Hebrew

11 Arap reti iya kitai enda kakang, tang pechaya utai ke dianti kitai deka nyadi. Arap reti iya kitai andal utai ke dipechayaka kitai sigi amat, taja pan iya enda ulih dipeda. 2 Ketegal orang kelia menya* arap, Petara nunjukka Diri lantang ati enggau sida.*

3 Ketegal arap, kitai meretika semua utai ba dunya raya* diatur nitihka jaku Petara. Enggau nya, utai ke dipeda tau bisi ketegal iya datai ari utai ke enda ulih dipeda.

4 Ketegal arap, Abel nyerahka pemeri* iya ngagai Petara, lalu pemeri* nya berega agi ari pemeri ke diserahka Kain. Ketegal iya arap meh Petara* nunjukka iya lurus, laban Petara nerima pemeri* iya. Taja pan iya udah mati, iya agi bejaku laban iya arap.

5 Ketegal arap, Enok dipindahka ngambika iya enda merinsa lebuh iya mati. Enok enda ulih ditemu ba dini-dini endur laban Petara udah mindahka iya. Sebedau Enok dipindahka, Petara* nunjukka iya udah ngelantangka ati Petara. 6 Nambahka nya, orang enda ulih ngelantangka ati Petara enti iya enda arap, laban barang sapa ke datai ngagai Petara mesti pechaya Iya endang sigi bisi lalu Iya meri upah ngagai orang ke bebendar ngiga Iya.

7 Ketegal arap, pengudah Noah bulih jaku tangkan ari Petara pasal utai ke bedau agi ulih dipeda, iya nunjukka diri nangika Petara lalu ngaga bandung* kena nyelamatka sida sebilik. Ketegal Noah arap meh iya nunjukka dunya tu patut dipunaska, lalu iya dikumbai lurus ketegal iya arap.

8 Ketegal arap, Abraham ngasi lebuh iya dikangau ngagai endur ke deka diterima iya nyadika pesaka. Iya mupuk taja pan iya enda nemu dini endur ke deka dituju iya. 9 Ketegal arap, Abraham diau ba menua ke disemayaka nyadi orang asing. Iya diau ba langkau kain enggau Isak sereta Jakop, ke mega nerima semaya ke sama enggau iya. 10 Tu ketegal Abraham nganti nengeri ke bisi pugu ti tegap. Petara meh ke ngaga pelan sereta nirika nengeri nya.

11 Ketegal arap, Sarah ulih ngandung taja pan iya udah ngelui umur alai beranak. Nya ketegal Sarah ngumbai Iya ke udah besemaya nya tetap ati.* 12 Nya alai, ari siku lelaki ke udah kelalu tuai,* mayuh anak ulih diadaka lalu penyampau sida ngemayuh bintang ba langit sereta baka pasir ke enda alah diitung ba tebing tasik.

13 Semua orang nya mengkang arap nyentukka mati, taja pan utai ke udah disemayaka bedau nyadi ba jeman sida. Ari jauh sida meda semaya nya, lalu nerima iya enggau gaga ati. Ba mua orang mayuh, sida madahka diri orang asing lalu diau ba endur nya enda lama. 14 Orang ke bejaku munyi nya nunjukka enggau terang, sida benung bebendar ngiga endur ke deka nyadi alai sida diau. 15 Enti sida majak berundingka endur ke udah ditinggalka sida, kebendar iya, sida bisi peluang pulai kin baru. 16 Tang sida bebendar deka ngulihka endur ke manah agi, iya nya endur ke datai ari serega. Nya alai, Petara enda malu dikumbai Petara sida, lalu Iya udah nyediaka siti nengeri ke sida.

17 Ketegal arap, lebuh Abraham diuji, iya baka ke udah nyerahka Isak. Abraham ke udah nerima semaya Petara enggau gaga ati, besedia deka nyerahka anak tunggal iya, 18 taja pan Petara udah madah ngagai iya: “Peturun nuan deka datai ari Isak.” 19 Tang Abraham pechaya, Petara ulih ngidupka Isak baru ari mati. Sema ku jaku, tu ngambarka iya udah nerima Isak pulai baru ari pemati.

