Hebrew

10 Adat semina ngambarka utai manah ke deka datai, tang ukai utai manah nya empu. Nya alai, Adat* nya enda ulih ngasuh orang ke nyembah Petara nyadi sempurna nengah pemeri* ti sama ke diserahka ninting taun. 2 Enti sema pemeri nya ulih ngasuh orang ke ngereja pengawa ti tuchi nyadi sempurna, tentu pemeri nya enda ibuh diserahka agi, laban pengudah sida nyadi tuchi sida enda agi berasai besalah. 3 Tang pemeri nya ngingatka sida pasal dosa sida ninting taun. 4 Nya ketegal darah sapi lelaki enggau darah kambin enda ulih muai dosa.

5 Nya alai, lebuh Kristus datai ke dunya, iya madahka: “‘Nuan enda agi begunaka pemeri jelu* enggau pemeri ke bukai. Tang Nuan nyediaka tubuh ke aku. 6 Nuan enda agi rinduka pemeri tunu enggau pemeri kena nebus dosa.’ 7 Udah nya, aku bejaku: ‘O Petara, aku datai deka ngereja peneka Nuan (baka ke udah ditulis ba gulung surat* pasal aku).’” 8 Sebedau tu, iya madahka: “Nuan enda agi begunaka sereta enda agi rinduka pemeri jelu,* pemeri tunu, pemeri kena nebus dosa, enggau pemeri ke bukai.” Semua pemeri nya diserahka nitihka Adat. 9 Udah nya, iya madahka: “Aku datai deka ngereja peneka Nuan.” Nya kebuah iya muai atur ti keterubah ngambika iya ulih netapka atur ti kedua. 10 Nengah “peneka” tu, kitai udah digaga nyadi tuchi nengah tubuh Jesus Kristus ke diserahka sekali aja ke belama iya.

11 Pia mega, ninting hari, tiap iku imam besedia ba endur sida bejalaika pengawa ti tuchi lalu nyerahka pemeri* ti sama bekali-kali. Taja pia, pemeri nya enda ulih muai dosa enggau pengabis iya. 12 Tang, Kristus nyerahka siti pemeri kena nebus dosa belama iya lalu iya duduk ba sepiak kanan Petara. 13 Kenyau ari nya, iya nganti nyentuk ke maya bala munsuh iya nyadi pelasar kaki iya. 14 Nengah siti pemeri ke diserahka, iya ngasuh orang ke dikuduska nyadi sempurna belama iya. 15 Nambahka nya, kuasa kudus mega udah ngasuh kitai andalka tu. Kuasa kudus madahka: 16 “‘Tu meh sempekat ke deka digaga Aku enggau sida pengudah maya nya,’ ku Jehovah. ‘Aku deka ngengkahka adat Aku ba ati sida lalu nulis iya dalam runding sida.’” 17 Udah nya, kuasa kudus madahka: “Aku enda agi ingatka dosa enggau pengawa sida ti jai.” 18 Enti semua nya udah diampunka, pemeri kena nebus dosa enda ibuh diserahka agi.

19 Nya alai, bala menyadi, nengah darah Jesus kitai berani* nengah jalai penama nuju ngagai endur ti kudus. 20 Iya muka jalai nya ke kitai nyadi jalai ti baru ke nuju ngagai pengidup nengah tirai nya, iya nya tubuh iya empu. 21 Kitai mega bisi siku imam ti bemulia ke ngemataka nembiak Petara. 22 Nya alai, aram meh kitai datai ngagai Petara enggau pengabis ati sereta enggau pengarap ti amat tegap, laban ati kitai udah nyadi beresi sereta ati* kitai udah nyadi manah, lalu tubuh kitai udah diberi mandi ngena ai ti beresi. 23 Aram meh kitai terus nusui ngagai orang mayuh pasal utai ke dianti kitai enggau andal lalu enda kakang ati lebuh ngereja nya, laban Iya ke udah besemaya nya tetap ati. 24 Aram meh kitai beratika* pangan diri kena meransang pangan diri ngayanka pengerindu sereta ngereja utai ti manah. 25 Anang meh ngelengkaka pengawa begempuru kitai baka ke biasa digaga sekeda orang. Tang, peransang pangan diri lalu majak agi ngereja nya, kelebih agi lebuh kita meda hari nya nyau semak.

26 Enti kitai sengaja ngereja pengawa ti bedosa pengudah kitai bulih penemu ti betul pasal pemendar, nadai agi pemeri ke ulih diserahka kitai kena nebus dosa kitai. 27 Tang kitai deka berasai takut nganti diri diakim sereta nganti pengeringat Petara ti mau baka api ke deka ngemunaska orang ke ngelaban Iya. 28 Enti nitihka dua tauka tiga iku saksi, barang sapa ke enda bedulika Adat Moses deka dibunuh, lalu nadai sapa-sapa ke deka kasihka iya. 29 Baka ni enggau orang ke udah ngindik Anak Petara? Baka ni enggau orang ke ngumbai darah ti nanggam sempekat Petara ke nguduska Anak Petara nya enda berega? Baka ni enggau orang ke ngeleseka kuasa kudus ke mandangka pemanah ati Petara ti besai? Ba runding kita, ni pemalat ukum ke patut diterima sida? 30 Kitai nemu Petara meh ke bejaku: “Aku ke deka malas, lalu Aku deka ngukum.” Bup Kudus mega madahka: “Jehovah deka ngakim nembiak Iya.” 31 Endaka nya balat ngenakutka enti kitai nerima ukum ari jari Petara ti idup?

32 Anang enda ingatka baka ni gaya kita dulu menya. Pengudah penampak Petara manchar ngagai kita, kita tan ngenatka diri napi mayuh penanggul sereta pemerinsa. 33 Kekadang orang bejaika kita, lalu kita merinsa ba mua orang mayuh.* Kekadang kita sama merinsa enggau* sida ke napi utai nya. 34 Kita besimpati ngagai* sida ke dijil, lalu kita mengkang gaga ati lebuh reta kita dirampas orang, laban kita nemu kita bisi reta ke manah agi sereta ke tan belama iya.

35 Nya alai, anang muai pemerani* kita laban nya deka mai upah ti chukup besai. 36 Kita patut tan ngambika pengudah kita ngereja peneka Petara, kita ulih nerima utai ti udah disemayaka, 37 laban “enda lama da agi,” “iya* ke deka datai nya, sigi datai, lalu iya enda laun datai.” 38 “Ulun Aku ke lurus deka idup ketegal iya arap.” Tang “enti iya surut ketegal iya takut, Aku enda lantang ati ngagai iya.” 39 Orang ke surut ketegal takut deka dipunaska. Tang kitai ukai orang ke baka nya laban kitai orang ke arap, lalu kitai deka mengkang idup.