Deka Nuan Terus “Bejaga”?

 1, 2. (a) Nama dipadahka Jesus pasal hari ti penudi? (b) Nama tanya ti deka dikerandauka kitai?

UJI pikirka, Jesus duduk ba Bukit Kana meda Rumah Tuhan di Jerusalem. Iya enggau empat iku rasul iya, Peter, Andrew, James, enggau John. Sida mendingka Jesus enggau manah lebuh iya madahka pasal utai ti deka nyadi jemah ila. Jesus madahka nama deka nyadi ba hari ti penudi ba dunya ti jai tu, lebuh iya merintah dalam Perintah Petara. Jesus madah maya nya ila, “ulun ke tetap ati sereta bepenemu-dalam” deka ngarika iya ba dunya, lalu sida deka nyediaka nembiak iya pemakai rohani ba maya ti patut.—Mat. 24:45-47.

² Maya nya mega, Jesus madahka sempama pasal sepuluh iku indu dara. (Bacha Matthew 25:1-13.) Ba pelajar tu, kitai deka berandauka tanya tu: (1) Nama pesan sempama nya? (2) Baka ni orang ti diiri ngena roh kudus ke tetap ati nitihka jaku lalau ari sempama nya, lalu nama asil iya? (3) Baka ni genap iku kitai bulih penguntung ari sempama Jesus kemaya hari tu?

 3. Suba, baka ni litaricha kitai nerangka sempama pasal sepuluh iku indu dara, lalu nama asil iya?

³ Baru-baru tu kitai belajar, ulun ke tetap ati udah ngubah chara jerita Bup Kudus diterangka. Diatu, sida beberat agi ke ajar ti ulih dikena ba pengidup, lalu kurang nerangka pasal reti lambang tauka jaku bala nabi. Chunto, sempama Jesus pasal sepuluh iku indu dara. Suba, litaricha kitai suah ngumbai kelita, minyak, sereta tabung minyak ngambarka utai tauka orang. Kati enti semina beratika utai ti mit, reti pesan ke mudah sereta berat ba sempama nya ulih lenyau? Saut ngagai tanya nya beguna.

 4. Ba sempama nya, baka ni kitai nemu (a) sapa lelaki ke ditikah? (b) sapa indu dara?

⁴ Aram kitai mansik pesan ba sempama Jesus nya. Keterubah, pikirka gaya orang ba dalam sempama pasal sepuluh iku indu dara. Sapa lelaki ke ditikah? Jesus. Kitai nemu laban Jesus empu ngaku diri lelaki ke ditikah. (Luk. 5:34, 35) Sapa indu dara? Sida raban “ke mimit” orang Kristian ti diiri ngena roh kudus. Baka ni kitai nemu? Ba sempama nya, indu dara patut besedia enggau kelita sida lebuh lelaki ke ditikah nya datai. Diatu peratika nama dipadah Jesus ngagai bala murid iya ke diiri ngena roh kudus: “Seruran besedia, lalu awakka lampu kita seruran menyadi belama, baka orang gaji ke nganti tuan sida pulai ari gawai tikah.” (Luk. 12:32, 35, 36) Nambahka nya, rasul Paul enggau John sama bela mandingka bala murid Kristus ke diiri ngena roh kudus baka indu dara bungas. (2 Kor. 11:2; Pem. 14:4) Nyadi kitai ulih meda, jaku lalau enggau tangkan ba Matthew 25:1-13 nya, dituju ngagai bala murid Kristus ke diiri ngena roh kudus.

