Melikat Jehovah Ngelindung Hesekiah

Perintah Asiria udah ngalahka perintah sepuluh raban bansa Israel. Diatu, Senakerip, raja menua Asiria deka ngambi perintah dua raban bansa Judah. Iya berengkah ngalahka nengeri Judah ari siti ke siti. Taja pia, nengeri ke amat dikedekaka iya nya Jerusalem. Tang, Senakerip enda nemu Jehovah ngelindung Jerusalem.

Hesekiah, raja menua Judah udah mayar mayuh duit ngagai Senakerip ngambika enda nyerang Jerusalem. Taja pan Senakerip ngambi duit nya, iya agi nganjung bala soldadu iya ti kering nyerang Jerusalem. Orang ba nengeri nya takut laban orang Asiria majak semak. Udah nya Hesekiah madahka sida: ‘Anang takut. Orang Asiria endang kering, tang Jehovah deka ngasuh kitai kering agi ari sida.’

Senakerip nganjung pemesai iya ngagai Jerusalem kena ngeleseka orang ba nengeri nya. Pemesai nya bediri ba luar kuta lalu manjung: ‘Jehovah enda ulih nulung kita. Anang nejuka Hesekiah nipu kita. Nadai petara bukai ke ulih ngelindung kita ari kami.’

Hesekiah nanya Jehovah nama patut digaga iya. Saut Jehovah: ‘Anang takut enggau jaku ke dipadah pemesai orang Asiria. Senakerip enda ulih ngambi Jerusalem.’ Udah nya, Hesekiah nerima surat ari Senakerip. Ba surat nya madah: ‘Serahka diri aja. Jehovah enda ulih nyelamatka kita.’ Hesekiah besampi: ‘Jehovah, tulung selamatka kami, ngambika tiap iku orang nemu semina Nuan aja Petara ti bendar.’ Jehovah madahka iya: ‘Raja menua Asiria enda ulih tama ngagai Jerusalem. Aku deka ngelindung nengeri tu.’

Senakerip pechaya enda lama agi Jerusalem deka diempu iya. Tang malam nya, Jehovah nganjung seiku melikat mansang ngagai kem Asiria ba luar kuta. Melikat nya munuh 185,000 iku soldadu! Raja Senakerip nadai agi bala soldadu ke pemadu kering. Iya nadai chara bukai tang semina pulai ke menua iya. Jehovah ngelindung Hesekiah enggau Jerusalem, baka ke udah disemayaka Iya. Enti nuan bisi ba Jerusalem maya nya, kati nuan mega arapka Jehovah?