“Pengelepas Kita Nyau Semak”!

1. Nama utai ke nyadi ba taun 66? (Peda gambar ba pun pelajar.)

UJI gambarka nuan nya orang Kristian ke diau ba Jerusalem maya taun 66. Mayuh utai udah nyadi. Seiku pemesai Rome ke benama Florus udah ngenchuri 17 talenta duit seling ari sarang reta Rumah Sembiang. Tu ngasuh orang Judah ringat. Sida munuh mayuh soldadu Rome, lalu ngelepaska diri ari dipegai menua Rome. Tang, perintah Rome jampat-jampat malas. Dalam timpuh tiga bulan, 30,000 iku soldadu ke diuluka Cestius Gallus ngelingi Jerusalem. Orang Judah ke ngelaban belalai dalam Rumah Sembiang, tang soldadu Rome datai ba luar Rumah Sembiang, lalu nguji deka tama. Semua orang ke ba dalam menua nya berengkah takut. Baka ni asai ati nuan meda utai tu?

2. Nama patut digaga orang Kristian maya sida meda soldadu Rome ngelingi menua sida, lalu baka ni sida ulih ngereja nya?

² Betaun sebedau nya, Jesus udah nangkan bala murid iya pasal utai ke deka nyadi tu, lalu ngasuh sida: “Lebuh kita meda Jerusalem dikelulung bala soldadu, nya baru kita deka nemu nengeri nya deka dirusak enda lama da agi. Lebuh maya nya, orang ke diau di Judea enda tau enda rari ngagai bukit. Lalu orang ke di nengeri enda tau enda angkat ari nengeri nya, lalu orang ke di menua pesisir enda tau tama ngagai nengeri.” (Luk. 21:20, 21) Baka ni sida ulih nitihka pesan Jesus ke ngasuh sida ninggalka Jerusalem lebuh bala soldadu ngelingi menua nya? Utai ti ngalitka ati nyadi. Enda mukai-mukai, bala soldadu Rome ninggalka Jerusalem! Baka ke dipadah Jesus, serang nya “dikurangka.” (Mat. 24:22) Lebuh bala soldadu nya udah bekejang, nya meh peluang orang Kristian ke tetap ati ngasika Jesus enggau jampat-jampat ngerarika diri ngagai bukit.a (Peda nota kaki.) Udah nya, ba taun 70, bala soldadu Rome ke baru datai baru ngagai Jerusalem. Maya nya, sida ngerusakka menua nya. Tang semua orang ke ngasika pesan Jesus selamat.

3. Nama utai ti sama ke deka diasaika orang Kristian enda lama da agi, lalu nama deka dikerandauka kitai ba pelajar tu?

³ Jaku tangkan enggau pesan Jesus nya mega dituju ngagai kitai kemaya hari tu. Enda lama da agi, penusah ti sama deka nyadi. Jesus ngena utai ke nyadi ba kurun keterubah nerangka utai ke deka nyadi maya “penusah ti besai” berengkah nyadi ngenyit. (Mat. 24:3, 21, 29) Orang Kristian ke tetap ati selamat maya Jerusalem dirusak. Pia mega, “mayuh amat orang” deka selamat lebuh penusah ti besai nyadi di serata dunya. (Bacha Pemandang 7:9, 13, 14.) Nya alai, kitai patut nemu nama utai ti dipadahka Bup Kudus pasal utai ke deka nyadi jemah ila. Nama kebuah? Laban pengidup kitai bepanggai ba penemu nya. Nya alai, aram meh kitai berandauka baka ni utai ke nyadi tu bekaul enggau kitai.

