Kati Nuan Nganti “Sebuah Nengeri ti Bisi Batu Pemun”?

 1. Nama udah dilengkaka nembiak Petara, lalu nama kebuah?

BEJUTA iku nembiak Petara kemayaharitu udah ngelengkaka sekeda utai. Ambika chunto, mayuh bala menyadi Kristian milih enda kawin tauka laki bini enda beguai deka bisi anak. Bisi mega diri sebilik idup enggau pengumbas iya. Sida ngaga pemutus tu ketegal deka gawa mayuh agi ke Jehovah. Sida gaga ati sereta nemu Jehovah deka nyediaka semua utai ke diguna sida. Kati sida asa ati? Enda! Nama kebuah kitai nemu? Siti kebuah iya, Jehovah udah merekatka Abraham, “apai semua orang ke arap.”—Rom. 4:11.

 2. (a) Nitihka Hebrew 11:8-10, 16, nama kebuah Abraham sanggup ninggalka Ur? (b) Nama deka dikerandauka kitai ba artikel tu?

² Abraham sanggup ninggalka pengidup ti lantang di nengeri Ur. Nama kebuah? Laban iya nganti “sebuah nengeri ti bisi batu pemun.” (Bacha Hebrew 11:8-10, 16.) Nama “nengeri” nya? Nama penanggul ke ditapi Abraham lebuh nganti “nengeri” ke deka digaga? Baka ni kitai ulih neladan Abraham? Lalu baka ni kitai nunda nembiak Petara kemayaharitu ke neladan Abraham?

 3. Nama nengeri ke dianti Abraham?

³ Nengeri ke dianti Abraham nya Perintah Petara. Jesus Kristus sereta 144,000 iku orang ke dipilih deka merintah perintah nya. Paul ngumbai Perintah nya ‘nengeri Petara ti idup, ngagai nengeri Jerusalem ti di serega.’ (Heb. 12:22; Pem. 5:8-10; 14:1) Jesus ngajar bala murid iya besampika pasal Perintah Petara datai ngambika peneka Petara nyadi ba dunya enggau di serega.—Mat. 6:10.

 4. Nitihka Pemungkal 17:1, 2, 6, nama ditemu Abraham pasal nengeri tauka Perintah, ti disemaya Petara?

⁴ Kati Abraham amat nemu penerang baka ni Perintah Petara deka diatur? Enda. Beribu taun, penerang nya “misteri.” (Eps. 1:8-10; Kol. 1:26, 27) Tang Abraham nemu, sekeda peturun iya deka nyadi raja laban Jehovah udah besemaya enggau iya. (Bacha Pemungkal 17:1, 2, 6.) Abraham amat andalka semaya Petara, nyentukka iya baka ke ulih meda Messiah, nyadi Raja ba Perintah Petara. Nya meh kebuah Jesus madah ngagai orang Judah ba jeman iya: ‘Aki kita Abraham gaga ati deka meda hari aku. Iya meda hari nya, lalu iya gaga.’ (Jhn. 8:56) Endang amat, Abraham nemu sekeda ari peturun iya deka enggau merintah ba Perintah Petara ti deka ditumbuhka Jehovah. Lalu Abraham sanggup nganti Jehovah ngamatka semaya Iya.

 5. Baka ni kitai nemu Abraham nganti nengeri ke digaga Petara?

⁵ Baka ni Abraham nunjukka diri nganti nengeri, tauka Perintah ke digaga Petara? Terubah, Abraham enda nyadi rayat ba sebarang perintah dunya. Iya milih nyadi orang kampar, enda terus diau ba siti-siti endur, sereta enda nyukung pemerintah mensia. Nambahka nya, iya mega enda nirika perintah diri empu. Tang iya terus ngasika Jehovah lalu nganti Jehovah ngamatka semaya Iya. Enggau chara nya, Abraham nunjukka diri amat bisi pengarap ba Jehovah. Aram kitai berandauka sekeda penanggul ke ditapi Abraham lalu nama ulih dipelajarka kitai ari teladan iya.

