Hebrew

5 Tiap iku imam besai ke dipilih ari bala mensia udah dipilih ngambika gawa ke Petara ngarika mensia. Ketegal dosa, imam besai nya deka meri pemeri jelu* enggau semua pemeri ke bukai. 2 Siku imam besai ulih kasihka* orang ke kurang penemu sereta ke ngereja penyalah,* laban iya empu mega bisi pengelemi.* 3 Nya alai, ketegal dosa diri, iya patut meri pemeri baka iya ke meri pemeri ketegal orang bedosa.

4 Orang bulih basa nya ukai ketegal diri empu, tang iya bulih basa nya semina ketegal iya udah dipilih Petara, sama baka Petara ke milih Aron. 5 Pia mega, Kristus enda milih diri empu nyadi imam besai ngambika ngemuliaka diri empu. Tang iya dimuliaka Petara ke bejaku ngagai iya: “Nuan meh anak Aku; lalu seharitu Aku nyadi apai nuan.” 6 Ba ayat ke bukai, Iya mega bejaku, “Nuan meh ke nyadi imam belama iya, baka Melkisedek.”

7 Lebuh ba dunya Kristus bebendar besampi, lalu enggau nyawa ti inggar sereta enggau ai mata, iya minta ngagai Petara ke ulih nyelamatka iya ari pemati. Ketegal iya nangika Petara, Petara ningaka sampi iya. 8 Taja pan iya Anak Petara, tang pemerinsa ke ditapi iya ngajar iya ngambika ngasi. 9 Pengudah iya nyadi amat-amat layak, iya diberi tanggung pengawa mai pengelepas ti meruan ngagai semua orang ke ngasika iya 10 laban iya udah dipilih Petara nyadi imam besai baka Melkisedek.

11 Kami bisi mayuh utai ke deka disebut pasal iya. Tang kami tusah deka nerangka nya laban kita lubah meretika utai.* 12 Enti nitihka, diatu kita patut udah nyadi pengajar, tang kita agi begunaka orang ngajar kita ari pun pasal pekara asas ti bekaul enggau pesan ti kudus ari Petara. Kita nyau pulai baru baka orang ke begunaka ai tusu, ukai pemakai ti kering. 13 Barang sapa agi terus ngirup ai tusu, enda nemu jaku Petara ti lurus laban iya agi anak mit. 14 Tang, orang ke besai tuai begunaka pemakai ti kering. Nya ketegal sida suah berunding, nyentukka runding sida udah dilatih ngambika nemu bida entara utai ti betul enggau utai ti salah.