Satu Korint

12 Bala menyadi, aku deka kita nemu pasal mayuh macham pemeri ari Petara. 2 Kita nemu, sebedau kita arap,* kita ditesatka lalu nyembah engkeramba ti bisu. Kita nitihka nama-nama utai ke diasuh sida kereja kita. 3 Diatu, aku deka kita nemu, nadai siku pan orang ke diiring kuasa kudus Petara ulih madahka: “Awakka Jesus kena sumpah!” lalu semina orang ke diiring kuasa kudus ulih madahka: “Jesus nya Tuan!”

4 Bisi mayuh macham pemeri, tang semua nya diberi kuasa kudus ti sama. 5 Bisi mayuh macham chara kena ngereja utai ke orang bukai, tang semua nya digaga ke Tuan ti sama. 6 Bisi mayuh macham pengawa, tang semina bisi siku Petara ke ngasuh semua orang ulih ngereja semua pengawa nya. 7 Bantu ari kuasa kudus nyata dipeda ba tiap iku orang, lalu Petara meri nya ke penguntung semua orang. 8 Ketegal kuasa kudus Petara, sekeda orang pintar bejaku. Lalu ketegal kuasa kudus ti sama, sekeda orang ulih mansutka penemu. 9 Ketegal kuasa kudus nya mega, sekeda dibantu ngambika arap. Sekeda ke bukai bulih pemeri ngeraika orang ke sakit, 10 sekeda ulih ngaga kereja ajih, sekeda ulih benabi, sekeda ulih nentuka sekalika utai ke disebut nya datai ari Petara tauka enda, sekeda nya ulih bejaku ngena bansa jaku bukai, lalu sekeda agi ulih nyalin* bansa jaku bukai. 11 Semua pemeri nya digaga kuasa kudus ti sama, lalu diberi ngagai tiap iku orang nitihka peneka Petara.

12 Tubuh semina siti, tang bisi mayuh perengka. Taja pan perengka tubuh mayuh, tang tubuh semina siti aja. Pia mega enggau Kristus. 13 Semua kitai, enda ngira orang Judah tauka orang Gerika, ulun tauka orang ke bibas, dibaptisa ngena kuasa kudus ti sama, ngambika nyadi siti tubuh, lalu semua kitai udah nerima kuasa kudus ti sama.

14 Tubuh endang bisi mayuh perengka, ukai semina siti aja. 15 Kaki engka madahka, “Laban aku ukai jari, nya alai aku ukai sebagi ari tubuh.” Taja pia, kaki agi sebagi ari tubuh. 16 Pending engka madahka, “Laban aku ukai mata, nya alai aku ukai sebagi ari tubuh.” Taja pia, pending agi sebagi ari tubuh. 17 Enti sema semina mata aja ba serata tubuh, baka ni kitai ulih ninga? Enti sema semina pending aja ba serata tubuh, baka ni kitai ulih nyium bau utai? 18 Taja pia, tiap iti perengka tubuh udah diengkahka Petara ba endur perengka tubuh nya empu, baka ke dikedekaka Iya.

19 Enti semua nya perengka tubuh ti sama, nama penyadi ngagai tubuh deh? 20 Taja pia, kitai bisi mayuh macham perengka tubuh. Tang semina bisi siti aja tubuh. 21 Mata enda ulih madah ngagai jari, “Aku enda begunaka nuan,” tauka pala enda tau madah ngagai kaki, “Aku enda begunaka nuan.” 22 Kebendar nya, perengka tubuh ke baka ke lemi mega beguna. 23 Enti bisi begian tubuh ke dikumbai kitai enda manah gamal, kitai deka bebendar agi ngintu iya, ngambika begian tubuh ke enda manah gamal nya nyadi manah agi dipeda. 24 Tang kitai enda ibuh ngintu begian tubuh ke manah dipeda. Petara udah ngaga tubuh kitai baka nya, ngambika begian tubuh ke enda manah gamal deka nyadi manah agi dipeda. 25 Enggau nya, tubuh enda bepechah-belah, lalu tiap iti perengka tubuh deka ngintu pangan diri. 26 Enti siti perengka tubuh pedis, semua perengka tubuh ke bukai mega sama pedis enggau iya. Enti siti perengka tubuh dimuliaka, semua perengka tubuh ke bukai mega sama gaga ati enggau iya.

27 Semua kita nya tubuh Kristus, lalu tiap iku kita perengka tubuh nya. 28 Petara udah netapka bemacham pengawa ba raban gempuru. Keterubah, bala rasul. Kedua, bala nabi. Ketiga, bala pengajar. Udah nya, bisi orang ke ngaga kereja ajih. Bisi mega orang ke nerima pemeri ngeraika orang ke sakit, orang ke ngereja pengawa ke orang bukai, orang ke ngiring, enggau orang ke bejaku ngena bansa jaku bukai. 29 Kati semua sida rasul? Kati semua sida nabi? Kati semua sida pengajar? Kati semua sida ulih ngaga kereja ajih? 30 Kati semua sida nerima pemeri ngeraika orang ke sakit? Kati semua sida bejaku ngena bansa jaku bukai? Kati semua sida penyalin?* Enda. 31 Nya alai, terus meh bebendar ngulihka pemeri ti besai agi. Taja pia, aku deka nunjukka jalai ti jauh manah agi ngagai kita.