20 Ketegal arap, Isak merekatka Jakop enggau Esau, lalu madah ngagai seduai iya pasal utai ke deka nyadi dudi hari.

21 Ketegal arap, lebuh Jakop nyauka mati, iya merekatka bala anak Josep lalu besugang nyembah Petara lebuh bepegai ba ujung tungkat iya.

22 Ketegal arap, lebuh Josep nyauka mati, iya madahka pasal orang Israel deka pansut ari Ejip. Iya mega madahka pesan ngambika tulang iya dibai pansut ari menua nya.*

23 Ketegal arap, apai indai Moses ngelalaika Moses pengelama tiga bulan pengudah iya ada. Seduai iya meda anak nya manah gamal, lalu seduai iya enda takutka pesan raja. 24 Ketegal arap, pengudah Moses besai, iya enggai dikumbai uchu raja Ejip.* 25 Iya milih deka diperinsa sama enggau nembiak Petara, ari ke ngelantangka diri enggau pengidup ti bedosa enda lama. 26 Nya ketegal iya sanggup dikelese nyadi Orang ke Dipilih,* lalu iya ngumbai nya jauh berega agi ari semua reta ba Ejip, laban iya bebendar beratika upah ke deka diterima iya. 27 Ketegal arap, Moses enda takutka pengeringat raja lalu mupuk ari Ejip. Iya terus sabar natka pemerinsa laban iya baka ke benung meda Petara ke enda ulih dipeda. 28 Ketegal arap, iya ngintu Pengerami Paska lalu mechikka darah ngambika melikat Petara enda munuh anak lelaki tuai orang Israel.

29 Ketegal arap, sida meraka Tasik Mirah baka ke bejalai ba tanah ti rangkai. Tang, lebuh orang Ejip nguji meraka tasik nya, tasik nya lalu nelan sida.

30 Ketegal arap, orang Israel bejalai ngelingi dinding kuta Jeriko pengelama tujuh hari, lalu udah nya, dinding kuta nya runtuh. 31 Ketegal arap, indu sundal ke benama Rahap enda mati begulai enggau orang ke enda ngasi, laban iya nerima penatai pengintip orang Israel enggau manah ati.

32 Nama agi utai ke deka dipadahka aku? Aku nadai chukup awak enti aku becherita pasal Gideon, Barak, Samson, Jeptah, David, Samuel, enggau bala nabi ke bukai. 33 Ketegal arap, sida ngalahka bala perintah, ngereja utai ti lurus, bulih utai ke disemayaka, nutup mulut singa, 34 enda diempa api ti mau, selamat ari dibunuh ngena pedang, nyadi kering taja pan sida lemi, berani lebuh beperang, sereta ngalahka munsuh ke datai nyerang sida. 35 Bala sida ke indu nerima orang ke dikesayauka sida ke diidupka baru ari mati. Sekeda orang sanggup diperinsa ari ke ngelengkaka pengarap diri ketegal deka dilepaska. Tu ketegal sida deka ngulihka pengangkat ari mati ke manah agi. 36 Sida ke bukai diuji lebuh dikeduan sereta disipat, indah dirantai sereta dijil. 37 Bisi ke napi penguji, dituku ngena batu, disayat belah dua ngena penyayat, sereta dibunuh ngena pedang. Sida bejalai kin kia ngena gari ke digaga ari kulit bedus enggau kulit kambin. Sida suntuk utai enggau idup merinsa, lalu orang jai enggau sida. 38 Dunya tu enda layak bisi orang baka sida. Sida diau ba padang pasir, ba bukit, dalam gua, sereta ba lubang tanah.

39 Petara nunjukka sida diterima Iya* ketegal sida arap. Taja pia, sida enda nerima utai ke disemayaka. 40 Nya ketegal kenyau ari suba, Petara endang udah berunding deka meri kitai utai ti manah agi, lalu sida enda ulih nyadi sempurna enti nadai kitai.