Epesus

4 Nya alai, aku ke dijil ketegal aku enggi Tuan, minta ngagai kita: Laban kita udah dikangau Petara, nya alai aku minta kita idup sejalai enggau kangau nya, 2 seruran baruh ati, nelap, sabar, liat ati enggau pangan diri ketegal pengerindu, 3 sereta enggau naka ulih bebendar idup bebaik enggau pangan diri, kena nyaga penyerakup ke diberi kuasa kudus Petara. 4 Semina bisi siti tubuh, lalu semina bisi siti kuasa kudus. Kita mega nganti deka nerima siti upah, laban Petara udah ngangauka kita. 5 Pia mega, semina bisi siku Tuan, siti ajar ke dikearapka kitai, siti baptisa, 6 sereta siku Petara ke nyadi Apai ke semua orang. Iya bekuasa agi ari semua orang, ngereja utai nengah semua kitai, lalu kuasa Iya ulih bekereja dalam semua chara.

7 Tiap iku kitai diberi pemanah ati Petara ti besai. Tu ulih dipeda ari chara Kristus magi pemeri ti pechuma nya ke diungkupka ngagai kitai. 8 Baka ke udah ditulis ba Bup Kudus: “Lebuh iya niki ngagai endur ti tinggi, iya nabanka orang tangkap, lalu meri sida nyadika pemeri.” 9 Nama reti rambai jaku “iya niki”? Endaka nya mega nunjukka iya kala nurun ngagai endur ti baruh, iya nya dunya? 10 Iya ke nurun nya meh ke niki ngagai endur ti jauh tinggi agi ari semua langit, ngambika iya ulih ngamatka semua utai.

11 Iya meri sekeda orang nyadi rasul, sekeda nyadi nabi, sekeda nyadi penginjil,* lalu sekeda nyadi pengibun bedus enggau pengajar, 12 kena ngemetulka* nembiak Petara ti kudus, ngereja pengawa ba raban gempuru, sereta negapka tubuh Kristus, 13 nyentukka semua kitai beserakup ba utai ti dikearapka kitai sereta ba penemu ti betul pasal Anak Petara. Enggau nya, kitai ulih nyadi orang ke besai tuai, nyentukka runding enggau ulah kitai amat baka orang ke besai tuai, baka Kristus. 14 Nya alai, kitai enda patut agi nyadi baka anak mit ke ditabanka umbak sereta dikebuka ribut kin kia ketegal bemacham ajar ti pelesu ke datai ari mensia ti pintar nipu. 15 Kitai patut nyebut utai ti amat, ngayanka pengerindu, lalu mansang ba semua pekara, ngambika nyadi baka kepala kitai, Kristus. 16 Nengah iya, semua perengka tubuh bejantil manah enggau pangan diri, lalu bekerejasama meri utai ke diguna tubuh. Lebuh tiap iti perengka bejalaika pengawa enggau manah, tubuh ulih mansang besai ngambika tubuh nya tegap dalam pengerindu.

17 Nya alai, dalam nama Tuan, aku bejaku lalu nangkan kita ngambika badu agi idup nitihka orang ba dunya tu, ke idup nitihka runding ti nadai guna.* 18 Runding sida petang, lalu sida diseraraka ari pengidup ke datai ari Petara, laban sida enggai ngelala Petara, lalu ati sida enda ulih ngasaika nama-nama utai.* 19 Sida nyau enda bedulika ni bagi utai ti manah tauka jai, lalu sida enda malu ngereja utai ti jai.* Sida enda nemu puas ngereja semua macham pengawa ti kamah.

20 Tang kita udah belajar, Kristus ukai baka nya, 21 enti kita udah ninga enggau manah pemendar ke diajar Jesus ngagai kita. 22 Kita diajar ngambika muai pendiau* kita ti lama, iya nya jalai pengidup kita ke suba, laban pendiau nya benung dirusakka pengingin ti ngasuh kita limpang. 23 Kita patut terus ngubah chara kita berunding* nyadi baru, 24 lalu ngerasukka pendiau* ti baru ke digaga nitihka peneka Petara, ke sejalai enggau pengelurus sereta penaluk ti bendar.

25 Nya alai, laban diatu kita udah muai semua pemula, tiap iku kita patut nyebut utai ti amat ngagai pangan diri, laban kitai semua bepanggai ba pangan diri. 26 Enti kita ringat, anang bedosa. Anang majak ringat nyentuk ngagai mata panas padam. 27 Anang meri peluang* ngagai Sitan.* 28 Orang ke ngenchuri patut badu ngenchuri. Iya patut bagas gawa sereta ngereja utai ti manah ngena jari iya, ngambika iya ulih bekunsika utai enggau orang ke suntuk. 29 Anang nejuka jaku ti jai* pansut ari mulut kita, tang sebut utai ti manah kena ngeringka orang lebuh orang begunaka nya, ngambika orang ke ninga tau bulih penguntung. 30 Kelimpah ari nya, anang ngenusahka ati* kuasa kudus Petara, ke udah nanda* kita ngambika kita dilepaska ngena tebus ba hari pengelepas.

31 Buai semua macham dendam, ati ti pedis, sereta ati ti ngeransi. Anang merak pangan diri. Buai mega jaku ti kasar sereta semua utai ti ngasuh pedis. 32 Tang kita patut manah ati sereta siru enggau pangan diri. Ampunka pangan diri ari ati, baka Petara ke mega ngampunka kita ari ati nengah Kristus.