“Negapka Pengarap Kita ti Pemadu Kudus”

1, 2. Nama projek ti digaga nuan, lalu nama kebuah kualiti kereja nuan patut dikemeratka?

NUAN bebendar ngaga siti projek. Projek tu udah dipunka nuan, lalu deka digaga nyentuk ke dudi hari. Taja pan pengawa nya engka tusah, nuan puas ati. Nuan enggai lemi semengat tauka ilap, laban kualiti kereja nuan bekaul enggau pengidup nuan ari diatu nyentuk ke jemah ila. Nama kebuah? Laban projek ke digaga nya, nuan empu!

² Rasul Jude ngasuh kitai beberatka pengawa ngemansangka diri empu. Iya meransang kitai ‘meruan dalam pengerindu Petara,’ laban nya ulih “negapka pengarap” kitai “ti pemadu kudus.” (Jude 20, 21) Nama ulih digaga nuan kena ngemansangka diri, ngeringka pengarap nuan ngambika meruan dalam pengerindu Petara? Aram kitai beratika tiga pekara ti patut dikemansangka nuan.

3-5. (a) Baka ni Sitan deka nesatka runding nuan pasal ukum Jehovah? (b)  Nama ulih dipeda kitai ari ukum Jehovah, lalu nama patut digaga kitai? Terangka.

³ Pekara ti keterubah, kitai patut ngeringka pengarap kitai ba ukum Petara. Ba bup tu, nuan udah belajarka sekeda ukum Jehovah pasal ulah. Nama runding nuan pasal ukum Iya? Sitan deka nuan ngumbai ukum enggau ajar ari Jehovah nya nyekat sereta nekan nuan. Iya udah ngena chara tu kenyau ari Kebun Eden. (Pemungkal 3:1-6) Kati Sitan ulih nipu nuan ngena chara nya? Tu bepanggai ba nuan.

⁴ Chunto: Lebuh nuan bejalai ba siti taman, nuan tepedaka siti endur ke enda tau dilawa. Iya diempang ngena dinding ti tinggi sereta tegap. Rampa menua ba belakang dinding nya manah dipeda sereta narit ati. Nuan engka ngumbai dinding nya ngachau nuan. Tang, lebuh nuan nyeling ari dinding nya, nuan tepedaka seiku singa ti mangah benung ngiga utai ke diempa! Diatu nuan nemu tuju dinding nya digaga​—kena nyaga. Pia mega, nuan benung diperatika Sitan. Bup Kudus nangkan: “Disiplin diri empu sereta bejaga! Sitan ti munsuh kita bejalai segau-segau baka singa ti negung, begigaka orang ke deka diempa iya.”​—1 Peter 5:8.

⁵ Ketegal Jehovah enggai kitai ditesatka Sitan, Iya ngaga ukum kena nyaga kitai ari “akal” Sitan. (Epesus 6:11) Nya alai, maya kitai berundingka ukum Petara enggau dalam, kitai ulih meda pengerindu Iya. Enggau tu, ukum Petara nya ulih nyaga sereta meri pengelantang. Rasul James nulis: “Orang ke merening ngagai adat ti pemadu badas, adat pengelepas, lalu majak ngasika adat nya . . . deka diberekatka dalam semua utai ti dikereja iya.”​—James 1:25.

6. Nama chara ti pemadu manah kena negapka pengarap ba ukum enggau ajar Petara? Beri chunto.

⁶ Ngasika pesan Jehovah nya chara ti pemadu manah kena negapka pengarap diri ba Jehovah enggau ukum Iya. Chunto, “adat Kristus” nyengkaum pesan Jesus ke ngasuh ngajar orang bukai “semua pesan ti udah diberi” iya. (Galatia 6:2; Matthew 28:19, 20) Orang Kristian mega beberatka pengawa begempuru sereta meransang pangan diri. (Hebrew 10:24, 25) Pesan Jehovah mega nyengkaum seruran besampi ari ati ngagai Iya. (Matthew 6:5-8; 1 Tesalonika 5:17) Enti kitai ngasika pesan nya, kitai ulih meda enggau terang ukum nya nyaga kitai, mai pengelantang sereta ngemuaska ati. Lebuh nuan berundingka enggau dalam penguntung ke diulih ketegal ngasika ukum Petara, pengarap nuan deka tegap agi.

