Akwụkwọ Ndị Hibru gwara anyị banyere ọtụtụ ndị nwere okwukwe na Jehova. Mosis bụ otu n’ime ha. O nwere okwukwe pụrụ iche. (Hib. 3:2-5; 11:23-25) Mosis ka tụkwasịrị Chineke ya obi. Jehova agharịpụghịkwa ya. Ọ rụrụ ọrụ ebube nye ndị Izrel nri na mmiri ka ha nwee ike ịfọ ndụ n’ala ịkpa kpọrọ nkụ. (Ọpụ. 15:22-25; Ọma 78:23-25) N’agbanyeghị na Mosis nwere okwukwe siri ike, ihe dị ka otu afọ Jehova napụtachara ndị Izrel n’Ijipt, ọ malitere iche ma Jehova ọ̀ ga-enyeli ndị ya anụ. Mosis nọ na-eche otú Jehova ga-esi weta anụ ga-ezuru ihe dị ka nde mmadụ atọ n’ala ịkpa ahụ, bụ́ ebe nri dị ụkọ. N’ihi ya, Jehova jụrụ Mosis, sị: “Ihe a ọ̀ nyịrị Jehova?” (Ọnụ Ọgụ. 11:21-23) Ihe ọ pụtara bụ na Jehova na-ajụ Mosis, sị: ‘Ì chere n’eziokwu na agaghị m emeli ihe m kwuru na m ga-eme?’ w25.03 26 ¶1-2

Ànyị kwesịrị iche na ihe ọ bụla mere n’Iju Mmiri ahụ nwere ihe ọ na-anọchi anya ya ga-eme n’ọdịnihu? Azịza ya bụ mba. Maka gịnị? Ọ bụ n’ihi na Baịbụl ekwughị otú ahụ. Jizọs kwuru na oge ọnụnọ ya ga-adị ka “oge Noa.” Mana, o nweghị ihe o kwuru gosiri na ihe ọ bụla mere n’Iju Mmiri ahụ nwere ihe ọ na-anọchi anya ya ga-eme n’ọdịnihu. O kwughịkwanụ na mmechi Chineke mechiri ụgbọ Noa nwere ihe pụrụ iche ọ nọchiri anya ya ga-eme n’ọdịnihu. (Mat. 24:37-39) Gịnị ka Noa mere mgbe ọ nụrụ ozi ịdọ aka ná ntị Jehova ziri? Ọ rụrụ ụgbọ iji gosi na o nwere okwukwe. (Hib. 11:7; 1 Pita 3:20) Otú ahụ ka ọ dịkwa taa. Ndị nụrụ ozi ọma Alaeze Chineke kwesịrị ime ihe ha mụtara. (Ọrụ 3:17-20) Pita kpọrọ Noa “onye nọ na-ekwusa ihe bụ́ ezi omume.” Taa, anyị na-agbalị ikwusara ndị nọ n’ụwa niile ozi ọma. Anyị na-ejikwa ịnụ ọkụ n’obi eme ya. N’agbanyeghị otú anyị si gbaa mbọ, anyị agaghị ezili onye ọ bụla nọ n’ụwa ozi ọma tupu ọgwụgwụ abịa. w24.05 9-10 ¶3-5

Anyị kwesịrị ịchọta ụzọ ndị anyị ga-esi na-egosi ndị enyi Jehova obiọma ma na-akwanyere ha ùgwù. (Rom 12:10) Olee otú anyị ga-esi eme ya? Otu ụzọ e kwuru n’Abụ Ọma 15:4 bụ na onye bụ́ ọbịa n’ụlọikwuu Jehova “na-emezu nkwa o kwere, ọ bụrụgodị na imezu ya ga-akpa ya aka ọjọọ.” Ọ bụrụ na anyị emezughị nkwa anyị kwere, o nwere ike iwute ndị ọzọ. (Mat. 5:37) Dị ka ihe atụ, Jehova chọrọ ka anyị na-emezu nkwa anyị kwere di anyị ma ọ bụ nwunye anyị n’ụbọchị anyị gbara akwụkwọ. Obi na-atọkwa ya ụtọ ma ọ bụrụ na ndị nne na nna ana-agbalịsi ike imezu nkwa ha kwere ụmụ ha. Otú anyị si hụ Jehova na ndị ọzọ n’anya ga-eme ka anyị na-agbalịsi ike na-emezu nkwa anyị. Ụzọ ọzọ anyị si akwanyere ndị enyi Jehova ùgwù bụ ịna-ele ha ọbịa na ịna-emesapụrụ ha aka. (Rom 12:13) Ọ bụrụ na anyị ana-ewepụta oge ka anyị na ụmụnna anyị nọrịa, o nwere ike ime ka anyị na ha nakwa Jehova na-adịkwu ná mma. Anyị leekwa ha ọbịa, anyị na-eme ka Jehova. w24.06 12 ¶15-16