4. Baka ni penusah ti besai deka berengkah?

⁴ Baka ni penusah ti besai deka berengkah? Iya berengkah enggau pengerusak semua pengarap pelesu. Ba Bup Kudus, pengarap pelesu dikumbai “Babilon ti Besai, indai ke semua indu sundal.” (Pem. 17:5-7) Nama kebuah pengarap pelesu dikumbai indu sundal? Laban tuai pengarap sida enda tetap ati ngagai Petara. Sida enggai nyukung Jesus enggau Perintah iya. Tang sida nyukung perintah mensia, lalu enggai nitihka ajar Bup Kudus ngambika bekuasa agi. Sembah sida enda tuchi baka sembah orang ke diiri ngena roh kudus. (2 Kor. 11:2; Jas. 1:27; Pem. 14:4) Tang sapa deka ngemunaska Babilon ti Besai? Jehovah deka ngena “sepuluh iti tanduk” ba “jelu ti mirah-redam” kena “ngereja juluk ati Iya.” “Jelu ti mirah-redam” ngambarka Pertubuhan Bangsa-Bangsa Bersatu (PBB), lalu “sepuluh iti tanduk” ngambarka semua gerempung politik ke nyukung PBB.—Bacha Pemandang 17:3, 16-18.

 5, 6. Nama kebuah kitai nemu ukai semua orang ke megai pengarap pelesu deka dipunaska maya Babilon ti Besai dirusakka?

⁵ Kati semua orang ke enggau pengarap pelesu deka dipunaska maya Babilon ti Besai dipunaska? Enda. Jehovah ngasuh nabi Sekariah nulis pasal utai ke deka nyadi. Maya nya, orang ke bisi enggau pengarap pelesu deka nyebut: “‘Aku ukai nabi. Aku tu orang bumai. Aku udah bumai tanah tu seumur idup.’ Udah nya, enti orang bisi nanya iya, ‘Nama telih ti ba dada nuan nya?’ iya deka nyaut, ‘Aku telih ba rumah pangan aku.’” (Sek. 13:4-6) Indah tuai pengarap deka pepura ngumbai diri nadai pengarap, lalu enggai ngaku bisi enggau pengarap pelesu.

⁶ Nama deka nyadi ngagai nembiak Petara maya nya? Jesus nerangka: ‘Lalu enti penyampau hari nya enda dikurangka, nadai mensia ulih diselamatka. Tang ketegal bala nembiak ke udah dipilih Petara, penyampau hari nya deka dikurangka.’ (Mat. 24:22) Ba kurun keterubah, penusah ti besai ba Jerusalem udah “dikurangka.” Tu meri awak ngagai “bala nembiak ke udah dipilih,” orang Kristian ke diiri ngena roh kudus ngerarika diri. Pia mega, begian keterubah penusah ti besai deka “dikurangka” ketegal “bala nembiak ke udah dipilih.” “Sepuluh iti tanduk” iya nya gerempung politik, enda dikemendar ngemunaska nembiak Petara. Tang pengudah serang nya, deka bisi timpuh pandak ke nadai penusah.

 7, 8. Nama peluang ke deka diasaika kitai pengudah pengarap pelesu dirusakka, lalu baka ni nembiak Petara deka bebida ari orang bukai maya nya?

⁷ Nama deka nyadi pengudah pengarap pelesu dirusakka? Nya meh maya nunjukka nama utai ke bisi ba ati kitai. Maya nya, mayuh mensia deka minta jaga enggau tulung ari “selikap batu ba sebelah bukit,” iya nya gerempung mensia. (Pem. 6:15-17) Tang nembiak Jehovah deka minta jaga ari Iya. Lebuh serang “dikurangka” ba kurun keterubah, nya ukai maya semua orang Judah nukar pengarap masuk Kristian. Tang, nya meh maya sida ke udah nyadi orang Kristian pansut ari Jerusalem baka ke diasuh Jesus. Pia mega enda lama da agi, lebuh serang ngagai Babilon ti Besai “dikurangka,” kitai enda ngarapka mayuh orang deka nukar pengarap masuk Kristian ti bendar. Tang, nya meh peluang ke semua penyembah ti bendar nunjukka pengerindu sida ngagai Jehovah sereta nyukung sida ke diiri ngena roh kudus.—Mat. 25:34-40.

