2 Samuel

7 Raja David udah diau ba istana iya. Jehovah ngasuh iya diau likun, lalu iya enda dikachau semua munsuh ke ngelingi iya. 2 Raja nya lalu madah ngagai Nabi Natan: “Aku diau ba istana* ke digaga ari kayu sidar. Tang, peti lampang batu Adat Petara ti bendar diengkahka ba dalam langkau kain.” 3 Ku Natan madah ngagai raja: “Gaga meh nama-nama utai ke dikedekaka ati nuan, laban Jehovah bisi enggau nuan.”

4 Tang malam nya, Jehovah madah ngagai Natan: 5 “Padahka tu ngagai nembiak Aku, David: ‘Tu utai ke dipadahka Jehovah: “Nuan ka ngaga rumah alai Aku diau, pia? 6 Kenyau ari maya Aku mai orang Israel pansut ari Ejip sampai ke seharitu, Aku nadai kala diau ba rumah. Aku selalu mindah kin kia, lalu diau ba langkau kain. 7 Sekumbang Aku bisi enggau orang Israel, kala Aku nanya bala tuai orang Israel, ke dilantik Aku ngiring orang Israel, munyi tu: ‘Nama kebuah kita enda ngaga ke Aku rumah ari kayu sidar?’”’ 8 Padah ngagai nembiak Aku, David: ‘Tu meh utai ke dipadahka Jehovah, ketuai soldadu serega: “Nuan nyaga jelu tupi ba padang rumput, tang Aku udah ngambi nuan lalu ngasuh nuan ngiring nembiak Aku, Israel. 9 Enda ngira kini ke penunga nuan, Aku deka enggau nuan. Ba depan nuan, Aku deka ngemunaska semua munsuh nuan. Aku deka ngasuh nama nuan ditemu orang, baka nama orang ke tebilang ba dunya tu. 10 Aku deka milih endur ke nembiak Aku, Israel, lalu ngasuh sida diau ba dia. Sida deka diau ba dia, lalu nadai utai deka ngachau sida. Orang jai nadai agi merinsaka sida baka suba. 11 Kenyau ari maya Aku ngelantik bala hakim ke nembiak Aku, Israel, sida udah balat merinsa. Tang, Aku deka nentuka nuan diau likun, lalu semua munsuh nuan enda ngachau nuan agi.

“‘“Jehovah mega madahka, Jehovah deka ngaga ruang bilik nuan nyadi peturun raja.* 12 Lebuh nuan udah nadai,* Aku deka ngelantik peturun nuan nyadi raja. Aku deka ngelantik anak nuan, lalu Aku deka negapka perintah iya. 13 Iya meh ke deka ngaga rumah kena ngemuliaka nama Aku, lalu Aku deka negapka kerusi diraja iya belama iya. 14 Aku deka nyadi apai iya, lalu iya deka nyadi anak Aku. Enti iya ngereja utai ti salah, Aku deka ngemetulka iya ngena tungkat mensia. Aku deka nyipat iya baka mensia ke nyipat anak diri. 15 Aku deka mengkang ngayanka pengerindu ti setia ngagai iya, taja pan Aku kala ngetu ngayanka pengerindu ti setia ngagai Saul, ke udah dibuai Aku ngambika nuan ulih nganti iya. 16 Perintah nuan enggau bala peturun nuan deka terus merintah belama iya. Kerusi diraja nuan deka tegap belama iya.”’”

17 Natan madah ngagai David semua utai nya enggau utai ke dipandangka Petara dalam runding Natan.

18 Udah nya, Raja David tama lalu duduk ba depan Jehovah. Ku iya madah: “O Jehovah, Tuan ti Pemadu Tinggi, sapa meh aku tu? Lalu sapa meh ruang bilik aku nyentukka Nuan manah amat enggau kami? 19 O Jehovah, Tuan ti Pemadu Tinggi, Nuan indah deka ngereja mayuh agi ari semua utai nya, laban Nuan madah peturun aku deka bisi nyentukka jemah ila. O Jehovah, Tuan ti Pemadu Tinggi, Nuan udah madahka pesan* tu ngagai semua mensia. 20 Nama agi utai ke ulih dipadahka aku ngagai Nuan? O Jehovah, Tuan ti Pemadu Tinggi, semua utai pasal aku ditemu Nuan magang. 21 Nuan udah ngereja semua utai ti manah tu ketegal jaku Nuan sereta ketegal utai ti sejalai enggau peneka* Nuan, lalu Nuan udah mandangka semua utai nya ngagai nembiak Nuan tu. 22 Nya meh kebuah Nuan amat mulia. O Jehovah, Tuan ti Pemadu Tinggi, semua utai ke udah didinga kami nunjukka semina Nuan aja meh Petara ti bendar. Nadai Petara bukai kelimpah ari Nuan. Nadai ke baka Nuan. 23 Ba serata dunya tu, nadai bansa bukai ke baka nembiak Nuan, Israel. Nuan nebus sida ngambika sida nyadi nembiak Nuan. Nuan ngasuh nama Nuan ditemu orang lebuh Nuan ngereja pengawa ti besai sereta pengawa ti ngalitka ati ke sida. Nuan muru bansa bukai enggau petara sida ngarika nembiak Nuan, ke ditebus Nuan ari Ejip. 24 Nuan udah ngaga orang Israel nyadika nembiak Nuan belama iya. O Jehovah, Nuan udah nyadi Petara sida.

25 “O Petara Jehovah, kereja meh utai ke udah disemayaka Nuan ngagai aku enggau bala peturun aku belama iya. Awakka Nuan ngamatka utai ke udah disemayaka Nuan. 26 Awakka nama Nuan dimuliaka belama iya, ngambika orang bejaku munyi tu: ‘Jehovah, ketuai soldadu serega nya Petara orang Israel.’ Awakka peturun nembiak Nuan tu mengkang tegap ba depan Nuan. 27 O Jehovah, ketuai soldadu serega enggau Petara orang Israel, Nuan udah mandangka ngagai nembiak Nuan tu, Nuan deka ngaga ruang bilik aku nyadi peturun raja. Nya meh kebuah aku bisi pemerani besampika utai tu ngagai Nuan. 28 O Jehovah, Tuan ti Pemadu Tinggi, Nuan meh Petara ti bendar, lalu jaku Nuan seruran amat. Nuan udah besemayaka utai ti manah tu ngagai aku. 29 Nya alai, berekatka meh peturun aku ngambika sida ulih merintah ba depan Nuan belama iya. O Jehovah, Tuan ti Pemadu Tinggi, Nuan udah besemayaka utai tu, awakka Nuan merekatka peturun aku belama iya.”