 6. Baka ni gaya nengeri Ur?

⁶ Abraham ninggalka nengeri Ur ti manah endur diau sereta bisi pengelikun. Nengeri nya dilindung dinding kuta ti tinggi lalu dikelingi ai ti dalam ba tiga piak. Orang ba nengeri Ur kaya, tepelajar, landik ba pengawa nulis sereta kira-kira. Lalu nitihka dokumen ke ditemu pakar arkeologi, nengeri Ur palan endur bedagang. Rumah ba nengeri nya digaga enggau batu bata lalu dinding rumah dichat ngena chat burak. Sekeda rumah bisi 13 tauka 14 bilik ke ngelingi siti laman ke bebatu.

 7. Nama kebuah Abraham arapka Jehovah deka nyaga sida sebilik?

⁷ Abraham enda tau enda arapka Jehovah deka nyaga sida sebilik. Nama kebuah? Kingatka, Abraham enggau Sarah udah ninggalka rumah di nengeri Ur ti likun sereta lantang, lalu seduai iya diau ba langkau kain di menua puang Kanaan. Nadai agi dinding kuta ti tinggi tauka ai ti dalam ke ulih ngelindung sida sebilik. Sida deka senang diserang munsuh.

 8. Nama penanggul ke ditapi Abraham?

⁸ Abraham ngereja peneka Jehovah. Tang bisi sekali iya tusah deka nyediaka pemakai ke diri sebilik. Maya nya, lapar pungkang balat nyadi ba menua alai Jehovah nganjung iya. Ketegal nya Abraham mai diri sebilik iya mindah ngagai Ejip enda lama. Tang lebuh ba dia, raja Ejip ngambi Sarah ari Abraham. Uji gambarka, pengirau ke diasai Abraham nyentukka Jehovah ngasuh raja Ejip mulaika baru Sarah ngagai Abraham.—P-kal. 12:10-19.

 9. Nama penusah ke ditapi Abraham sebilik?

⁹ Pengidup Abraham diri sebilik bisi penusah. Bini iya Sarah enda ulih beranak. Betaun-taun seduai berasai asa ati ketegal penusah nya. Pengujung iya, Sarah nyerahka ulun iya, Hagar, ngagai Abraham ngambika ulih bisi anak ke Abraham enggau Sarah. Tang lebuh Hagar ngandungka Ismail, iya mechat Sarah. Penusah tu balat nyadi nyentukka Sarah muru Hagar.—P-kal. 16:1-6.

10. Nama utai ke nyadi ngagai Ismail enggau Isak ke nguji pengarap Abraham ngagai Jehovah?

¹⁰ Sarah betubuh bisi lalu ngadaka seiku anak lelaki. Abraham meri nama anak iya, Isak. Abraham tentu sayauka dua iku anak iya, Ismail enggau Isak. Tang ketegal Ismail jai enggau Isak, Jehovah ngasuh Abraham muru Ismail enggau Hagar. (P-kal. 21:9-14) Betaun udah nya, Jehovah ngasuh Abraham nyerahka Isak nyadika pemeri. (P-kal. 22:1, 2; Heb. 11:17-19) Ba dua iti utai ke nyadi tu, Abraham nunjukka iya arapka Jehovah ti deka ngamatka semaya bekaul enggau dua iku anak iya.