7, 8. Baka ni Bup Kudus meransang orang ke irauka diri enda ulih ngasika ukum Jehovah?

⁷ Nyau kelama, sekeda orang irauka diri enda ulih ngasika ukum Jehovah. Enti nuan bisi ngasaika nya, kingatka jaku tu: ‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita. Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang. Pemenang tentu udah datai ngagai kita baka gelumbang ti ngalun ngagai tebing.’ (Isaiah 48:17, 18) Kala nuan berundingka enggau dalam baka ni jaku tu ulih meransang?

⁸ Ditu Jehovah ngingatka kitai pasal penguntung enti kitai ngasika Iya. Iya besemaya deka meri dua berekat enti kitai ngasika Iya. Kesatu, kitai deka bulih berekat tauka pengelikun baka sungai ti enda nemu langkang​—enda nemu abis, enda putus. Kedua, kitai deka menang, reti iya kitai deka ngasaika pengelurus baka gelumbang. Enti nuan bediri ba pantai sereta beratika gelumbang, kati gelumbang nya nemu ngetu ngalun? Enda. Pia mega, enti kitai mengkang tetap ati ngagai Jehovah, Iya deka nulung kitai mujur! (Bacha Masmur 55:22.) Berekat Jehovah nya tentu negapka pengarap nuan ba Jehovah enggau ukum Iya.

9, 10. (a) Nama kebuah orang Kristian patut bisi juluk ati ngeringka kaul enggau Jehovah? (b) Baka ni kaul ti manah enggau Jehovah ulih ngenataika pengelantang?

⁹ Pekara ti kedua kena ngemansangka diri empu dipadahka ba ayat tu: “Mansang ngagai ajar ke orang ti besai tuai.” (Hebrew 6:1) Besai tuai, reti iya mansang ba pengarap. Tu juluk ati ti patut dikemisi orang Kristian, laban iya ulih dijapai. Pia mega, orang Kristian ulih lantang agi ati nyembah Jehovah enti sida mansang ba pengarap. Nama kebuah?

¹⁰ Orang Kristian ke bisi kaul ti manah enggau Jehovah bisi runding ti sama enggau Iya. (John 4:23) Paul nulis: “Orang ke idup nitihka peneka mensia berundingka utai ti dikinginka mensia.” (Rome 8:5) Pengingin mensia ngenataika mimit pengelantang, laban pengingin tu ngasuh orang berundingka diri empu aja, enda berunding panjai sereta angkunka reta. Orang ke bisi runding ti sama enggau Jehovah lantang ati laban sida beberatka Iya, Petara ti gaga ati. Orang nya mega keran deka ngerinduka ati Jehovah sereta meruan lantang ati, taja pan kena penguji. Nama kebuah? Penguji nya mega peluang kena nunjukka Sitan nya pemula, lalu nambahka penetap ati kitai ke Jehovah sereta ngelantangka ati Iya.​—Jaku Dalam 27:11; bacha James 1:2, 3.

11, 12. (a) Nama reti leka jaku ‘matih’ ke dipadah Paul? (b) Nama latih ti patut digaga anak mit tauka orang ke enggau sukan gimnastik?

¹¹ Tegap enggau mansang ba pengarap begunaka latih. Peratika ayat tu: “Asi kering nya ke orang ke besai tuai, ke udah matihka diri ngelala bida entara utai ti badas enggau utai ti jai.” (Hebrew 5:14) Leka jaku “matih” dalam Gerika bisi kaul enggau sukan gimnastik ba kurun keterubah. Nya alai, leka jaku tu ulih disalin nyadi ‘dilatih baka orang ke enggau sukan gimnastik.’ Diatu, peratika chara latih tu digaga.

¹² Lebuh baru ada, tubuh kitai bedau dilatih. Chunto, anak mit ke baru ada enda ulih tetagangka kaki enggau jari iya ke engkebut. Kekadang, iya tepaluka diri empu. Tang lebuh iya mansang besai, iya belubah-lubah belajar chara ngena kaki enggau jari iya. Keterubah, iya meragau, bejalai, udah nya belanda.a Baka ni orang ke enggau sukan gimnastik? Iya tentu enda ulih landik enti enda bebendar belatih. Nitihka Bup Kudus, ‘matihka tubuh beguna, tang matihka diri nangika Petara lebih agi beguna.’​—1 Timoti 4:8.