⁸ Kitai enda nemu enggau terang nama utai ke deka nyadi maya timpuh penguji nya. Tang kitai nemu pengidup enda senang, lalu kitai patut ngelengkaka sekeda utai. Ba kurun keterubah, orang Kristian ninggalka rumah sida sereta natka penusah ngambika ulih selamat. (Mrk. 13:15-18) Kitai patut nanya diri empu: ‘Kati aku sanggup ngelengkaka reta aku? Kati aku deka ngereja sebarang utai ke patut ngambika mengkang tetap ati ngagai Jehovah?’ Uji pikirka! Maya nya, semina kitai aja ke nyembah Petara kitai enda ngira nama utai ke nyadi, sama baka nabi Daniel.—Dan. 6:10, 11.

 9, 10. (a) Nama pesan ke deka dipadahka nembiak Petara maya penusah ti besai? (b) Nama deka digaga munsuh nembiak Petara?

⁹ Penusah ti besai ukai maya ngerembaika ‘Berita Manah pasal Perintah Petara.’ Maya ngerembaika berita manah udah abis. Maya nya “pengujung” udah datai! (Mat. 24:14) Nembiak Petara enggau berani madahka pesan berat pasal pengujung ke deka ninggang semua orang. Pesan tu engka madahka dunya Sitan ke penuh enggau penyai deka dipunaska. Bup Kudus mandingka pesan tu baka tekang ujan batu: ‘Tekang ujan batu ti besai, pemerat sigi-sigi kira 50 kilogram, labuh ari langit lalu ninggang mensia. Mensia lalu nyumpah Petara ketegal penusah laban ujan batu nya, laban ujan batu nya amat balat.’—Pem. 16:21.

¹⁰ Munsuh kitai bisi ninga pesan berat tu. Jehovah ngasuh nabi Esekiel nerangka baka ni seraban mensia ke dikumbai Bup Kudus Gok ari Magok deka ngelaban: ‘Tu utai ti disebut Petara Jehovah ngagai Gok: “Lebuh maya nya ila, nuan deka berengkah berunding begagaka pelan ti jai. Nuan deka mutuska runding deka nyerang sebengkah menua ti nadai daya, endur alai orang ke diau dalam pemaik enggau pengelikun dalam nengeri ti enda bekuta, lalu nadai utai nyaga. Nuan deka ngerumpak lalu ngerampas utai ari orang ke diau dalam nengeri ti udah dirusak nyadi tembawai dulu agi ari nya. Sida udah digempuruka ari mayuh bengkah menua, lalu diatu sida bisi jelu tupi enggau reta tengkira, lalu diau ba endur alai orang ke ari mayuh bengkah bansa betemu.”’ (Esk. 38:10-12) Nembiak Petara deka bebida ari orang bukai. Sida baka ke “diau ba endur alai orang ke ari mayuh bengkah bansa betemu.” Gok tauka seraban mensia enda ulih nagang sida empu. Sida keran deka nyerang nembiak Jehovah ke diiri ngena roh kudus sereta orang ke nyukung sida.

11. (a) Nama patut dikingatka kitai pasal tusun utai ke deka nyadi maya penusah ti besai? (b) Baka ni gaya orang lebuh sida meda tanda nya?

¹¹ Nama deka nyadi udah nya? Bup Kudus nadai madahka kitai enggau terang tusun utai ke deka nyadi, tang sekeda utai engka deka nyadi serentak. Pasal pengujung dunya tu, Jesus madahka: “Tanda deka pegari ba mata hari, ba bulan enggau ba bintang, lalu semua bansa di dunya deka tusah sereta irau ninga pemalat munyi segum tasik enggau pangka gelumbang. Orang deka luput laban takut, irauka utai ti deka ninggang dunya, laban kuasa ti di langit deka begegar. Udah nya baru sida deka meda Anak Mensia datai dalam remang ngena kuasa enggau mulia ti besai.” (Luk. 21:25-27; bacha Mark 13:24-26.) Kati tu nyengkaum tanda enggau utai ngenakutka ti deka nyadi ba langit? Kitai patut nganti. Taja pia, kitai nemu lebuh munsuh Petara meda tanda nya, sida deka irau sereta takut.

