Ngena Kuasa Dilah enggau Manah

1, 2. Nama kebuah Bup Kudus ngumbai penau bejaku nya baka api?

KENA taun 1871, api berengkah nyadi ba utan Wisconsin, di Amerika Serikat. Api jampat nyerarai, lalu nganguska kira-kira dua biliun pun kayu. Lebih 1,200 iku orang mati. Iya ke bendar, mayuh agi orang mati ba penusah angus nya ari penusah angus ke bukai di Amerika Serikat. Perechik api ari kerita api ke mansa utan nya udah ngepunka api ti besai nya. Tu ngingatka kitai pasal siti ayat Bup Kudus: “Peda kita utan ti besai. Iya ulih diselup ngena api ti mit lalu angus!” (Jas. 3:5) Nama kebuah penulis Bup Kudus James nyebut baka tu?

² Iya nerangka: “Dilah nya api.” (Jas. 3:6) “Dilah” reti iya penau tauka pengelandik kitai bejaku. Lalu baka api, utai ti disebut kitai ulih mai mayuh penusah. Jaku kitai mega ulih meransang tauka ngenusahka orang bukai. Indah Bup Kudus madah ngagai kitai, utai ti disebut kitai tau ngidup tauka ngerusak nyawa sida. (J-lam. 18:21) Tang, kati reti nya kitai enda tau nyebut nama-nama utai ketegal enggai ke kitai engka nyebut utai ti salah? Tentu enda. Kitai tentu enda ngetu ngena api ketegal kitai takut betu. Tang, kitai bejimat lebuh kitai ngena iya. Chunto, kitai ulih ngena api manduk pemakai, ngulihka pengangat, sereta ngulihka penampak. Pia mega, enti kitai bejimat bejaku, kitai ulih ngena penau tu bebasaka Jehovah sereta meri penguntung ngagai orang bukai.—Mas. 19:14.

 3. Nama tiga iti chara ke ulih nulung kitai meransang orang bukai lebuh kitai bejaku?

³ Jehovah meri kitai penau kena madahka utai ti dirunding sereta diasai kitai ngagai orang bukai, sekalika ngena jaku tauka ngena jari kitai. Nya alai, baka ni kitai ulih ngena pemeri ti manah tu meransang orang bukai? (Bacha James 3:9, 10.) Kitai patut nemu ni maya patut bejaku, nama utai ti patut disebut sereta baka ni chara nyebut iya.

 4. Ni maya kitai patut enda bemunyi?

⁴ Kekadang nya manah enti enda bejaku. Bup Kudus madahka, bisi “maya enda bemunyi.” (P-jar. 3:7) Chunto, kitai enda bemunyi lebuh orang bukai bejaku kena nunjukka kitai bebasaka sida. (Jop 6:24) Kitai mega enda bejaku pasal utai ti dipelalai tauka utai ti enda patut ditemu orang. (J-lam. 20:19) Lalu enti orang bisi ngemediska ati kitai, endang manah enti kitai sabar sereta enda engkeretik.—Mas. 4:4.

 5. Baka ni kitai ulih nunjukka diri beterima kasih ngagai Jehovah ke udah meri kitai penau bejaku?

⁵ Tang bisi mega maya patut bejaku. (P-jar. 3:7) Bisi maya muji Jehovah, meransang orang bukai, madahka asai ati diri sereta madahka utai ti diguna diri ngagai orang bukai. (Mas. 51:15) Lalu enti kitai ngena penau kitai bejaku ba maya ti patut, kitai nunjukka diri beterima kasih ngagai Jehovah ke pemeri tu. Pia mega, lebuh kawan kitai meri hadiah ti manah, kitai deka ngena hadiah nya enggau chara ti pemadu manah.

 6. Nama kebuah nya beguna milih maya ti ngena endur bejaku?

⁶ Nama kebuah nya beguna milih maya ti ngena endur bejaku? Jaku-Dalam 25:11 madahka: “Penemu ti terang disebut sebaka enggau emas ti disangkumka enggau pirak.” Emas endang utai ti manah, tang iya engka manah agi enti disengkaum enggau perak. Pia mega, kitai engka bisi utai manah ti deka dipadahka ngagai orang bukai. Tang enti kitai milih maya ti ngena endur bejaku, kitai ulih nulung orang nya enggau mayuh agi. Baka ni kitai ulih ngereja tu?

