Matthew

10 Jesus ngangauka 12 iku murid iya, lalu meri sida kuasa kena muru melikat ti jai, sereta kena ngeraika semua macham pemedis enggau penyakit.

2 Tu nama 12 iku rasul nya: Simon ke dikumbai Peter, enggau menyadi iya Andrew; James anak Sebedi enggau menyadi iya John; 3 Philip enggau Bartolomew; Thomas, enggau Matthew ke gawa ngumpul chukai; James anak Alfius enggau Tadius; 4 Simon ke ransing, enggau Judas Iskariot ke udah nya nyerahka Jesus ngagai munsuh.

5 Jesus ngasuh 12 iku rasul iya bejalai, lalu meri pesan ngagai sida: “Anang ngagai menua orang bansa bukai tauka ngagai nengeri orang Samaria. 6 Tang kita patut ngagai orang Israel ke baka bedus ti tesat. 7 Lebuh kita bejalai, padahka ngagai orang: ‘Perintah serega nyau semak.’ 8 Geraika orang ke sakit, angkatka orang ke mati idup baru, geraika orang ke sakit lan,* sereta buru melikat ti jai. Kita udah nerima enggau pechuma, nya alai beri meh enggau pechuma. 9 Anang mai duit emas, pirak, tauka temaga dalam kambut duit kita. 10 Anang mai kambut pemakai laban orang ke bekereja endang patut nerima pemakai. Pia mega, anang mai baju kena besilih, tauka kasut, tauka tungkat.

11 “Lebuh kita ngagai siti-siti nengeri tauka genturung pendiau, giga orang ke deka nerima kita.* Diau meh enggau iya datai ke kita angkat ari endur nya. 12 Lebuh kita tama ngagai rumah orang, beri jaku tabi ngagai orang ba rumah nya. 13 Enti sida deka nerima kita, awakka sida diberekat. Tang enti sida enggai nerima kita, awakka berekat nya pulai baru ngagai kita. 14 Enti bisi orang enggai nerima kita tauka enggai mendingka kita, tesai debu ari kaki kita lebuh kita angkat ari rumah tauka ari nengeri nya. 15 Enggau bendar aku madah ngagai kita: Lebuh Hari Pechara* ila, ukum ke ninggang Sodom enggau Gomorah deka lempung agi ari ukum ke ninggang nengeri nya.

16 “Kingatka! Aku ngasuh kita bejalai baka bedus ngagai raban serigala. Nya alai, kita patut bejaga baka ular, tang nelap baka burung achang. 17 Kita patut bejimat, laban orang deka mai kita ngagai kot, lalu sida deka nyipat kita dalam balai gempuru sida. 18 Kita deka dibai ngagai gabenor enggau raja ketegal aku. Enggau nya, kita besaksika pasal aku ngagai sida enggau ngagai orang bansa bukai. 19 Tang lebuh sida nangkap kita, anang irauka utai ke deka disebut kita tauka chara kita deka nyebut iya. Laban maya nya, baru kita deka nemu utai ke patut disebut kita. 20 Laban ukai semina kita ke bejaku, tang kuasa kudus ari Apai kita ti bejaku nengah kita. 21 Kelimpah ari nya, orang deka nyerahka menyadi diri ngambika dibunuh, apai deka nyerahka anak iya empu ngambika dibunuh, lalu anak deka ngelaban apai indai, lalu nyerahka sida ngambika dibunuh. 22 Semua orang deka begedika kita ketegal nama aku. Tang orang ke tan datai ke ujung, deka diselamatka. 23 Lebuh sida merinsaka kita ba nengeri siti, rari meh ngagai nengeri siti. Enggau bendar aku madah ngagai kita: Anak Mensia deka datai, sebedau kita ulih nembuka pejalai kita ngagai semua nengeri ba menua Israel.

24 “Nadai murid ke manah agi ari pengajar iya, lalu nadai ulun ke manah agi ari tuan iya. 25 Enti murid nyadi sebaka enggau pengajar iya, lalu ulun nyadi sebaka enggau tuan iya, nya udah chukup. Enti tuai bilik dikumbai Belsebup,* sida sebilik tentu mega deka dikumbai ngena nama ti sama. 26 Nya alai, anang takutka sida, laban semua utai ti ditudung deka dikebakka, lalu nama-nama utai ti diresiaka deka ditemu. 27 Utai ti dipadahka aku belalai ngagai kita, patut ditusui kita ngagai orang mayuh. Lalu utai ti dipetelaika aku ngagai kita, patut ditusui kita ari puchuk perabung. 28 Anang takutka sida ke ulih munuh tubuh tang enda ulih munuh nyawa.* Tang kita patut nangika Petara, ti ulih ngerusakka tubuh enggau nyawa kita ba Gehena.* 29 Endaka dua iku burung pipit dijual enggau rega sesingkap duit seling ke mit rega?* Tang taja pan siku ari burung nya labuh ke tanah, Apai kita deka nemu pasal nya. 30 Indah semua lambar buk ba pala kita udah diitung Iya magang. 31 Nya alai, anang takut. Kita jauh berega agi ari mayuh burung pipit.

32 “Enti orang ngaku diri murid aku ba mua orang mayuh, aku pan deka ngaku iya murid aku ba mua Apai aku ti ba serega. 33 Tang enti orang enggai ngaku diri murid aku ba mua orang mayuh, aku pan enggai ngaku iya murid aku ba mua Apai aku ti ba serega. 34 Anang ngumbai aku datai mai pengelantang ngagai dunya. Aku ukai datai mai pengelantang, tang mai penyarut.* 35 Penatai aku ngasuh anak lelaki ngelaban apai iya, anak indu ngelaban indai iya, lalu menantu indu ngelaban mentua indu iya. 36 Endang amat, munsuh siku-siku orang nya sida sebilik empu. 37 Barang sapa rinduka apai tauka indai diri lebih agi ari rinduka aku, enda ulih nyadi murid aku. Pia mega, barang sapa rinduka anak lelaki tauka anak indu diri lebih agi ari rinduka aku, enda ulih nyadi murid aku. 38 Lalu barang sapa ke enggai ngesan tiang perinsa* diri, lalu nitihka aku, enda ulih nyadi murid aku. 39 Barang sapa ke deka ngidupka nyawa diri, deka ngelenyauka nyawa iya, lalu barang sapa ke ngelenyauka nyawa diri ketegal aku, deka idup baru.

40 “Barang sapa nerima kita, nerima aku mega. Lalu barang sapa nerima aku, nerima mega Iya ke ngirumka aku. 41 Barang sapa nerima nabi laban orang nya nabi, deka nerima upah nabi. Lalu barang sapa nerima orang ke lurus laban orang nya orang ke lurus, deka nerima upah orang ke lurus. 42 Lalu barang sapa meri sechangkir ai chelap ngagai siku ari murid aku,* enggau bendar aku madah ngagai kita: Iya tentu deka nerima upah iya.”