12, 13. (a) Nama deka nyadi lebuh Jesus datai “ngena kuasa enggau mulia ti besai”? (b) Nama deka digaga nembiak Petara maya nya?

¹² Nama deka nyadi lebuh Jesus datai “ngena kuasa enggau mulia ti besai”? Iya deka meri upah ngagai sida ke tetap ati, lalu ngukum sida ke enda tetap ati. (Mat. 24:46, 47, 50, 51; 25:19, 28-30) Jesus ngena siti sempama nerangka utai tu enggau silik agi. Ku iya: ‘Lebuh Anak Mensia datai dalam mulia iya, lalu semua melikat datai enggau iya, nya baru iya deka duduk ba kerusi diraja iya ti bemulia. Semua bansa deka digempuruka di mua iya, lalu iya deka nyeraraka sida ari pangan diri, baka pengibun bedus ke nyeraraka bedus ari kambin, lalu iya deka ngengkahka orang ke lurus muak ari kanan iya, lalu sida ti bukai, muak ari kiba iya.” (Mat. 25:31-33) Nama deka nyadi ngagai bedus enggau kambin? Sida deka diakim. Kambin tauka orang ke enda tetap ati, “deka diukum belama iya.” Tang, bedus tauka orang ke tetap ati, deka nerima pengidup belama iya.—Mat. 25:46.

¹³ Nama deka digaga sida ke enda tetap ati lebuh sida nemu sida deka dipunaska? Sida “deka ngulit.” (Mat. 24:30) Tang nama deka digaga orang ke diiri ngena roh kudus enggau orang ke nyukung sida? Sida deka ngereja utai ke dipadah Jesus: “Lebuh utai tu belabuh nyadi, bediri lalu angkatka pala kita, laban pengelepas kita nyau semak.”—Luk. 21:28.

14, 15. Nama pengawa ngempuru ke deka nyadi pengudah Gok ari Magok berengkah nyerang, lalu baka ni tu deka nyadi?

¹⁴ Nama deka nyadi pengudah Gok ari Magok berengkah nyerang nembiak Petara? Bup Kudus madahka Anak Mensia ‘deka ngasuh bala melikat Iya bejalai, lalu sida deka ngempuruka semua orang ke udah dipilih Petara ari semua sukut dunya.’ (Mrk. 13:27; Mat. 24:31) Pengawa ngempuruka tu ukai maya orang Kristian ke diiri ngena roh kudus keterubah iya dipilih. Lalu tu mega ukai maya sida ke diiri ngena roh kudus ke agi ba dunya nerima chop ti penudi. (Mat. 13:37, 38) Chop ti penudi tu nyadi maya penusah ti besai deka berengkah. (Pem. 7:1-4) Nyadi, nama pengawa ngempuru tu? Tu meh maya sida ke diiri ngena roh kudus ke agi ba dunya deka nerima upah sida, lalu niki ke serega. (1 Tes. 4:15-17; Pem. 14:1) Utai tu deka nyadi enda lama pengudah Gok ari Magok berengkah nyerang. (Esk. 38:11) Udah nya, baka ke dipadah Jesus, “orang ke lurus deka manchar baka mata hari dalam Perintah Apai sida.”—Mat. 13:43.b (Peda nota kaki.)

¹⁵ Kati tu nunjukka orang ke diiri ngena roh kudus deka diangkat idup-idup ke serega? Mayuh orang ba gerija pechaya, orang Kristian deka niki ke serega ngena batang tubuh. Sida mega ngumbai sida ulih meda Jesus datai baru, lalu merintah dunya. Taja pia, Bup Kudus enggau terang nunjukka Jesus enda dipeda lebuh iya datai baru: “Tanda Anak Mensia deka pegari di langit,” lalu Jesus deka datai “ba atas remang ari serega.” (Mat. 24:30) Bup Kudus mega madahka ‘isi enggau darah enda ulih bempu Perintah Petara.’ Nya alai, sida ke deka niki ke serega patut “diubah, tekala nya, dalam sekejap mata, lebuh terumpit ti penudi disepu.”c (Peda nota kaki.) (Bacha 1 Korint 15:50-53.) Kitai enda ngena leka jaku diangkat idup-idup ke serega ditu kena nerangka utai tu laban iya bekaul enggau ajar pelesu ari gerija. Taja pia, sida ke diiri ngena roh kudus ke agi ba dunya deka digempuruka enggau jampat.

