Satu John

4 Bala menyadi ti dikerindu, anang pechayaka tiap iti pesan ke baka ke datai ari Petara. Tang, peresa dulu pesan nya kena nemu sekalika iya datai ari Petara tauka enda, laban mayuh nabi pelesu udah bisi ba dunya tu.

2 Baka tu chara kita nemu sekalika pesan nya datai ari Petara tauka enda: Enti pesan nya ngaku Jesus Kristus datai nyadi mensia, pesan nya datai ari Petara. 3 Tang, enti pesan nya enda ngaku Jesus, pesan nya enda datai ari Petara, tang ari munsuh Kristus.* Kita udah ninga pasal pesan nya ke deka datai, lalu diatu deh pesan nya udah bisi ba dunya.

4 Bala anak, kita nitihka Petara lalu kita udah ngalahka bala nabi pelesu nya, laban Iya ke beserakup enggau kita besai agi ari iya ke beserakup enggau dunya. 5 Sida nitihka dunya. Nya kebuah utai ke disebut sida datai ari dunya, lalu dunya mendingka sida. 6 Tang kitai nitihka Petara. Barang sapa ke ngelala Petara, mendingka kitai. Barang sapa ke enda nitihka Petara, enda mendingka kitai. Baka nya meh chara kitai ulih nemu sekalika pesan nya amat tauka pelesu.

7 Bala menyadi ti dikerindu, aram meh kitai terus rinduka pangan diri laban pengerindu datai ari Petara. Tiap iku orang ke bisi pengerindu nya anak Petara, lalu sida ngelala Petara. 8 Barang sapa ke nadai pengerindu bedau agi ngelala Petara, laban Petara nya pengerindu. 9 Baka tu meh chara Petara mandangka pengerindu Iya ngagai kitai: Petara nganjung Anak tunggal Iya ke dunya ngambika kitai tau bulih pengidup nengah Anak Iya. 10 Tu meh reti pengerindu nya: Petara nganjung Anak Iya nyadika pemeri kena nutup dosa* kitai, ukai ketegal kitai udah rinduka Iya, tang ketegal Iya rinduka kitai.

11 Bala menyadi ti dikerindu, enti Petara rinduka kitai baka nya, kitai pan mesti rinduka pangan diri. 12 Nadai orang kala meda Petara. Enti kitai terus rinduka pangan diri, Petara agi seruran enggau kitai lalu kitai penuh laban pengerindu Iya. 13 Enggau tu, kitai nemu kitai agi beserakup enggau Iya, lalu Iya beserakup enggau kitai laban Iya udah meri kitai kuasa kudus Iya. 14 Nambahka nya, kami empu udah meda sereta meri saksi pasal Apai ke udah nganjung Anak Iya nyadi penyelamat dunya. 15 Barang sapa ke ngaku Jesus nya Anak Petara, Petara deka mengkang beserakup enggau iya, lalu iya deka mengkang beserakup enggau Petara. 16 Kitai udah nemu lalu pechaya, Petara rinduka kitai.

Petara nya pengerindu. Barang sapa ke seruran mandangka pengerindu, deka mengkang beserakup enggau Petara, lalu Petara deka mengkang beserakup enggau iya. 17 Baka nya meh chara kitai penuh laban pengerindu, ngambika kitai ulih bejaku enggau berani* maya hari pechara, laban ba dunya tu kitai mega baka Kristus. 18 Dalam pengerindu, nadai asai ati ti takut. Pengerindu ti sempurna, muai asai ati ti takut laban asai ati ti takut nagang kitai ari ngereja mayuh utai. Orang ke takut bedau agi penuh laban pengerindu. 19 Kitai ngayanka pengerindu laban Petara udah dulu rinduka kitai.

20 Enti orang madahka, “Aku rinduka Petara,” tang iya begedika menyadi diri, iya bula. Orang ke enda rinduka menyadi diri, ke ulih dipeda iya, enda ulih rinduka Petara, ke enda kala dipeda iya. 21 Kitai udah nerima pesan tu ari iya.* Orang ke rinduka Petara mega mesti rinduka menyadi diri.