Daniel

6 Darius mutuska deka ngelantik 120 iku pemerintah wilayah ba serata perintah iya. 2 Raja mega ngelantik tiga iku pegawai tinggi kena ngemataka bala pemerintah wilayah. Siku ari pegawai tinggi nya Daniel. Bala pemerintah wilayah deka meri riput ngagai sida kena nentuka raja enda rugi. 3 Daniel landik agi gawa ari semua pegawai tinggi enggau bala pemerintah wilayah ke bukai, laban iya bisi pemandai ti luar biasa. Nya alai, raja deka nikika pangkat Daniel ngambika Daniel bekuasa atas serata perintah iya.

4 Udah nya, bala pegawai tinggi ke bukai sereta bala pemerintah wilayah nguji deka ngiga penyalah Daniel lebuh iya bejalaika pengawa perintah. Tang, sida nadai tetemuka penyalah iya tauka nama-nama utai ti enda lurus ba iya. Nya ketegal Daniel tau dikearapka, lalu iya ngereja utai enggau betul sereta lurus. 5 Ku sida madahka: “Kitai enda ulih ngiga penyalah Daniel kena nuduh iya, tang kitai ulih ngena adat Petara iya kena ngasuh iya enda ngasika raja.”

6 Nya alai, bala pegawai tinggi enggau bala pemerintah wilayah betemu enggau raja. Ku sida madah ngagai raja: “O Raja Darius, awakka nuan idup belama iya. 7 Semua pegawai diraja, bala penulung pemerintah wilayah, bala pemerintah wilayah, bala pegawai tinggi diraja, enggau bala gabenor udah berandau kena netapka siti atur diraja. Nitihka atur tu, pengelama 30 hari, orang enda tau minta nama-nama utai ari petara tauka mensia. Sida semina tau minta utai ngagai tuan raja. Tang, enti bisi orang ngelanggar atur tu, orang nya deka dibuai ngagai lubang singa. 8 Nyadi, kami minta tuan raja ngesahka sereta nyain atur tu ngambika atur tu enda ulih diubah, laban adat orang Media enggau orang Persia enda ulih dikinsil.”

9 Raja Darius pan nyain atur nya.

10 Pengudah Daniel nemu atur nya udah disain, iya pan pulai ke rumah lalu niki ngagai bilik ke ba tingkat atas. Bilik nya bisi jenila ke udah dibuka, lalu jenila nya nunga ke Jerusalem. Baka selama, iya besugang lalu besampi sereta muji Petara. Iya ngereja nya enggau tetap, tiga kali sehari. 11 Maya nya, sida terus tama ngagai rumah Daniel lalu meda Daniel benung besampi sereta minta tulung ngagai Petara iya.

12 Nya alai, sida betemu enggau raja lalu ngingatka iya pasal atur nya: “Endaka tuan raja udah nyain atur ke nagang orang minta nama-nama utai ari petara tauka mensia pengelama 30 hari? Sida semina tau minta utai ngagai tuan raja. Tang, enti bisi orang ngelanggar atur nya, orang nya deka dibuai ngagai lubang singa, enda pia?” Ku raja nyaut: “Sigi amat. Atur nya udah ditetapka nitihka adat orang Media enggau orang Persia, ke enda ulih dikinsil.” 13 Sida terus madah ngagai raja: “Daniel, ke ditangkap ari Judah, enda bebasaka tuan raja. Iya enda pedulika atur ke udah disain tuan raja. Iya besampi tiga kali sehari.” 14 Pengudah raja ninga nya, iya balat amat tusah ati. Iya nguji berundingka chara iya ulih nyelamatka Daniel. Iya majak berunding pasal nya nyentukka mata panas padam. 15 Udah nya, mayuh bala sida datai betemu enggau raja lalu madahka: “Tuan raja, ingat meh, nitihka adat orang Media enggau orang Persia, atur ke udah ditetapka raja enda ulih diubah.”

16 Nyadi, raja ngasuh orang nangkap Daniel lalu muai iya ngagai lubang singa. Nya alai, Daniel pan dibuai ngagai lubang singa. Raja madah ngagai Daniel: “Petara ke seruran disembah nuan deka nyelamatka nuan.” 17 Udah nya, lubang singa* nya ditutup ngena sigi batu. Raja ngechop batu nya ngena tinchin* iya sereta ngena tinchin bala orang ke tinggi pangkat. Nya alai, pemutus ke udah digaga nya enda ulih diubah agi.

18 Raja lalu pulai ngagai istana iya. Iya bepuasa lalu enggai diperindang.* Semalam-malam nya, iya enda ulih tinduk. 19 Maya tumu pagi, raja angkat lalu berumban ngagai lubang singa. 20 Lebuh raja datai semak ngagai lubang singa, iya ngangauka Daniel enggau ati ti tusah. Ku iya nanya Daniel: “Daniel, nembiak Petara ti idup! Kati Petara ke seruran disembah nuan ulih nyelamatka nuan ari bala singa?” 21 Daniel pan terus nyaut raja: “O tuan raja, awakka nuan idup belama iya. 22 Petara aku udah nganjung melikat Iya ngambika nutup mulut bala singa. Singa nya nadai ngemediska aku, laban Petara aku nemu aku sigi nadai penyalah, lalu aku mega nadai ngereja utai ti salah ngagai nuan, tuan raja.”

23 Raja balat amat gaga ati! Iya lalu ngasuh orang narit Daniel pansut ari lubang nya. Lebuh orang narit iya pansut, mimit pan iya enda bakal laban iya arapka Petara iya.

24 Raja lalu ngasuh orang mai orang ke nuduh* Daniel ngagai iya. Udah nya, sida dibuai ngagai lubang singa, sama enggau bala bini sereta bala anak sida. Sebedau sida terengkah ba baruh, bala singa udah dulu nerekam sida lalu ngeredakka semua tulang sida.

25 Udah nya, Raja Darius nulis surat ngagai orang ke datai ari semua menua, bansa, enggau jaku, ke diau ba serata dunya: “Awakka semua kita idup lantang! 26 Aku netapka siti pesan ngagai semua orang ba tiap iti wilayah ba perintah aku. Kita mesti takut sereta bebasaka Petara ke disembah Daniel. Iya meh Petara ti idup sereta meruan belama iya. Perintah Iya enda ulih dianchurka, lalu kuasa Iya merintah meruan belama iya. 27 Iya nyelamatka sereta ngelepaska bala nembiak Iya. Iya nunjukka tanda sereta ngereja pengawa ti ngalitka ati ba langit enggau ba dunya. Iya udah nyelamatka Daniel ari diterekam* singa.”

28 Daniel idup lantang senang ba baruh perintah Darius enggau perintah raja Persia ke benama Sairus.