7, 8. Baka ni bala menyadi kitai ba menua Jipun neladan Jesus?

⁷ Enti kitai bejaku ba maya ti salah, orang engka enda meretika tauka enggai nerima utai ti disebut kitai. (Bacha Jaku-Dalam 15:23.) Chunto, kena bulan Mac 2011, tanah berenyang enggau tsunami udah ngerusakka mayuh nengeri ba timur menua Jipun. Lebih ari 15,000 iku orang udah mati. Mayuh ari bala Saksi-Saksi Jehovah udah lenyau diri sebilik sereta bala kawan. Taja pia, sida deka ngena Bup Kudus nulung orang bukai ke napi penusah ti sama. Tang sida nemu mayuh ari orang nya megai pengarap Buddha, lalu nemu mimit aja pasal Bup Kudus. Ari ke madah ngagai orang pasal peluang pengangkat ari mati, bala menyadi Kristian kitai ngelantangka ati sida sereta nerangka kebuah penusah besai nya nyadi ba orang ke manah.

⁸ Bala menyadi Kristian kitai nya neladan Jesus. Iya nemu ni maya enda bemunyi. Iya mega nemu ni maya patut bejaku. (Jhn. 18:33-37; 19:8-11) Lalu iya mega nganti maya ti ngena, alai iya ngajar bala murid sekeda utai. (Jhn. 16:12) Bala menyadi ba menua Jipun nganti maya ti ngena alai madah ngagai orang bukai pasal peluang pengangkat ari mati. Dua setengah taun pengudah tsunami, sida meri orang surat mit Ulih Orang ke Udah Mati Idup Baru? Mayuh orang nerima surat mit nya, lalu berasai lantang ati enggau utai ti dibacha sida. Kitai mega patut berundingka pasal adat enggau utai ti dipechaya orang ba kandang endur kitai diau, ngambika kitai ulih bejaku enggau sida ba maya ti ngena.

 9. Nama agi utai bukai ke ngasuh kitai patut nganti maya ti ngena endur bejaku?

⁹ Nama agi utai bukai ke ngasuh kitai patut nganti maya ti ngena endur bejaku? Engka bisi orang nyebut utai ti ngemediska ati kitai. Ari ke terus nyaut sereta nyebut utai ti enda patut, manah agi kitai berunding dulu sebedau bejaku: ‘Kati iya sengaja nyebut utai nya? Kati aku patut bejaku enggau iya pasal utai ti disebut iya?’ Engka manah agi enti enda ibuh nyebut nama-nama utai. Tang enti bisi kebuah ti manah deka bejaku enggau iya, kitai patut nganti ati diri udah chelap. (Bacha Jaku-Dalam 15:28.) Tauka kitai engka deka meransang bala diri sebilik ke ukai Saksi ngelala Jehovah. Kitai patut sabar, berunding manah pasal utai ti deka disebut kitai, lalu ngiga maya ti ngena alai sida deka agi ninga.

10. (a) Nama kebuah kitai patut bejimat milih utai ti deka disebut kitai? (b) Chara bejaku ke baka ni patut diseliahka kitai?

¹⁰ Utai ti disebut kitai ulih ngasuh orang bukai nyamai ati tauka pedis ati. (Bacha Jaku-Dalam 12:18.) Mayuh orang ba dunia Sitan ngena “jaku ti jai” ke baka “laja” tauka “pedang” ketegal sida deka ngemediska ati sereta ngenusahka ati orang bukai. (Mas. 64:3) Mayuh orang belajar bejaku baka tu ari cherita wayang tauka cherita ba TV ke dipeda sida. Tang, orang Kristian enda nyebut sebarang utai ti kasar sereta enda siru, tauka nyebut iya ngena jaku gagai. Ngena jaku gagai nya manah sereta ulih ngasuh utai ti disebut kitai ngerinduka ati. Tang kitai enda patut ngena jaku sindir ti jai, iya nya, nyebut utai ke ulih ngemaluka tauka ngeleseka orang ketegal deka ngasuh orang bukai ketawa. Bup Kudus enda ngasuh orang Kristian ngena jaku ti jai. Bup Kudus mega madahka: “Anang mansutka jaku ti jai, tang semina nyebut jaku ti manah kena ngemansangka pengarap orang, ba maya ti patut, ngambika jaku nya meri berekat ngagai orang ke ninga.”—Eph. 4:29, 31.

