sida ninggalka kitai. Nya alai, nya nunjukka ukai semua orang bala kitai. 20 Kita udah dipilih* Iya ti kudus, lalu semua kita bisi penemu. 21 Aku nulis ngagai kita ukai ketegal kita enda nemu pemendar, tang ketegal kita nemu pemendar sereta ketegal pemula enda datai ari pemendar.

22 Orang ke enda pechayaka Jesus nya Kristus, orang ke bula. Orang ke enda pechayaka Apai enggau Anak, nya bala munsuh Kristus.* 23 Orang ke enda pechayaka Anak, enda diterima Apai. Tang orang ke madahka diri pechayaka Anak, diterima Apai. 24 Utai ke udah didinga kita kenyau ari pun mesti seruran bisi ba kita. Enti utai ke udah didinga kita kenyau ari pun seruran bisi ba kita, kita deka seruran beserakup enggau Anak sereta enggau Apai. 25 Nambahka nya, Petara Empu* udah besemaya ngagai kitai pasal pengidup ti meruan belama iya.

26 Aku nulis semua tu ngagai kita laban sekeda orang nguji nesatka kita. 27 Ketegal kita udah dipilih* Petara nengah kuasa kudus* Iya, lalu kuasa kudus nya meruan bisi ba kita, nya alai, kita enda begunaka orang ngajar kita. Petara ngena kuasa kudus nya ngajar kita pasal semua utai, lalu nya endang amat, ukai bula. Nya alai, terus meh beserakup enggau iya baka ke udah diajar kuasa kudus. 28 Nya alai, bala anak, terus meh beserakup enggau iya ngambika kitai ulih bejaku enggau berani* lebuh iya dipandangka, lalu lebuh iya pulai baru,* kitai enda ngenyauhka diri ari iya ketegal kitai malu. 29 Enti kita nemu Jesus* nya lurus, kita mega nemu semua orang ke ngereja utai ti lurus nya anak Petara.