Luke

12 Maya nya, beribu-ribu iku orang begelumu. Penyampau sida chukup mayuh nyentukka sida teindikka kaki pangan diri. Keterubah, Jesus bejaku ngagai bala murid iya: “Bejaga ari ragi orang Parisi, iya nya ulah sida ke pura-pura ngapa. 2 Tang semua utai ti dilalaika enggau bebendar deka diayanka. Lalu nama-nama utai ti diresiaka deka ditemu. 3 Nya alai, nama-nama utai ti dipadahka kita belalai, deka didinga orang mayuh. Lalu utai ti ditelai kita ba dalam bilik, deka ditusui ari puchuk perabung. 4 Bala kaban aku, aku madah ngagai kita: Anang takutka sida ke ulih munuh tubuh tang udah nya enda ulih ngereja nama-nama utai agi. 5 Tang aku deka madah ngagai kita, ngagai sapa kita patut takut. Takut meh ngagai Iya ke ulih munuh kita lalu udah nya bisi kuasa muai kita ngagai Gehena.* Au, aku madah ngagai kita: Kita patut takutka Iya. 6 Endaka lima iku burung pipit dijual enggau rega dua singkap duit seling ke mit rega?* Taja pia, nadai siku pan burung nya ke enda dikingatka* Petara. 7 Indah semua lambar buk ba pala kita udah diitung Iya magang. Anang takut, kita jauh berega agi ari mayuh burung pipit.

8 “Aku madah ngagai kita: Enti orang ngaku diri murid aku ba mua orang mayuh, Anak Mensia pan deka ngaku orang nya murid iya ba mua bala melikat Petara. 9 Tang enti orang enggai ngaku diri murid aku ba mua orang mayuh, aku pan enggai ngaku iya murid aku ba mua bala melikat Petara. 10 Lalu barang sapa bejaku ngelaban Anak Mensia deka diampun. Tang barang sapa bejaku ngelaban kuasa kudus enda ulih diampun. 11 Lebuh kita ditasat ba mua orang mayuh,* pemesai perintah, enggau piak ti bekuasa, anang irauka utai ke deka disebut kita tauka chara kita deka ngetanka diri. 12 Laban maya nya, baru kuasa kudus deka ngajar kita nama utai ke patut disebut.”

13 Udah nya, siku orang ari bala orang mayuh bejaku ngagai Jesus: “Pengajar, asuh menyadi lelaki aku meri sebagi ari reta ke ditinggalka apai kami ngagai aku.” 14 Ku Jesus madah ngagai iya: “Sapa ke milih aku ngakim pekara tu tauka magi reta nya ke seduai?” 15 Udah nya, Jesus bejaku ngagai orang mayuh: “Bejimat kita lalu seliahka diri ari semua macham pengamu. Taja pan sesiku orang bisi mayuh reta, reta nya enda ulih meri iya pengidup.” 16 Jesus lalu madah ngagai sida pasal siti jaku sempama: “Tanah siku lelaki ke kaya mansutka mayuh asil. 17 Nya alai, iya berunding: ‘Nama patut digaga aku? Diatu aku nadai endur nyimpan asil utai ke ditanam aku.’ 18 Ku iya berunding agi: ‘Tu utai ke deka digaga aku: Aku deka ngerubuhka setor aku lalu ngaga setor ke besai agi, ngambika aku ulih nyimpan semua gandum enggau reta aku ba dia. 19 Aku deka madah ngagai diri empu: “Aku udah ngumpul mayuh reta ke ulih dikena aku betaun-taun. Diatu aku ulih idup senang, makai, ngirup sereta ngelantangka ati diri.”’ 20 Tang Petara madah ngagai iya: ‘Nuan orang ke enda nemu berunding enggau manah. Malam tu, nuan deka mati. Nyadi sapa ke deka ngempu utai ke udah disimpan nuan?’ 21 Nya meh utai ke nyadi ngagai orang ke nyimpan reta ke diri empu, tang enda kaya ba mata Petara.”

22 Udah nya, iya madahka ngagai bala murid iya: “Nya alai, aku madah ngagai kita: Anang agi irauka pasal pengidup kita tauka utai ke deka diempa kita. Anang irau pasal tubuh enggau gari ke deka dikena kita. 23 Laban pengidup berega agi ari pemakai, lalu tubuh berega agi ari gari. 24 Peratika burung kak: Sida nadai betanamka utai tauka ngetau. Sida nadai setor tauka rumah kena nyimpan pemakai. Taja pia, Petara nupi sida. Endaka kita berega agi ari burung? 25 Sapa bagi kita ke ulih nginsur nyawa diri seminit* panjai agi ketegal berasai irau? 26 Enti utai ti mit nya pan enda ulih dikereja kita, nama kebuah kita irauka pasal utai bukai? 27 Peratika bungai: Sida enda gawa tauka ngaga gari ke diri empu. Tang aku madah ngagai kita: Indah Raja Solomon ke ngembuan mayuh utai ti manah pan nadai gari ngemanah siti ari bungai nya. 28 Nama kebuah pengarap kita mit? Enti Petara ngari utai tumbuh ba babas ke idup seharitu lalu ditunu hari siti, Iya tentu mega deka ngari kita. 29 Nya alai, anang agi kelalu berundingka utai ke deka diempa enggau utai ke deka diirup kita, lalu badu agi kelalu irau. 30 Laban semua utai nya balat dikinginka orang ba dunya. Tang Apai kita nemu kita begunaka semua utai nya. 31 Nya alai, anang ngetu ngenuluka Perintah Iya, lalu semua utai nya deka diberi ngagai kita.