 5. Baka ni Jesus madahka timpuh sempama iya deka nyadi?

⁵ Siti da agi, jaku lalau Jesus nya nunjukka timpuh ni? Utai dipadah Jesus ba ujung sempama nya nulung kitai nemu. Ku iya: “Lelaki ke deka ditikah pen datai.” (Mat. 25:10) Ba Menara Jaga kena 15 Julai, 2013, kitai belajar pasal Jesus “datai” lapan kali, ba Matthew bab 24 enggau 25. Lebuh Jesus bejaku pasal iya “datai,” iya madah pasal maya penusah ti besai. Maya nya, iya datai ngakim sereta ngemunaska penyai ba dunya tu. Nya alai kitai ulih nyimpulka, sempama Jesus nya nyadi ba hari ti penudi, tang iya deka “datai” maya penusah ti besai.

 6. Nama pesan ari sempama nya?

⁶ Nama pesan dipelajarka kitai ari sempama nya? Kingatka isi jerita Bup Kudus nya. Ba Matthew bab 24, Jesus berandau pasal “ulun ke tetap ati sereta bepenemu-dalam.” Ulun nya raban ke mimit ari orang ti diiri ngena roh kudus. Sida deka ngiring bala murid Kristus ba hari ti penudi. Jesus nangkan sida ngambika terus tetap ati. Ba bab 25, Jesus ngena sempama pasal sepuluh iku indu dara kena ngelalau semua murid ke diiri ngena roh kudus ba hari ti penudi. Tuju pesan nya, awakka sida terus “bejaga” ngambika enda lenyau peluang ke serega. (Mat. 25:13) Aram kitai mansik sempama nya sereta meda baka ni orang ke diiri ngena roh kudus udah nitihka jaku lalau nya.

 7, 8. (a) Nama kebuah indu dara ke pintar besedia? (b) Baka ni orang ke diiri ngena roh kudus besedia?

⁷ Ba sempama nya, Jesus madahka indu dara ke pintar udah sedia lebuh lelaki ke ditikah datai. Sida enda baka indu dara ke beli. Nama kebuah? Laban sida udah besedia sereta bejaga. Semua sepuluh iku indu dara patut mengkang bejaga sereta nyaga kelita ngambika enda padam lebuh malam hari. Enda baka indu dara ke beli, lima iku indu dara ke pintar udah besedia laban sida mekal minyak kelita. Baka ni orang Kristian ti diiri ngena roh kudus ke tetap ati besedia ngambat Jesus?

⁸ Orang ke diiri ngena roh kudus besedia bejalaika pengawa ti diberi ngagai sida nyentuk ke ujung. Sida nemu, gawa ke Petara reti iya sida enda angkunka pengaya ke bisi ba dunya Sitan. Sida keran nyembah Jehovah enggau taluk ukai ketegal pengujung dunya nyau semak, tang ketegal sida rinduka Iya enggau Anak Iya. Sida mengkang taluk lalu enda nejuka pengangkun ke reta, ulah ti kamah, sereta ulah ti ngira diri ngachau sida. Baka indu dara ke pintar ti udah besedia enggau kelita sida, orang ke diiri ngena roh kudus terus manchar baka bintang, enggau sabar ngambat penatai Lelaki ke Ditikah, taja pan iya baka ke laun datai.—Plp. 2:15.

 9. (a) Nama jaku tangkan ke diberi Jesus pasal ngantuk? (b) Baka ni orang ti diiri ngena roh kudus nyaut kangau: “Tu lelaki ke deka ditikah”? (Peda nota kaki.)

⁹ Indu dara ke pintar mega besedia ngambat penatai lelaki ke ditikah laban sida bejaga. Tang ba sempama nya, semua sepuluh iku indu dara “ngantuk lalu tinduk” lebuh nganti lelaki ke ditikah baka ke laun datai. Nyadi, bisi ke enda orang Kristian ke diiri ngena roh kudus kemaya hari tu “tinduk,” iya nya limpang maya ngambat penatai Kristus? Bisi. Jesus nemu indah orang ke sanggup sereta keran ulih nyadi lemi, lalu limpang maya ngambat penatai iya. Nya alai, orang Kristian ti diiri ngena roh kudus ke tetap ati patut bebendar agi bejaga. Baka ni? Ba sempama nya, semua sepuluh iku indu dara nyaut kangau: “Tu lelaki ke deka ditikah!” Tang, semina indu dara ke pintar mengkang bejaga. (Mat. 25:5, 6; 26:41) Pia mega ba hari ti penudi, orang Kristian ke tetap ati ti diiri ngena roh kudus nyaut kangau: “Tu lelaki ke deka ditikah!” Sida udah nunjukka diri pechaya Jesus deka datai, lalu sida udah besedia ngambat iya.a (Peda nota kaki.) Aram kitai mansik pengujung sempama Jesus, ke beberatka timpuh ti udah ditetapka.

