Nehemiah

1 Tu jaku Nehemiah* anak Hakaliah: Kena bulan Kislew,* ba taun ke-20, aku bisi ba istana* ba Sushan.* 2 Maya nya, siku ari menyadi aku ke benama Hanani datai ari Judah enggau beberapa iku orang. Aku pan nanya sida pasal Jerusalem. Aku mega nanya pasal orang Judah ke udah dilepaska, iya nya sida ke udah pulai ngagai menua nya. 3 Ku sida nyaut: “Pengidup orang Judah* ke diau ba wilayah nya amat teruk, lalu sida berasai amat malu. Dinding kuta Jerusalem udah runtuh, lalu pintu kuta nya udah angus.”

4 Pengudah ninga nya, aku duduk lalu nyabak. Aku balat tusah ati pengelama beberapa hari. Aku enda ngetu bepuasa sereta besampi ngagai Petara ke merintah serega. 5 Ku aku besampi: “O Jehovah, Petara ke merintah serega, Nuan meh Petara ti bekuasa ke patut dipebasa sereta dikenangi, lalu Nuan ngamatka sempekat Nuan. Nuan mega ngayanka pengerindu ti setia ngagai orang ke rinduka Nuan sereta ngasika pesan Nuan. 6 Peda meh aku lalu dingaka sampi aku seharitu. Siang malam aku besampi pasal bala nembiak Nuan, orang Israel, lalu ngaku dosa ke udah dikereja sida ngagai Nuan. Aku enggau ruang bilik apai aku udah bedosa ngagai Nuan. 7 Kami udah ngereja utai ti jai lalu ngasuh Nuan ringat, laban kami enda nitihka pesan, adat, enggau atur ke diberi Nuan nengah nembiak Nuan, Moses.

8 “Ingat meh utai* ke dipadahka Nuan ngagai nembiak Nuan, Moses: ‘Enti kita enda setia, Aku deka ngachirka kita ba entara bansa-bansa bukai. 9 Tang, enti kita pulai baru ngagai Aku lalu ngasi sereta nitihka pesan Aku, Aku deka ngempuruka kita taja pan kita ngachir nyentukka ujung dunya. Aku deka mai kita ngagai endur ke dipilih Aku. Nya meh endur ke dipilih kena ngemuliaka nama Aku.’ 10 Sida iya bala nembiak Nuan enggau bala penyembah Nuan ke udah diselamatka* Nuan ngena kuasa Nuan ti besai enggau jari Nuan ti kering. 11 O Jehovah, dingaka meh sampi aku. Dingaka meh sampi bala nembiak Nuan ke deka bebasaka nama Nuan. Berekatka meh nembiak Nuan tu, lalu awakka raja kasihka aku.”

Maya nya, aku ketuai ke nyaga ai irup raja.