Epesus

5 Nyadi tunda meh teladan Petara, baka anak ti dikerinduka Iya. 2 Terus meh ngayanka pengerindu, baka Kristus ke rinduka kitai,* lalu udah nyerahka diri ke kitai* nyadi pemeri ti bebau rengut ngagai Petara.

3 Anang nyebut pasal ulah seks ti kamah,* semua macham utai ti kamah, tauka nyebut utai ti nunjukka kita amu, laban nya enda ngena ba orang ti kudus. 4 Anang mega nyebut pasal pengawa ti ngemaluka, utai ti beli, tauka jaku tundi ke enda senunuh, laban semua nya utai ti enda patut disebut kita. Tang beri meh terima kasih ngagai Petara. 5 Kita empu nemu sereta sedar, orang ke ngereja ulah seks ti kamah,* orang ke ngereja utai ti kamah, tauka orang ke amu, iya nya orang ke nyembah engkeramba, enda ulih nerima pesaka ba Perintah Kristus enggau Petara.

6 Anang nejuka sapa-sapa nipu kita ngena jaku ti nadai reti, laban ketegal utai ke baka nya meh Petara ringat ngagai orang ke enda ngasi. 7 Nya alai, anang bisi nama-nama kaul enggau sida. 8 Suba, kita idup dalam pemetang. Tang diatu, kita idup dalam penampak, laban kita enggi Tuan. Nya alai, terus meh idup nyadi anak penampak, 9 laban penampak mai semua utai ti manah, lurus, sereta bendar. 10 Terus meh nentuka utai ti ngelantangka ati Tuan. 11 Badu agi ngereja pengawa ti nadai reti ke bekaul enggau pemetang. Tang, kita patut mantaika nama pengawa nya kebendar iya. 12 Indah, deka nyebut utai ti dikereja sida belalai deh, kitai malu. 13 Semua utai diayanka* ketegal dibantaika penampak, laban semua utai ke dibantaika deka nyadi penampak. 14 Nya alai, baka ke ditulis ba Bup Kudus: “Dani meh kita ke benung tinduk. Angkat ari pemati, lalu Kristus deka manchar ngagai kita.”

15 Nya alai, seruran bejaga sereta bejimat, ngambika kita enda idup baka orang ke beli, tang baka orang ke bepenemu-dalam. 16 Kena meh awak kita enggau manah,* laban kitai idup ba maya* ti jai. 17 Nya alai, badu agi nyadi orang ke enda nemu berunding enggau manah, tang terus meh meretika peneka Jehovah. 18 Pia mega, anang mabuk ketegal wain, laban nya deka nuju ngagai pengidup ti enda menuku.* Tang awakka kita terus penuh laban kuasa kudus. 19 Bejaku ngagai pangan diri* ngena masmur, jaku puji ngagai Petara, sereta lagu sembah ngagai Petara. Belagu meh ngagai Jehovah diseretaka enggau musik ba dalam ati kita. 20 Seruran meri terima kasih ngagai Petara sereta Apai kitai ke semua utai dalam nama Tuan kitai, Jesus Kristus.

21 Nunduk meh ngagai pangan diri ketegal kita nangika Kristus. 22 Bini patut nunduk ngagai laki sida, baka sida ke nunduk ngagai Tuan kitai, 23 laban laki nyadi kepala bini iya, sama baka Kristus ke nyadi kepala raban gempuru, iya nya tubuh iya. Kristus meh penyelamat tubuh nya. 24 Kebendar iya, baka raban gempuru ke nunduk ngagai Kristus, bini mega patut nunduk ngagai laki sida dalam semua pekara. 25 Kita ke laki, terus meh rinduka bini kita, baka Kristus ke rinduka raban gempuru, lalu nyerahka diri ke raban gempuru. 26 Enggau nya, iya ulih ngasuh raban gempuru nyadi tuchi, lebuh iya meresi raban gempuru ngena ai, iya nya jaku Petara, 27 ngambika raban gempuru nadai bepetik, nadai ngeriut, nadai penimpang tauka utai ke baka nya, tang nyadi kudus sereta manah dipeda ba mata iya.

28 Pia mega, laki patut rinduka bini iya, baka iya ke rinduka tubuh iya empu. Laki ke rinduka bini iya mega rinduka diri empu. 29 Nadai siku orang ke begedika tubuh diri, tang iya nyaga sereta sayauka tubuh iya baka ke digaga Kristus ngagai raban gempuru, 30 laban kitai meh perengka tubuh iya. 31 “Ketegal nya, lelaki deka ninggalka apai enggau indai iya, lalu mengkang begulai* enggau bini iya, lalu seduai iya deka nyadi siti tubuh.” 32 Resia ti kudus tu amat penting. Aku benung bejaku pasal Kristus enggau raban gempuru. 33 Taja pia, tiap iku kita patut rinduka bini diri, baka kita ke rinduka diri empu, lalu bini patut balat bebasaka laki iya.