11. Nama ulih nulung kitai milih leka jaku ti ngena?

¹¹ Jesus madahka “mulut kita nyebut utai ti ngemenuhka ati kita.” (Mat. 12:34) Reti nya utai ti disebut kitai ulih nunjukka nama utai ti amat diasaika kitai. Nya alai, enti kitai rinduka orang sereta amat ibuhka sida, kitai deka nyebut leka jaku ti ngena ngagai sida. Utai ti disebut kitai deka manah agi sereta meransang.

12. Nama chara bukai ke ulih nulung kitai milih leka jaku ti ngena?

¹² Endang enda senang ngiga leka jaku ti ngena ke deka disebut. Taja pan Raja Solomon bepenemu-dalam, iya “belajarka jaku-dalam, lalu mansik pengamat jaku nya” ngambika utai ti ditulis iya betul sereta ngenyamaika ati. (P-jar. 12:9, 10) Nama ulih nulung kitai nemu utai ti patut disebut? Kitai ulih meda dalam Bup Kudus enggau litaricha kitai kena nemu chara baru madahka runding diri. Kitai ulih belajarka reti siti-siti leka jaku ke enda dimeretika kitai. Kitai mega ulih belajar ari teladan Jesus ngambika nemu chara bejaku ke ulih meransang orang bukai. Iya amat nemu utai ti patut disebut laban Jehovah ngajar iya “utai ti patut disebut, ngambika [iya] ulih ngeringka orang ke lelak.” (Isa. 50:4) Kitai mega patut berundingka baka ni jaku kitai bisi kaul enggau orang bukai. (Jas. 1:19) Kitai ulih nanya diri empu: ‘Enti aku nyebut baka tu, kati iya ulih meretika utai ti deka dipadah aku ngagai iya? Baka ni asai ati iya?’

13. Nama kebuah kitai patut bejaku ngena chara ti senang dimeretika?

¹³ Bunyi terumpit dikena orang Israel nerangka reti siti-siti pekara. Siti ari reti bunyi nya nunjukka orang Israel patut begempuru. Bunyi ke bukai reti iya bala soldadu patut nyerang. Uji pikirka nama deka nyadi ngagai bala soldadu nya enti bunyi terumpit nya enda sebaka enggau bunyi ke patut! Bup Kudus mandingka bunyi terumpit ti ngena enggau leka jaku ti senang dimeretika. Enti kitai enda nerangka siti-siti utai enggau terang, orang engka saru tauka engka pechayaka utai ti enda amat. Taja pan kitai deka madahka runding diri enggau terang, tang kitai patut bejimat ngambika utai ti disebut kitai nunjukka basa tauka enda kasar.—Bacha 1 Korint 14:8, 9.

14. Nama chunto ke nunjukka Jesus bejaku enggau chara ti senang dimeretika?

¹⁴ Matthew bab 5 ngagai 7 bisi chunto ti pemadu manah pasal chara Jesus milih leka jaku ti senang dimeretika. Dalam cheramah ke diberi iya, iya enda nguji minta diperatika orang enggau ngena leka jaku ti tusah tauka enda patut. Lalu iya enda nyebut utai ti ulih ngemediska ati orang bukai. Jesus ngajar utai beguna ke bisi reti ti dalam, tang utai ti disebut iya senang dimeretika. Chunto, Jesus deka nentuka bala murid iya enda irau pasal utai ke deka diempa sida ninting hari. Nya alai, iya madah ngagai sida pasal Jehovah ke seruran meri pemakai ngagai burung. Udah nya, iya nanya sida: “Kati kita enda berega agi ari burung?” (Mat. 6:26) Enggau ngena leka jaku ti senang, Jesus nulung sida meretika utai ti patut dipelajarka sereta berasai diperansang.