10. Nama engka ditanya kitai pasal randau entara indu dara ke pintar enggau indu dara ke beli?

¹⁰ Ba pengujung sempama nya, indu dara ke beli minta minyak kelita ari indu dara ke pintar. Tang, indu dara ke pintar enggai nulung. (Bacha Matthew 25:8, 9.) Tang, ni maya orang Kristian ti diiri ngena roh kudus ke tetap ati enggai nulung orang ke begunaka bantu? Kingatka maya sempama nya deka nyadi. Jesus, Lelaki ke Ditikah, datai ngakim semak pengujung penusah ti besai. Nyadi, randau nya nunjukka utai ti nyadi semak pengujung penusah ti besai. Baka ni kitai nemu? Laban maya nya, orang ke diiri ngena roh kudus deka nerima chop sida ti penudi.

11. (a) Nama deka nyadi sebedau penusah ti besai berengkah? (b) Nama reti utai ku indu dara ke pintar lebuh sida ngasuh indu dara ke beli mupuk, lalu meli minyak?

¹¹ Nyadi sebedau penusah ti besai berengkah, semua orang ti diiri ngena roh kudus ke tetap ati ba dunya deka nerima chop ti penudi. (Pem. 7:1-4) Bepun ari nya, sida endang deka ke serega. Tang, pikirka pasal taun-taun sebedau penusah ti besai. Nama deka nyadi ngagai orang ke diiri ngena roh kudus ke enda terus bejaga sereta enda tetap ati? Sida enda nerima chop ti penudi. Lebuh maya nya, orang Kristian bukai ke tetap ati deka dipilih nganti sida. Lebuh penusah ti besai berengkah, indu dara ke beli engka tekenyit meda Babilon ti Besai dipunaska. Udah nya baru sida nemu, sida enda besedia ngambat Jesus. Maya nya, nama deka nyadi enti sida minta bantu? Saut iya ba sempama nya. Indu dara ke pintar enggai meri indu dara ke beli minyak, tang ngasuh sida mupuk, lalu meli minyak. Laban nya “ba urung tengah malam,” nadai orang nyual minyak. Sida udah laun!

12. (a) Lebuh maya penusah ti besai, nama nyadi ngagai orang ke diiri ngena roh kudus, ke enda tetap ati sebedau nerima chop ti penudi? (b) Nama deka nyadi ngagai sida ke baka indu dara ke beli?

¹² Lebuh maya penusah ti besai, orang ti diiri ngena roh kudus ke tetap ati enda ulih nulung orang ke enda tetap ati. Sida udah laun. Nya alai, nama deka nyadi ngagai orang ke enda tetap ati? Peratika nama nyadi ngagai indu dara ke beli ke mupuk meli minyak: “Lelaki ke deka ditikah pen datai. Indu ke endang udah sedia nya tama enggau lelaki nya ngagai pengerami gawai tikah. Pintu lalu ditutup.” Lebuh Jesus datai enggau mulia semak pengujung penusah ti besai, iya deka ngumpul orang ti diiri ngena roh kudus ke tetap ati ke serega. (Mat. 24:31; 25:10; Jhn. 14:1-3; 1 Tes. 4:17) Tang, Jesus deka nulak sida ke enda tetap ati. Baka indu dara ke beli sida engka ngangau: “Tuan, tuan! Buka pintu ke kami!” Tang, nama saut Jesus? Sayau amat, iya meri sida saut ti sama ngagai orang ke baka kambin: “Enggau bendar aku madah ngagai kita, aku enda ngelala kita.”—Mat. 7:21-23; 25:11, 12.

