Ụlọ Nche Bekee nke Ọktoba 1, 1988 kwuru, sị: “Ndị okenye kwesịrị ịmata na Kraịst nwere ike iji mmụọ nsọ mee ka okenye ọ bụla n’ọgbakọ kwuo ihe Akwụkwọ Nsọ kwuru ga-enyere ndị okenye ibe ya aka ịmara ihe ha ga-eme ma ọ bụ ihe ha ga-ekpebi. (Ọrụ 15:​7-15) Mmụọ nsọ na-enyere ndị okenye niile aka, ọ bụghị naanị otu onye n’ime ha.” Okenye na-akwanyere ndị okenye ibe ya ùgwù anaghị achọkarị ibu ụzọ kwuo okwu ná nnọkọ ndị okenye. Ọ naghị achọ ka o kwuo okwu karịa ndị ọzọ, ọ naghịkwa eche na ọ bụ ihe o kwuru ka mma mgbe niile. Kama nke ahụ, ọ na-eji obi umeala kwuo ihe o chere. Ọ na-egekwa ntị n’ihe ndị ọzọ na-ekwu. Nke kacha nke, ọ na-adị njikere ịgwa ndị ọzọ ihe Baịbụl kwuru na ige ntị ná ntụziaka “ohu ahụ kwesịrị ntụkwasị obi, onye nwekwara uche” nyere. (Mat. 24:​45-47) Ọ bụrụ na ndị okenye ahụ ibe ha n’anya ma na-akwanyere ha ùgwù mgbe ha na-enwe nnọkọ, mmụọ nsọ Chineke ga-anọ n’etiti ha ma nyere ha aka ikpebi ihe dị mma.​—Jems 3:​17, 18. w20.08 27 ¶5-6

Ndị iro Pọl onyeozi siri ezigbo ike karịa ya. Ha tiri ya ihe ma tụọ ya mkpọrọ ọtụtụ ugboro. Ndị kwesịrị ịbụ ndị enyi ya mekwara ya ihe ọjọọ. E nwedịrị ndị nọ n’ọgbakọ megidere ya. (2 Kọr. 12:11; Fil. 3:18) Ma Pọl meriri ndị niile megidere ya. Olee otú o si merie ha? N’agbanyeghị na ha na-emegide ya, ọ kwụsịghị ikwusa ozi ọma. Ọ hapụghị ụmụnna ya ma mgbe ha mere ihe wutere ya. Nke kacha mkpa bụ na o fegidere Chineke ruo ọnwụ ya. (2 Tim. 4:8) Ihe mere o ji mee ihe a niile abụghị n’ihi na o siri ike, kama n’ihi na ọ tụkwasịrị Jehova obi. À na-akparị gị ma ọ bụ na-emegide gị? Ihe bụ́ mkpa gị bụ inyere ndị mmadụ aka ịmụta gbasara Jehova na Okwu ya. I nwere ike ime ya ma i jiri Baịbụl na-aza ndị mmadụ ajụjụ ndị ha jụrụ, na-akwanyere ndị na-emegide gị ùgwù ma na-emere mmadụ niile ihe ọma, ma ndị na-emegide gị.​—Mat. 5:44; 1 Pita 3:​15-17. w20.07 17-18 ¶14-15

Ànyị ga-ekwuli na Jehova dị umeala n’obi? Ee, otú ahụ Devid kwuru n’ihe mmụta dịịrị ụbọchị taa. (Ọma 18:35) O nwere ike ịbụ na Devid na-echeta ihe mere ụbọchị Samuel onye amụma bịara n’ụlọ nna ya ite onye ga-abụ eze Izrel mmanụ. Jehova gosiri na ọ dị umeala n’obi mgbe o weturu onwe ya ala họrọ Devid bụ́ nwa nke ikpeazụ n’ime ụmụ nwoke asatọ nna ha mụrụ ka ọ nọchie Eze Sọl. (1 Sam. 16:​1, 10-13) O doro anya na Devid kwetara ihe otu ọbụ abụ kwuru gbasara Jehova. Ọbụ abụ ahụ sịrị: ‘Ọ na-ewetu onwe ya ala iji lee eluigwe na ụwa anya, ọ na-esi n’ájá kulite onye ọ na-enweghị ka ọ hà ya; ọ na-ebuli ogbenye elu, iji mee ka o soro ndị a ma ama nọdụ ala.’ (Ọma 113:​6-8) Jehova si n’otú o si emeso ụmụ mmadụ na-ezughị okè gosi na ya dị umeala n’obi. Ọ bụghị naanị na ọ na-anabata ofufe anyị, kama, ọ na-ewerekwa anyị ka ndị enyi ya. (Ọma 25:14) Iji mee ka anyị na ya nwee ike ịdị ná mma, Jehova bu ụzọ jiri Ọkpara ya chụọ àjà n’ihi mmehie anyị. Ihe a gosiri na Jehova dị ezigbo obi ebere, na-enwekwara anyị ọmịiko. w20.08 8 ¶1-3