13. Baka ni kitai ulih matih diri?

¹³ Ba bup tu, kitai udah belajarka chara dikena matih diri ngambika ulih meruan tetap ati ngagai Jehovah nyadi orang ke tegap sereta mansang ba pengarap. Sebedau ngaga pemutus ba pengidup ninting hari, nuan patut meratika ukum enggau ajar ari Petara sereta besampi minta iring ari Iya. Sebedau ngaga pemutus, tanya diri empu: ‘Nama ukum tauka ajar Bup Kudus ke bekaul enggau pekara tu? Baka ni aku ulih ngena iya? Nama pemutus ti ngerinduka ati Jehovah?’ (Bacha Jaku Dalam 3:5, 6; James 1:5.) Tiap iti pemutus ke digaga nuan sejalai enggau Bup Kudus deka nulung nuan matih diri. Latih tu deka nulung nuan meruan tegap sereta mansang ba pengarap.

14. Nama diguna kitai ngambika mansang ba pengarap, tang nama patut dikingatka kitai?

¹⁴ Ngemansangka diri ba pengarap nadai sekat. Tu bepanggai ba pemakai rohani. Paul madah: “Asi kering nya ke orang ke besai tuai.” Asi kering, reti iya penemu-dalam ari Bup Kudus. Nya alai, kitai patut ngulihka penemu-dalam nya ngambika mansang ba pengarap. Bup Kudus madahka: “Penemu-dalam nya utai ti pemadu beguna.” Nyadi, kitai patut bisi ati deka ngulihka penemu ti bendar pasal Jehovah. (Jaku Dalam 4:5-7; 1 Peter 2:2) Kingatka, kitai patut bejimat ngambika enda nyadi sumbung. Kitai patut seruran meresa diri empu ngambika penyumbung tauka pengelemi diri enda tumbuh ba ati kitai. Paul nulis: “Peresa diri empu, kena nentuka kita amat idup ngena pengarap tauka enda.”​—2 Korint 13:5.

15. Nama kebuah pengerindu beguna kena mansang ba pengarap?

¹⁵ Projek ngaga rumah engka udah tembu, tang bisi kereja bukai agi patut digaga. Rumah nya patut dijaga enggau diadu. Kekadang, kitai nambahka bilik baru maya begunaka iya. Nama patut digaga kitai ngambika mansang sereta meruan ba pengarap? Kitai patut bisi pengerindu. Kitai patut ngemansangka pengerindu kitai ngagai Jehovah enggau bala menyadi Kristian ke sama pengarap. Enti kitai nadai pengerindu, semua penemu enggau utai ti dikereja kitai baka tin kusung ke inggar bekeranding, tang nadai guna. (1 Korint 13:1-3) Ketegal pengerindu, kitai ulih tegap sereta mansang ba pengarap.

16. Nama bansa runding ti dikedeka Sitan, lalu nama disediaka Jehovah kena nyaga kitai?

¹⁶ Aram kitai beratika siti agi pekara ke ulih dikena ngemansangka diri. Ngambika ulih nyadi murid Jesus ti bendar, nuan patut nyaga chara nuan berunding. Sitan, pemerintah dunya tu, bisi pengelandik ngasuh orang bisi runding ti salah, berundingka utai ti enda ngemansang, kakang ati sereta lemi semengat. (Epesus 2:2) Runding ke baka nya ulih ngemediska orang Kristian laban iya baka indu sampuk ke ulih ngerusak rumah kayu. Jehovah nyediaka utai kena nyaga kitai​—berekat.

17. Baka ni Bup Kudus ngambarka guna berekat?

¹⁷ Bup Kudus madahka pasal senyata ari Petara ke ulih dikena kitai ngelaban Sitan enggau dunya tu. Siti ari senyata nya selapuk kebal, ke ngambarka pengadang tauka berekat ari Jehovah. (1 Tesalonika 5:8) Lebuh jeman Bible, soldadu ke beperang nemu diri enda ulih betan lama ba perang, enti iya nadai selapuk kebal. Selapuk kebal tu digaga ari besi tauka kulit jelu ti tebal, lalu bisi lapik tauka selap ti lembut ari dalam. Baka selapuk kebal ke ulih nyaga pala, berekat ulih nyaga runding kitai.