11. Nama kebuah Abraham patut sabar nganti Jehovah ngamatka semaya Iya?

¹¹ Sepemanjai timpuh nya, Abraham patut sabar nganti Jehovah ngamatka semaya Iya. Umur Abraham engka lebih ari 70 taun lebuh iya enggau diri sebilik ninggalka nengeri Ur. (P-kal. 11:31–12:4) Lalu kira-kira seratus taun, iya diau ba langkau kain, seruran mindah serata menua Kanaan. Abraham mati lebuh umur iya 175 taun. (P-kal. 25:7) Abraham enda ulih meda Jehovah meri menua ti disemaya ngagai peturun iya. Lalu iya mega enda ulih meda Perintah Petara ditumbuhka. Taja pia, Bup Kudus madahka Abraham “mati tuai sereta puas ati” enggau pengidup iya. (P-kal. 25:8, NWT) Taja pan Abraham napi mayuh penusah, pengarap iya mengkang tegap lalu iya gaga ati nganti Jehovah. Nama kebuah Abraham ulih betan? Laban sepemanjai pengidup iya, Jehovah seruran nyaga iya sereta ngumbai iya pangan.—P-kal. 15:1; Isa. 41:8; Jas. 2:22, 23.

12. Nama dianti kitai, lalu nama deka dikerandauka kitai?

¹² Baka Abraham, kitai benung nganti sebuah nengeri ti bisi batu pemun. Kitai ukai nganti nengeri nya didirika, laban Perintah Petara udah ditumbuhka ba taun 1914 lalu udah merintah ba serega. Taja pia, kitai enda ibuh nganti nya ditumbuhka. (Pem. 12:7-10) Tang kitai nganti perintah nya merintah dunya. Seraya kitai nganti tu nyadi, kitai engka napi mayuh penanggul ti sama baka Abraham enggau Sarah. Kati bisi nembiak Jehovah kemayaharitu ke mujur neladan Abraham? Cherita pengidup dalam Menara Jaga nunjukka, mayuh nembiak Jehovah ngayanka pengarap sereta pengeliat ati baka Abraham enggau Sarah. Aram kitai berandauka peneleba ari sekeda menyadi Kristian kitai sereta utai ti ulih dipelajarka kitai.

13. Nama dipelajarka kitai ari peneleba Menyadi Bill?

¹³ Sanggup ngelengkaka utai. Enti kitai deka ngenuluka Perintah Petara ba pengidup, kitai enda tau enda neladan Abraham ti sanggup ngelengkaka utai kena ngelantangka ati Petara. (Mat. 6:33; Mrk. 10:28-30) Peratika chunto Menyadi Bill Walden.b Ba taun 1942, Bill nyauka abis belajar ba universiti lebuh iya berengkah belajar enggau Saksi-Saksi Jehovah. Seiku profesor nulung Bill bulih kereja pengudah iya abis belajar, tang Bill nulak. Iya madahka diri deka gawa mayuh agi ke Petara, ari ke nerima kereja ti besai gaji. Enda lama udah nya, Bill dikangau enggau pengawa soldadu. Tang iya nulak enggau manah. Ketegal nya, Bill diasuh mayar $10,000 lalu dijil pengelama lima taun. Pengudah tiga taun, iya dilepaska ari jil. Udah nya, iya dikangau ngagai Sekula Gilead, lalu nyadi pengerintis seberai tasik ba Afrika. Pengudah nya, Bill jadi enggau Eva lalu seduai sama ngerintis ba Afrika. Tang pengidup ba Afrika enda senang ba seduai iya. Pengudah beberapa taun, seduai pulai ngagai Amerika Serikat laban deka nyaga indai Bill. Ku Bill madah pasal pengidup iya: “Lebuh aku ngenang baka ni Jehovah ngena aku gawa ke Iya lebih ari 70 taun, aku berasai amat gaga ati. Aku suah beterima kasih ngagai Jehovah laban udah nulung aku ngena pengidup diri gawa ke Iya.” Kati nuan bisi juluk ati deka gawa penuh jam ke Jehovah?

14-15. Nama ulih dipelajar kitai ari Menyadi Aristotelis enggau bini iya Eleni?

