Olee otú Jehova ga-esi eme ka e too aha ya n’ọdịnihu? Ọ ga-eme ka e kpee ikpe ziri ezi. N’oge na-adịghị anya, ọ ga-ebibi Babịlọn Ukwu maka na o mere ka a na-ekwutọ aha ya dị nsọ. (Mkpu. 17:5, 16; 19:1, 2) Ụfọdụ ndị hụrụ ka a na-ebibi Babịlọn Ukwu nwere ike isonyere anyị na-efe ezi Chineke. N’ikpeazụ, n’agha Amagedọn, Jehova ga-ebibi ụwa Setan, bibiekwa ndị niile na-emegide ya ma na-ekwutọ aha ya. Ma, ọ ga-echebe ndị niile hụrụ ya n’anya, na-erubere ya isi, na-etokwa ya. (Mak 8:38; 2 Tesa. 1:6-10) Mgbe e lechara ndị mmadụ ule ikpeazụ ma Kraịst chịchaa otu puku afọ, ọ pụtara na Jehova emeela ka e doo aha ya nsọ kpamkpam. (Mkpu. 20:7-10) N’oge ahụ, “ndị ma gbasara ebube Jehova ga-ejupụta n’ụwa otú mmiri si ejupụta n’oké osimiri.” (Hab. 2:14) Ọ ga-atọgbu anyị atọgbu mgbe onye ọ bụla dị ndụ ga na-eto Jehova otú o kwesịrị. w25.01 7 ¶15-16

Gịnị ga-enyere Ndị Kraịst aka idi mkpagbu ndị na-abịara ha? Pọl onyeozi ma na ha kwesịrị ịhụ uru ntachi obi ga-abara ha. Ọ bụ ya mere o ji kọwaara ha na Chineke nwere ike ikwe ka nsogbu bịara Onye Kraịst ka o jiri ya zụọ ya. Ụdị ọzụzụ ahụ nwere ike inyere onye ahụ aka ịmụta ịna-akpa àgwà Ndị Kraịst ma ọ bụ ịna-akpakwu ya nke ọma. Ndị Kraịst bụ́ ndị Hibru lekwasị anya n’uru ụdị ọnwụnwa ndị ahụ na-abara ha, ọ ga-adịrị ha mfe ịtachi obi. (Hib. 12:11) Pọl gwara Ndị Kraịst ndị ahụ bi na Judia ka ha nwee obi ike nakwa ka ike ghara ịgwụ ha ma ọnwụnwa bịara ha. Pọl ga-enyeli ha ezigbo ndụmọdụ banyere otú e si atachi obi. Ebe ọ bụ na o sobu na-akpagbu Ndị Kraịst, ọ hụla otú e si mesie ha ike. Ọ makwa otú e si edi mkpagbu. A sị ka e kwuwe, ọtụtụ mkpagbu abịarala ya kemgbe ọ ghọrọ Onye Kraịst.​—2 Kọr. 11:23-25. w24.09 12 ¶16-17

Ka ụbọchị ọ bụla na-agafe ka ozi ọma anyị na-akakwu mkpa. Maka gịnị? Ọ bụ n’ihi na oge adịghịzi. Ka anyị lee ihe Jizọs kwuru na Mak 13:10 gbasara ikwusa ozi ọma n’oge ikpeazụ a. Dị ka e kwuru n’akwụkwọ Matiu, Jizọs kwuru na a ga-ekwusa ozi ọma a n’ụwa niile tupu “ọgwụgwụ” abịa. (Mat. 24:14) “Ọgwụgwụ” o kwuru okwu ya bụ mgbe a ga-ebibi ụwa Setan kpamkpam. Jehova ekpebiela “ụbọchị na awa” ihe ndị ga-eme n’ọdịnihu ga-eme. (Mat. 24:36; Ọrụ 1:7) Kwa ụbọchị, anyị na-erukwu nso n’oge ahụ. (Rom 13:11) Ma, anyị kwesịrị ịna-ekwusa ozi ọma ruo mgbe ọgwụgwụ ga-abịa. E nwere ajụjụ dị mkpa anyị kwesịrị ichebara echiche: Gịnị mere anyị ji na-ekwusa ozi ọma? Ọ bụ ịhụnanya. Ihe ndị anyị na-eme n’ikwusa ozi ọma na-egosi na anyị ji ikwusa ozi ọma kpọrọ ihe, nakwa na anyị hụrụ ndị mmadụ n’anya. Nke kachanụ bụ na ọ na-egosi na anyị hụrụ Jehova n’anya, jirikwa aha ya kpọrọ ihe. w24.05 14-15 ¶2-3