13. (a) Nama kebuah enda tau nyimpulka mayuh murid Kristus ke diiri ngena roh kudus deka enda tetap ati? (b) Nama kebuah kitai ngumbai sempama Jesus nunjukka iya bisi pengarap ba orang Kristian ke diiri ngena roh kudus? (Peda gambar ba pun pelajar.)

¹³ Kati Jesus madahka mayuh orang ke diiri ngena roh kudus deka enda tetap ati, lalu patut diganti? Enda. Ba Matthew bab 24, kitai nemu Jesus enda ngasuh ulun ke tetap ati sereta bepenemu-dalam nyadi ulun ke jai. Reti iya, Jesus enda ngarapka utai tu nyadi. Pia mega, sempama pasal sepuluh iku indu dara nya semina jaku tangkan. Baka indu dara ke beli enggau ke pintar, genap iku orang Kristian ke diiri ngena roh kudus patut besedia enggau bejaga. Enti enda, sida deka nyadi beli enggau enda tetap ati. Paul meri tangkan ti sama ngagai bala menyadi Kristian ke diiri ngena roh kudus. (Bacha Hebrew 6:4-9; banding Ulang Adat 30:19.) Tangkan iya nyemetak, tang iya pechaya sida deka bulih berekat. Tangkan ba sempama pasal sepuluh iku indu dara nunjukka Jesus bisi pengarap ti sama ba orang ke diiri ngena roh kudus. Iya nemu genap iku ari sida ulih mengkang tetap ati sereta nerima berekat ti manah!

14. Nama kebuah bedus ti bukai mega bulih penguntung ari sempama pasal sepuluh iku indu dara?

¹⁴ Sempama Jesus dituju ngagai orang Kristian ke diiri ngena roh kudus. Tang, ulih “bedus ti bukai” bulih penguntung ari sempama Jesus? (Jhn. 10:16) Ulih! Pesan sempama tu mudah: “Bejaga.” Lalu Jesus kala madah: ‘Nya alai aku madah ngagai semua kita: Bejaga.’ (Mrk. 13:37) Jesus dekaka semua murid iya besedia sereta bejaga. Lalu, semua orang Kristian ulih nitih teladan manah orang ke diiri ngena roh kudus, ke ngenuluka pengawa nginjil ba pengidup sida. Kingatka, indu dara ke beli minta minyak ari indu dara ke pintar. Peminta sida enda dikibuhka. Tu ngingatka kitai, penaluk ngagai Petara, besedia, sereta terus bejaga, nya bepanggai ba kitai empu. Nadai orang ulih ngereja nya ke kitai. Genap iku kitai betanggungjawap ngagai Hakim ti lurus, Jesus Kristus, iya ke deka datai enda lama da agi. Nyadi, kitai patut sedia!

15. Nama kebuah tikah Kristus enggau indu ke ditikah iya ngagaka ati semua orang Kristian ke bendar?

¹⁵ Semua orang Kristian gaga ati pasal tikah ti disebut ba sempama Jesus. Jemah ila, pengudah perang Armagedon, orang Kristian ke diiri ngena roh kudus deka nyadi indu ke ditikah Kristus. (Pem. 19:7-9) Genap iku orang ba dunya deka bulih penguntung ari tikah ba serega nya. Nama kebuah? Laban nya nyamin perintah ti sempurna ke semua mensia. Sekalika kitai bisi peluang idup belama ba serega tauka ba dunya, aram meh kitai terus besedia sereta bejaga. Enggau tu, kitai tau bulih pengelantang ti disediaka Petara ke kitai jemah ila!