PELAJAR 56
Tanka Penyerakup ba Eklisia
Lebuh kitai begulai enggau bala menyadi, kitai tentu ngasaika utai ke dipadah Raja David: ‘Naka meh pemanah, naka meh penyamai lebuh nembiak Petara diau seati enggau pangan diri!’ (Masmur 133:1) Penyerakup entara nembiak Petara enda nyadi baka nya aja. Tiap iku kitai bisi tanggung pengawa ngambika ulih ngetanka penyerakup entara pangan diri.
1. Nama utai ti ngalitka ati ke bisi ba Saksi-Saksi Jehovah?
Saksi-Saksi Jehovah beserakup nyembah Jehovah seiku aja. (Sepaniah 3:9) Nembiak Petara nya baka ruang bilik ti besai. Lebuh kitai bejalai ngagai menua bukai, sereta datai ngagai gempuru dia, kitai ulih ngasaika pengerindu taja pan kitai enda meretika bansa jaku ti dikena sida. Kelimpah ari nya, kitai mega berasai lantang laban kitai bisi litaricha ti sama kena belajarka Bup Kudus. Endaka penyerakup ti dikembuan kitai tu amat ngalitka ati?
2. Baka ni nuan ulih ngemansangka penyerakup tu?
Bup Kudus madahka: “Rinduka pangan diri enggau pengabis ati.” (1 Peter 1:22) Baka ni nuan ulih nitihka jaku lalau tu? Kitai patut meda pemanah sida ari ke meda pengelemi sida. Kelimpah ari nya, anang semina begulai enggau orang ke dikelala sereta bisi minat ti sama enggau nuan. Tang, uji mega ngelala bala menyadi ke bisi gaya pendiau ti enda sebaka enggau nuan. Endang manah enti kitai ulih muai asai ati ke bepilih mata.—Bacha 1 Peter 2:17.a
3. Nama patut digaga enti nuan bisi enda nyamai ati enggau bala menyadi?
Semua kitai enda sempurna. Nya alai, kitai engka ngemedis tauka ngasaka ati pangan diri. Tang Bup Kudus ngasuh kitai terus ngampun pangan diri. Ku iya agi, ‘Baka Jehovah ke udah ngampun kita, baka nya mega kita ngampun pangan diri.’ (Bacha Kolosi 3:13.) Kitai suah ngemediska ati Jehovah, tang Iya selalu ngampun kitai. Jehovah tentu gaga ati lebuh kitai nunda teladan Iya. Nya alai, enti nuan ngasaika diri udah ngemediska ati orang, jampat meh mutarka penanggul nya.—Bacha Matthew 5:23, 24.b
BELAJAR MAYUH AGI
Giga chara nuan ulih ngemansangka pemaik enggau penyerakup ba eklisia.
Nama deka digaga nuan ngambika ulih bebaik?
4. Seliahka ulah ti bepilih mata
Kitai deka rinduka semua bala menyadi, tang kitai engka tusah deka nerima sekeda ari sida. Nama ulih nulung kitai? Bacha Surat Kereja Rasul 10:34, 35, lalu kerandauka tanya tu:
Jehovah nerima semua orang nyadi penyembah Iya. Baka ni tu ulih ngubah runding nuan ngagai orang ke enda sama chara pengidup enggau nuan?
Nama ulah ti bepilih mata ke bisi nyadi ba endur nuan diau ke deka diseliahka nuan?
Bacha 2 Korint 6:11-13, lalu kerandauka tanya tu:
Baka ni nuan ulih belajar rinduka semua bala menyadi Kristian nuan enggau dalam agi enda ngira gaya pendiau sida?
5. Deka ngampun sereta bebaik enggau pangan diri
Jehovah seruran deka ngampun kitai taja pan Iya enda begunaka kitai ngampunka Iya. Bacha Masmur 86:5, lalu kerandauka tanya tu:
Ni pemesai pengampun ari Jehovah?
Kati nuan beterima kasihka Jehovah ketegal Iya deka ngampun? Nama kebuah?
Nama utai ke engka ngasuh kitai tusah deka beserakup enggau orang bukai?
Baka ni kitai ulih nunda chunto Jehovah lalu ngetanka penyerakup enggau bala menyadi Kristian kitai? Bacha Jaku Dalam 19:11, lalu kerandauka tanya tu:
Lebuh orang ngemediska ati nuan, nama utai ulih digaga nuan?
Kekadang, kitai ngemediska ati orang bukai. Enti pia, nama patut digaga kitai? Mainka VIDEO, lalu kerandauka tanya tu.
Baka ni menyadi indu dalam video nya bebendar deka bebaik enggau menyadi indu ke seiku agi?
6. Giga meh pemanah ti dikembuan bala menyadi
Lebuh kitai majak semak enggau bala menyadi Kristian, kitai ulih beratika pengering enggau pengelemi sida. Baka ni kitai ulih beratika pemanah sida? Mainka VIDEO, lalu kerandauka tanya tu.
Nama utai ke ulih nulung nuan meda pemanah bala menyadi?
Jehovah beratika pemanah ti dikembuan kitai. Bacha 2 Bansa Israel 16:9a, lalu kerandauka tanya tu:
Nama asai ati nuan pengudah nemu Jehovah beratika pemanah ti dikembuan nuan?
Taja pan sigi intan belian enda manah gamal, tang iya agi amat berega. Baka nya mega, taja pan bala menyadi Kristian kitai enda sempurna, tang sida agi berega ba Jehovah
BISI ORANG MADAH: “Enti iya minta ampun dulu, nya baru aku deka ngampunka iya.”
Nama kebuah kitai keran deka ngampun orang bukai?
LANSA
Nuan ulih nulung ngetanka penyerakup ba eklisia enggau ngayanka pengerindu sereta deka ngampun.
Ulang Kaji
Baka ni kitai ulih muai asai ati ti bepilih mata ngagai orang bukai?
Nama patut digaga nuan enti nuan enda nyamai ati enggau bala menyadi Kristian?
Nama kebuah nuan deka nunda chunto Jehovah lalu deka ngampun ari ati?
ARAM BELAJAR
Belajar mayuh agi ari sempama Jesus ke ulih nulung kitai ngambika enda ngakim orang bukai.
Patut kitai minta ampun taja pan kitai enda besalah?
Peratika baka ni sekeda orang mutarka ulah bepilih mata enggau orang bukai.
Belajarka chara mutarka asai ati ti enda nyamai enggau bala menyadi ngambika enda ngachau penyerakup ba eklisia.
“Mutarka Penanggul Ngena Pengerindu” (Menara Jaga, Mei 2016)
a Nota Penutup 6 berandauka baka ni pengerindu meransang kitai bejimat ngambika enda ngasuh penyakit berampit ngelekai ngagai orang bukai.
b Nota Penutup 7 berandauka chara mutarka penanggul ti bekaul enggau pengawa dagang sereta undang-undang.