¹⁴ Anang ngumbai nadai penanggul ba pengidup. Ari utai ke nyadi ba Abraham, kitai nemu penanggul mega ulih nyadi ba nembiak Jehovah. (Jas. 1:2; 1 Pet. 5:9) Peratika peneleba Menyadi Aristotelis Apostolidis.c Iya dibaptisa ba taun 1946 di Greece, lalu ba taun 1952, iya betunang enggau Eleni, ke ngembuan juluk ati ti sama enggau iya gawa ke Jehovah. Tang Eleni sakit lalu lutur madahka bisi tumor ba untak iya. Tumor nya dibuai lalu pengudah nya seduai iya jadi. Tang beberapa taun udah nya, tumor nya tumbuh baru. Sekali agi lutur muai tumor nya. Ketegal nya, sebagi ari tubuh Eleni lumpuh lalu iya enda ulih bejaku baka selama. Taja pan iya sakit sereta pengawa bala Saksi disakal perintah ba maya nya, Eleni mengkang ransing ba pengawa nginjil.

¹⁵ Menyadi Aristotelis ngintu bini iya pengelama 30 taun. Ba maya nya, iya megai tanggung pengawa nyadi tuai gempuru, gawa enggau komiti gempuru besai, sereta nulung nirika Palan Gempuru Besai. Ba taun 1987, Eleni bakal lebuh iya nginjil. Ketegal nya, iya koma pengelama tiga taun lalu mati. Ku Aristotelis madahka pasal utai ke nyadi ba pengidup iya: “Betaun-taun aku napi mayuh penanggul, lalu sekeda ari penanggul nya nyadi enggau enda disadang. Nya alai, aku patut betan sereta enda nejuka nama-nama utai ngasuh aku asa ati. Jehovah seruran meri aku pengering ngambika aku ulih napi semua penanggul tu.” (Mas. 94:18, 19) Jehovah tentu rinduka nembiak Iya ke bebendar gawa ke Iya taja pan napi mayuh penanggul.

16. Nama jaku lalau ti beguna ke diberi Menyadi Knorr ngagai bini iya?

¹⁶ Peratika pengadang ke jemah ila. Abraham betatika berekat ke deka diberi Jehovah ngagai iya, lalu nya nulung iya napi semua penanggul. Baka Abraham, Menyadi Audrey Hyde mega betatika pengadang iya ke jemah ila.d Laki iya ke dulu, Nathan H. Knorr, mati ketegal penyakit riman, lalu laki kedua iya, Glenn Hyde, bisi penyakit Alzheimer.e Nama nulung Menyadi Audrey betan sereta enda lenyau pengaga ati? Beberapa minggu sebedau Menyadi Knorr nadai, iya bisi madah ngagai Audrey: “Pengudah mati, pengadang nya endang enggi kitai, lalu kitai nadai ngasaika pemerinsa agi. Perundingka pasal jemah ila, laban nya meh upah ke deka diulih nuan. . . . Seruran ransing, sereta kena meh pengidup nuan nulung orang bukai. Tu deka nulung nuan gaga ati.” Enda ke jaku lalau tu amat meransang? Aram meh kitai terus ransing nulung orang bukai lalu kitai deka “gaga ati ke pengadang.”—Rom. 12:12.

17. (a) Nama kebuah manah kitai beratika pengadang ke jemah ila? (b) Baka ni nitihka Mikah 7:7 diatu ulih nulung kitai nerima berekat jemah ila?

¹⁷ Kemayaharitu, kitai bisi mayuh kebuah manah beratika pengadang ke jemah ila. Utai ke nyadi ba dunya tu nunjukka kitai ba pengujung hari ti penudi. Enda lama agi, Perintah Petara deka merintah dunya. Siti ari berekat ke deka diasaika kitai nya, ulih betemu enggau orang ti dikesayauka kitai ke diangkatka idup baru. Maya nya, Jehovah deka ngangkatka Abraham enggau diri sebilik idup baru. Tu upah ke Abraham ketegal pengarap sereta pengeliat ati iya. Kati nuan deka nyambut penatai sida? Nuan tentu ulih, enti nuan neladan Abraham ke (1) sanggup ngelengkaka utai kena ngenuluka Perintah Petara, (2) terus ngetanka pengarap taja pan napi penanggul, sereta (3) liat ati nganti Jehovah.—Bacha Mikah 7:7.