32 “Anang takut, kita ke raban mit,* laban Apai kita gaga ati deka meri Perintah Iya ngagai kita. 33 Jual semua reta tengkira kita, lalu tulung orang ke begunaka bantu. Ulihka kambut duit ti enda nemu jai, iya nya reta ba serega ke enda nemu abis, laban ba din penchuri enda ulih datai semak ngagai reta kita, lalu indu gegat enda ulih ngerusakka iya. 34 Laban ba dini alai reta kita, ba dia meh alai ati kita.

35 “Tentuka kita udah begari sereta besedia.* Lalu tentuka mega lampu kelita kita udah ditungkun. 36 Kita patut nyadi baka ulun ke benung nganti tuan sida pulai ari pengerami tikah. Lebuh tuan sida datai lalu ngetuk pintu, sida ulih muka pintu ke iya tekala nya. 37 Gaga ati meh ulun nya, enti tuan sida datai lalu nemu sida benung bejaga. Enggau bendar aku madah ngagai kita: Iya deka nyediaka diri* lalu ngasuh sida duduk makai ba mija, lalu iya deka ngintu sida. 38 Gaga ati meh sida, enti iya nemu sida benung bejaga lebuh iya datai ba gintir jaga kedua* tauka indah ba gintir jaga ketiga.* 39 Perundingka pekara tu: Enti orang ke bempu rumah nemu jam berapa penchuri deka datai, iya tentu enda nejuka rumah iya dirumpak. 40 Nya alai, kita patut sedia, laban Anak Mensia deka datai ba jam ti enda disangka kita.”

41 Udah nya, ku Peter bejaku: “Tuan, kati nuan madahka jaku sempama tu semina ngagai kami aja tauka mega ngagai semua orang?” 42 Lalu ku Tuan Jesus madahka: “Sapa kebendar iya ulun* ke tetap ati sereta bepenemu-dalam,* ke udah dipilih tuan iya ngemataka semua ulun ti bukai, ngambika seruran meri sida pemakai ti chukup ba maya ti patut? 43 Ulun nya tentu deka gaga ati lebuh tuan iya datai lalu nemu iya benung ngereja pengawa iya! 44 Enggau bendar aku madah ngagai kita: Tuan nya deka milih ulun nya ngemataka semua reta tengkira iya. 45 Tang enti sema ulun nya bejaku dalam ati diri: ‘Tuan aku laun datai,’ lalu iya belabuh bepaluka ulun ke lelaki enggau ke indu sereta makai ngirup lalu mabuk, 46 tuan iya deka datai ba hari ti enda disangka iya enggau ba jam ti enda ditemu iya. Tuan iya deka balat amat ngukum iya lalu muai iya sama enggau orang ke enda tetap ati. 47 Ulun nya meretika utai ke dipinta tuan iya tang iya enda besedia tauka ngereja peneka tuan iya. Nya alai, iya deka disipat mayuh kali. 48 Tang bisi ulun ke ngereja penyalah ketegal enda meretika utai ke dipinta tuan iya. Nya alai taja pan iya patut disipat, tang iya semina deka disipat beberapa kali aja. Endang amat, enti sesiku orang nerima mayuh tanggung pengawa, iya patut bejalaika tanggung pengawa nya. Enti sesiku orang diberi tanggung pengawa ngemataka mayuh utai, orang tentu ngarapka iya ngereja semua utai nya enggau betul.

49 “Aku datai laban deka nungkun api ba dunya. Api udah ditungkun. Nya alai, nadai utai agi ke dikinginka aku. 50 Bisi siti baptisa ke patut nyadi ba aku, lalu aku balat tusah ati seagi-agi utai nya bedau nyadi. 51 Kati kita ngumbai aku datai mai pengelantang ngagai dunya? Enda. Tang aku datai mai penyarut. 52 Belabuh ari diatu, lima iku orang ba diri sebilik deka charut. Tiga iku ngelaban dua iku, lalu dua iku ngelaban tiga iku. 53 Apai ngelaban anak lelaki; anak lelaki ngelaban apai; indai ngelaban anak indu; anak indu ngelaban indai; mentua indu ngelaban menantu indu; lalu menantu indu ngelaban mentua indu.”

54 Udah nya, Jesus madah ngagai orang mayuh: “Lebuh kita meda mua hari petang tunga ke barat, kita lalu nyebut, ‘Kabut deka datai,’ lalu utai nya deka nyadi. 55 Lebuh kita meda angin selatan bepuput, kita lalu nyebut, ‘Angat amat hari tu legi,’ lalu utai nya deka nyadi. 56 Kita tu orang ke pura-pura ngapa! Kita nemu madahka gaya hari ari utai ti dipeda kita ba dunya enggau langit. Tang nama kebuah kita enda meretika utai ke benung nyadi diatu? 57 Nama kebuah kita enda nemu utai ke patut digaga kita? 58 Ambika chunto, kita enggau orang ke bedawaka kita deka betemu enggau piak ti bekuasa. Lebuh mansang kin, kita patut enggau naka ulih mutarka penanggul kita enggau orang nya, ngambika iya enda nyerahka kita ngagai hakim, lalu hakim enda nyerahka kita ngagai jejaga, lalu jejaga enda ngejil kita. 59 Aku madah ngagai kita: Kita enda ulih pansut ari rumah jil nya enti kita bedau mayar semua utang kita, nyentuk ngagai duit seling ke mit rega ti penudi.”*