18, 19. Baka ni Jesus nyadi teladan pasal berundingka berekat ari Jehovah, lalu baka ni kitai ulih neladan iya?

¹⁸ Jesus nyadi teladan ti manah laban iya selalu berundingka berekat ari Jehovah. Kingatka, ba malam ke penudi iya ba dunya tu, iya napi mayuh pemerinsa. Seiku ari murid iya nyual iya ketegal duit. Seiku agi nyangkal diri ngelala iya. Iya ke bukai rari ninggalka iya. Orang ke sama bansa enggau iya ngelaban iya. Sida ngasuh soldadu Rome merinsa lalu munuh iya. Penguji ke diasaika Jesus jauh besai agi ari penguji ke diasaika kitai. Tang, nama nulung iya betan? Hebrew 12:2 madah: ‘Iya enda malu natka diri [mati ba tiang] ketegal pengaga ti deka diasaika iya, lalu diatu iya duduk muak ari kanan kerusi diraja Petara.’ Jesus selalu berundingka “pengaga ti deka diasaika iya.”

¹⁹ Nama pengaga ti deka diasaika Jesus? Iya nemu enti iya tan napi penguji, iya ulih nulung nguduska nama Jehovah sereta nunjukka Sitan nya pemula. Jesus mega nemu iya deka bulih mayuh berekat ari Jehovah enti iya tetap ati​—iya nemu enda lama da agi iya deka begulai baru enggau Apai iya. Jesus terus berundingka berekat tu maya iya diperinsa. Kitai mega patut baka nya. Nama pengaga ti deka diasaika kitai? Jehovah madah genap iku kitai bisi peluang nguduska nama Iya sereta nunjukka Sitan nya pemula. Nya alai, kitai patut nyukung Jehovah nyadi Pemerintah kitai sereta terus meruan dalam pengerindu Iya, enda ngira nama penguji ti nuntung kitai.

20. Nama ulih nulung kitai ngambika bisi runding ti manah?

²⁰ Jehovah ukai semina deka merekat nembiak Iya ke tetap ati, tang Iya mega keran deka merekat sida. (Isaiah 30:18; bacha Malaki 3:10.) Iya gaga ati merekat nembiak Iya ke bisi pengingin ti sejalai enggau peneka Iya. (Masmur 37:4) Nya alai, terus berundingka berekat ti deka diasaika nuan. Anang ngembuan runding ti salah, kamah sereta enda lurus ke bisi ba dunya Sitan tu. Enti nuan ngasaika runding dunya tu ngelimpangka runding tauka ati nuan, besampi meh minta ‘pemaik Petara, ti ngelui peragam mensia.’ Pemaik ke diberi Petara deka nyaga ati enggau runding nuan.​—Pilipi 4:6, 7.

21, 22. (a) Nama berekat ti nganti “mayuh amat orang”? (b) Ni bagi berekat ti ngerinduka ati nuan, lalu nama juluk ati nuan?

²¹ Kati nuan nemu berekat ke deka diasaika nuan? Enti nuan nya ari “mayuh amat orang” ke deka “pansut ari penusah ti besai,” pikirka pengidup ke deka diterima nuan jemah ila. (Pemandang 7:9, 14) Ba dunya ti penuh enggau penusah tu, nadai seiku ari kitai ulih rari ari kena tekan Sitan. Tang, enda lama agi Sitan enggau bala antu iya deka dibuai! Enggau tu, kitai ulih lantang ati. Dunya tu deka berubah nyadi Paradais maya dipegai Jesus enggau 144,000 iku orang ke sama merintah enggau iya! Pikirka pengaga ati kitai maya penyakit deka lenyau, orang ke udah mati deka diidupka baru, lalu kitai ulih idup sejalai nitihka tuju asal Petara! Kitai mega deka nyadi sempurna sereta selalu bulih berekat ti manah, baka ke disemaya ba Rome 8:21​—‘bulih pengelepas ti bemulia ti endang enggi bala anak Petara.’

²² Jehovah deka nuan meruan bulih pengelepas. Tang, tu semina bepanggai ba sekalika nuan ngasika Jehovah tauka enda. Nya alai, nguji enggau naka ulih ngasika Jehovah ninting hari. Terus negapka pengarap nuan ti pemadu kudus ngambika nuan meruan dalam pengerindu Petara belama iya!