16, 17. Nama patut nyadi dulu sebedau pengerami tikah Anak Domba?

¹⁶ Lebuh kesemua 144,000 iku sida ke diiri ngena roh kudus udah ke serega, pengawa ke penudi iya nyediaka pengerami tikah Anak Domba deka berengkah. (Pem. 19:9) Tang, bisi utai bukai patut nyadi dulu sebedau pengerami nya. Kingatka, Gok deka nyerang nembiak Petara maya sekeda ari sida ke diiri ngena roh kudus agi ba dunya. (Esk. 38:16) Nama deka digaga nembiak Petara? Sida deka nitihka jaku tu: ‘Perang tu ukai perang kita. Belatur aja, lalu diau jenuh nengkilaka Jehovah menang beperang ngarika kita. . . . Anang takut tauka tusah ati.’ (2 Ban. 20:17) Enda lama pengudah perang ari Gok berengkah, semua sida ke diiri ngena roh kudus ke agi ba dunya deka niki ke serega. Udah nya, Pemandang 17:14 madahka kitai nama deka digaga sida ke ba serega bekaul enggau serang ari Gok. Bala munsuh nembiak Petara ‘deka beperang ngelaban Anak Domba, lalu Anak Domba deka ngalahka sida, laban iya Tuan ari atas semua tuan, Raja ari atas semua raja, lalu orang ke enggau iya endang udah dikangauka lalu dipilih sereta tetap ati.’ Nya alai, Jesus enggau 144,000 iku raja ke udah dipilih ke serega, deka nyelamatka nembiak Petara ba dunya.

¹⁷ Pengawa nyelamatka tu mai ngagai perang Armagedon, ke deka ngemuliaka nama Jehovah ti kudus. (Pem. 16:16) Semua sida ke diakim nyadi kambin tauka enda tetap ati, deka dipunaska. Udah nya, nadai agi penyai ba dunya, lalu “mayuh amat orang” deka selamat ari perang Armagedon. Pengujung iya, utai ti ngerinduka ati ba ujung bup Pemandang deka nyadi, iya nya pengerami tikah Anak Domba! (Pem. 21:1-4)d (Peda nota kaki.) Semua sida ke selamat ba dunya deka diterima Petara, lalu ngasaika pengerindu enggau pengerah ati Iya ti besai. Kitai enggau gagit ati nganti maya nya datai. Naka meh pemanah pengerami tikah nya!—Bacha 2 Peter 3:13.

18. Ketegal utai ti ngagitka ati deka nyadi enda lama da agi, nama patut digaga kitai?

¹⁸ Ketegal utai ti ngagitka ati tu deka nyadi enda lama da agi, nama patut digaga tiap iku kitai diatu? Jehovah ngasuh rasul Peter nulis: ‘Nya alai laban semua utai deka dirusak magang ngena chara nya, baka ni ku gaya kita patut idup? Kita patut diau kudus sereta nangika Petara, nganti sereta minta Hari Petara datai enggau jampat. . . . Nya alai, menyadi, lebuh kita nganti semua utai nya, kita enda tau enda enggau naka ulih diau bebaik enggau Iya, nadai bepenyalah, nadai penimpang.’ (2 Pet. 3:11, 12, 14) Aram meh kitai enggau naka ulih ngetanka sembah kitai ti tuchi, nadai kaul enggau pengarap pelesu, lalu nyukung Raja Pemaik, Jesus Kristus.