15. Nama kebuah kitai patut bejaku enggau chara ti nelap?

¹⁵ Chara kitai bejaku enggau orang bukai mega patut dikemeratka. Orang rindu mendingka Jesus laban iya bejaku enggau chara ti ‘manah,’ tauka nelap. (Luk. 4:22) Lebuh kitai bejaku enggau chara ke nelap, orang deka rindu agi mending sereta nerima utai ti disebut kitai. (J-lam. 25:15) Kitai ulih bejaku enggau orang bukai enggau chara ti nelap, enti kitai bebasaka sida sereta ibuhka asai ati sida. Nya meh digaga Jesus. Chunto, lebuh iya meda orang mayuh bebendar deka mendingka iya, iya balat gaga ati ulih meri awak begulai enggau sida sereta ngajar sida. (Mrk. 6:34) Indah lebuh orang ngeleseka Jesus, iya enda malas sida.—1 Pet. 2:23.

16, 17. (a) Baka ni kitai ulih neladan Jesus lebuh kitai bejaku enggau diri sebilik sereta bala kawan? (Peda gambar ba pun artikel.) (b) Nama penguntung ke diulih seiku indai lebuh iya bejaku enggau chara ti nelap?

¹⁶ Taja pan kitai sayauka diri sebilik sereta bala kawan, tang kitai engka nyebut utai ke enda manah ngagai sida laban kitai ngelala sida. Kitai engka ngumbai kitai enda patut bejimat lebuh kitai bejaku enggau sida. Tang Jesus enda kala nyebut utai ke enda manah, lebuh iya bejaku enggau bala kawan iya. Lebuh sekeda ari sida bekelikuhka pasal sapa ke pemadu besai, iya ngemetulka sida enggau chara ti nelap. Iya ngena seiku anak mit nyadika chunto kena nulung sida ngubah chara sida berunding. (Mrk. 9:33-37) Bala tuai gempuru ulih neladan Jesus, lebuh sida meri jaku lalau enggau nelap ngagai orang bukai.—Gal. 6:1.

¹⁷ Indah lebuh orang nyebut utai ti ngenusahka ati kitai, kitai tau bulih penguntung enti bejaku enggau chara ti nelap. (J-lam. 15:1) Chunto, anak lelaki seiku indai tunggal pura-pura nyembah Jehovah, taja pan iya bisi ngereja utai ti jai. Seiku menyadi Kristian indu ba gempuru berasai sinu ke indai nembiak lelaki nya. Ku iya madah ngagai indai nembiak nya: “Sayau amat, nuan enda nemu ngajar anak.” Indai nembiak nya berunding dulu, lalu udah nya bejaku: “Ke diatu aku endang amat bedau mujur ngajar iya, tang aku deka terus ngajar iya. Bejaku enggau aku baru pasal utai tu pengudah Armagedon; udah nya baru tua nemu.” Ketegal indai nembiak nya sabar sereta nelap enggau menyadi Kristian indu nya, seduai iya agi terus bekawan. Nembiak lelaki nya mega ninga utai ti disebut indai iya, lalu nemu indai iya agi ngarapka iya ulih berubah. Nya alai iya badu begulai enggau kawan ke jai, dibaptisa, lalu enda lama udah nya gawa ba Betel. Sekalika kitai bejaku enggau bala menyadi Kristian kitai, diri sebilik, tauka orang ke enda dikelala kitai, jaku kitai patut seruran “badas sereta ngenyamaika ati orang.”—Kol. 4:6.

18. Baka ni kitai ulih neladan Jesus ari chara kitai bejaku?

¹⁸ Penau ulih madahka runding enggau asai ati kitai ngagai orang bukai, endang pemeri ti manah ari Jehovah. Enti kitai neladan Jesus, kitai deka ngiga maya ti patut endur bejaku, kitai deka bejimat enggau utai ti disebut kitai, lalu kitai nguji deka seruran nelap. Nya alai, aram meh kitai ngena jaku kitai meransang orang bukai sereta ngelantangka ati Jehovah.