Baka Ni Chara Kitai Besampi—Kati Sampi Apai Kami Sampi ti Pemadu Manah?

Sampi Apai Kami ngajar kitai chara besampi, sereta nama utai ke ulih disampika kitai. Jesus nyaut bala murid iya ketegal bala murid iya minta, “‘Tuan, ajar kami chara besampi.’” (Luke 11:1) Taja pia, Sampi Apai Kami, ukai kengka sampi ke diterima Petara.a Iya ke amat, Jesus madahka sampi tu nyadika siti chunto sampi ke diterima Petara.

Ba artikel tu

• Nama utai ke ba Sampi Apai Kami?

• Nama reti Sampi Apai Kami?

• Kati ngulang Sampi Apai Kami semina siti chara kena besampi?

• Baka ni chara kitai besampi?

• Sampi bukai ke ba Bup Kudus

Sampi Apai Kami ke ba Matthew 6:9-13, disalin enggau chara ti bebida. Peratika dua iti chunto tu:

Salin Dunya Baru: “‘Apai kami ti ba serega, kudus meh nama Nuan. Datai meh Perintah Nuan. Nyadi meh peneka Nuan ba dunya baka ba serega. Beri kami pemakai ke umbas diempa kami seharitu. Ampunka dosa kami baka kami ke ngampunka orang ke bedosa ngagai kami. Anang nejuka kami alah laban penguji, tang lepaska kami ari Sitan.’”

Bup Kudus Baru: “‘Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega. Beri ngagai kami sehari tu pemakai umbas dipakai kami. Ampun kami penyalah kami, baka kami ke ngampun orang ke salah enggau kami. Lalu anang mai kami ngagai penguji, tang lepaska kami ari penyai.’”

Ajar Jesus sejalai enggau semua ajar Bup Kudus ke bukai. Nyadi, begian bukai dalam Bup Kudus ulih nulung kitai faham agi reti Sampi Apai Kami.

“Apai kami ti ba serega”

Amat ngena ngangauka Petara “Apai kami,” laban Iya ke ngaga kitai lalu meri kitai pengidup.—Isaiah 64:8.

“Kudus meh nama Nuan”

Nama Petara Jehovah, patut dimuliaka sereta dikuduska. Kitai nguduska nama Petara lebuh kitai madahka pasal kualiti sereta peneka Iya.—Masmur 83:18; Isaiah 6:3.

“Datai meh Perintah Nuan”

Perintah Petara ba serega, lalu Raja iya Jesus. Jesus ngasuh kitai besampi, ngambika Perintah tu merintah serata dunya.—Daniel 2:44; Pemandang 11:15.

“Nyadi meh peneka Nuan ba dunya baka ba serega”

Baka serega ke nadai penyai enggau pemati, peneka Jehovah ba dunya, iya nya dekaka mensia idup enggau lantang belama iya enggau likun.—Masmur 37:11, 29.

“Beri kami pemakai ke umbas diempa kami seharitu”

Ba jeman Jesus, ruti nya pemakai utama. Kitai patut ingat, kitai bepanggai ba Penempa kitai nyediaka utai ke diguna kena beridup.—Surat Kereja Rasul 17:24, 25.

“Ampunka dosa kami baka kami ke ngampunka orang ke bedosa ngagai kami.”

Enti nitihka salin asal, dosa mega mai reti “utang.” (Luke 11:4) Semua mensia bedosa lalu begunaka pengampun. Enti kitai diampunka Petara, kitai mega patut ngampunka orang bukai ti bedosa ngagai kitai.—Matthew 6:14, 15.

“Anang nejuka kami alah laban penguji, tang lepaska kami ari Sitan.”

Petara Jehovah enda kala nguji kitai ngereja dosa. (James 1:13) Tang kitai diuji “iya ti jai” ke mega dikumbai “Sitan.” (1 John 5:19; Matthew 4:1-4) Kitai ulih minta bantu ari Jehovah, ngambika kitai ulih mengkang tetap ati ngagai Iya taja pan kitai diuji ngereja utai ti salah.

Jesus nyadika Sampi Apai Kami siti chunto. Laban sebedau Jesus ngajar Sampi Apai Kami, iya bisi jaku tangkan iya nya, “Lebuh kita besampi, anang selalu ngulang leka jaku ti sama.” (Matthew 6:7) Lebuh Jesus madahka chunto sampi tu ba maya ti bukai, iya ngena leka jaku ti bebida.—Luke 11:2-4.

Enti deka besampi, chara ti pemadu manah nya pansutka meh asai ati enggau runding nuan ti bendar.—Masmur 62:8.

Sampi Apai Kami bisi nyediaka chunto ti manah pasal chara kitai besampi ngambika didinga Petara. Peratika baka ni sampi tu sejalai enggau ayat Bup Kudus ke bukai pasal sampi.

• Semina besampi ngagai Petara

  Ayat Bup Kudus: “Seruran meh besampi ngagai Petara, bebendar meh minta iring ari Iya pasal semua utai, sereta seruran beterima kasih ngagai Iya.”—Pilipi 4:6.

  Reti: Sampi kitai patut semina ngagai Petara, ukai ngagai Jesus, Maria tauka saints. Ba pun sampi, kitai bisi nyebut “Apai kami.” Tu nunjukka, kitai semina besampi ngagai Petara Jehovah aja.

• Besampika utai nitihka peneka Petara

  Ayat Bup Kudus: “Enti kitai minta nama-nama utai ti sejalai enggau peneka Iya, Iya ningaka kitai.”—1 John 5:14.

  Reti: Kitai ulih besampika nama-nama utai ke sejalai enggau peneka Petara. Jesus ngajar kitai amat penting nyengkaum peneka Petara dalam Sampi Apai Kami, baka ku iya madah, “nyadi meh peneka Nuan.” Kitai ulih belajar pasal peneka Petara ke dunya sereta mensia nengah pengawa belajarka Bup Kudus.

• Sampi pasal utai ke diguna diri

  Ayat Bup Kudus: ‘Serahka penusah nuan ngagai Jehovah, lalu Iya deka nyaga nuan.’—Masmur 55:22.

  Reti: Petara ibuhka utai ke diguna kitai. Baka Jesus ke nyengkaum utai ke diguna diri ba Sampi Apai Kami, kitai mega ulih besampi minta utai ke diguna kitai ninting hari, iring ke ulih nulung kitai ngaga pemutus ti penting, sukung ke diguna lebuh bisi penanggul sereta minta dosa kitai diampunka.b