Hebrew

13 Terus meh rinduka pangan diri baka diri menyadi. 2 Rindu meh ngelaluka orang.* Anang enda ingat ngereja nya, laban sekeda orang enda nemu diri udah ngelaluka melikat. 3 Ingatka sida ke dijil, lalu gambarka diri sama dijil enggau sida. Ingatka sida ke diperinsaka orang, laban kita empu pan sama mensia.* 4 Awakka tikah dipebasa semua orang, lalu anang ngamahka tikah nya, laban Petara deka ngakim orang ke ngereja ulah seks ti kamah* sereta orang ke butang.* 5 Awakka pengidup kita bibas ari pengerindu ke duit. Tang, puas ati meh enggau utai ke dikemisi diri, laban Petara udah madahka: “Aku enda sekali-kali ninggalka nuan, lalu Aku enda sekali-kali ngelengkaka nuan.” 6 Nyadi kitai amat berani madahka: “Jehovah nya penulung aku. Aku enda takut. Nama utai ke ulih digaga orang ngagai aku?”

7 Ingat meh ke sida ke ngiring bala kita ke udah nusui jaku Petara ngagai kita. Peratika meh utai manah ke datai ari ulah sida, lalu tunda meh pengarap sida.

8 Enda ngira kemari tauka seharitu, Jesus Kristus mengkang sama nyentuk ke belama iya.

9 Anang limpang ketegal bemacham ajar ti nyelai. Manah agi ati kitai nyadi kering ketegal pemanah ati ti besai, ari ke nyadi kering ketegal pemakai.* Orang ke kelalu ngumbai pemakai nya utai ti amat penting, nadai bulih penguntung ari nya.

10 Kitai bisi alta. Tang orang ke bejalaika pengawa ti tuchi ba Langkau Kain enda tau makai utai ke bisi ba alta nya. 11 Imam besai mai darah jelu ngagai Endur ti Kudus, ngambika dosa ulih diampunka. Tang bangkai jelu nya ditunu ba luar kawasan alai orang diau.* 12 Pia mega, Jesus merinsa ba luar pintu penama nengeri, ngambika iya ulih ngasuh orang nyadi tuchi ngena darah iya. 13 Nya alai, aram meh kitai mansang ngagai iya ba luar kawasan alai orang diau,* lalu ngenatka diri dikelese baka iya. 14 Nya ketegal ba ditu kitai nadai nengeri ke tetap, tang kitai enggau pengabis ati nganti nengeri ti deka datai. 15 Nengah iya, aram meh kitai seruran meri puji ngagai Petara. Nya meh pemeri kitai ngagai Petara nengah mulut kitai, lebuh kitai nusui nama Iya ba mua orang mayuh. 16 Nambahka nya, anang enda ingat ngereja utai ti manah lalu bekunsika utai ke dikemisi kita enggau orang bukai, laban Petara lantang ati enggau pemeri ke baka nya.

17 Sida ke ngiring bala kita seruran nyaga kita lalu sida betanggungjawap ngagai Petara. Nya alai, ngasi meh ke sida lalu sanggup nitihka iring* sida, ngambika sida ulih bejalaika pengawa sida enggau ati ti gaga, ukai enggau ati ti lembau. Enti enda, kita empu ke rugi.

18 Anang ngetu besampika kami laban kami pechaya kami bisi ati* ti lurus,* lalu kami deka ngereja semua utai enggau lurus. 19 Tang kelebih agi, aku bebendar minta kita besampi ngambika aku ulih jampat agi datai ngagai kita.

20 Ngarapka Petara pengelantang ke ngidupka ari mati pengibun bedus ti manah, iya nya Tuan kitai Jesus, ke bisi darah ti nanggam sempekat ke meruan belama iya, 21 nyediaka semua utai ti manah ke kita kena ngereja peneka Iya. Ngarapka Petara nengah Jesus Kristus, meransang kitai ngereja utai ti ngelantangka ati Iya. Ngarapka Petara dimuliaka belama iya. Amin.

22 Bala menyadi, diatu aku bebendar minta kita ngambika ninga jaku peransang tu enggau sabar, laban surat ke ditulis aku ke kita tu enda panjai. 23 Aku deka kita nemu, menyadi kitai Timoti udah dilepaska. Enti iya tumu datai, kami duai deka sama mupuk betemu enggau kita.

24 Kirumka meh salam aku ngagai semua sida ke ngiring bala kita sereta ngagai semua nembiak Petara ti kudus. Semua sida ke ba Italia ngirumka salam ngagai kita.

25 Ngarapka semua kita nerima pemanah ati Petara ti besai.