Genesis

25 Kanayonanna pay, nangala manen ni Abraham iti asawa, ket ti naganna Ketura.+ 2 Idi agangay impasngayna kenkuana da Zimran ken Jocsan ken Medan ken Midian+ ken Isbac ken Suah.+

3 Ket ni Jocsan isu ti ama da Sheba+ ken Dedan.+

Ket ti annak ni Dedan isu da Assurim ken Letusim ken Leummim.

4 Ket ti annak ni Midian isu da Efa+ ken Efer ken Hanoc ken Abida ken Eldaa.+

Dagitoy amin ti annak ni Ketura.

5 Idi agangay ni Abraham intedna ken Isaac ti isuamin nga adda kenkuana,+ 6 ngem iti annak dagiti kamalala a naadda ken Abraham nangted ni Abraham iti sagsagut.+ Kalpasanna pinapanawna ida manipud ken Isaac nga anakna,+ bayat nga isu sibibiag pay, nga agpadaya, agturong iti daga iti Daya.+ 7 Ket dagitoy ti al-aldaw dagiti tawen ti biag ni Abraham a panagbiagna, sangagasut pitopulo ket lima a tawen. 8 Kalpasanna nauyos ti biag ni Abraham ket natay iti naimbag a kinalakay, lakay ken napneken, ket naitipon kadagiti kailianna.+ 9 Gapuna isu intabon da Isaac ken Ismael nga annakna iti rukib ti Macpela idiay talon ni Efron nga anak ni Zohar a Heteo nga adda iti sango ti Mamre,+ 10 ti talon a ginatang ni Abraham iti annak ni Het. Sadiay a naitabon ni Abraham, ken kasta met ni Sara nga asawana.+ 11 Ket naaramid a kalpasan ti ipapatay ni Abraham intultuloy ti Dios a bendisionan ni Isaac nga anakna,+ ket ni Isaac agnanaed idi iti asideg ti Beer-lahai-roi.+

12 Ket daytoy ti pakasaritaan ni Ismael+ nga anak ni Abraham a ni Agar nga Egipcio nga adipen a babai ni Sara impasngayna ken Abraham.+

13 Ita dagitoy ti nagnagan ti annak ni Ismael, babaen ti nagnaganda, sigun kadagiti namunganayanda a pamilia: ti inauna ni Ismael a ni Nebayot+ ken da Quedar+ ken Adbeel ken Mibsam+ 14 ken Misma ken Duma ken Massa, 15 Hadad+ ken Tema,+ Jetur, Nafis ken Quedema.+ 16 Dagitoy ti annak ni Ismael, ket dagitoy ti nagnaganda babaen kadagiti paraanganda ken babaen kadagiti napaderan a pakarsoda:+ sangapulo ket dua a panguluen sigun kadagiti pulida.+ 17 Ket dagitoy ti tawtawen ti panagbiag ni Ismael, sangagasut tallopulo ket pito a tawen. Kalpasanna nauyos ti biagna ket natay ket naitipon kadagiti kailianna.+ 18 Ket nagtabtabernakuloda manipud Havila+ iti asideg ti Sur,+ nga adda iti sango ti Egipto, agingga iti Asiria. Nagyan iti sanguanan ti amin a kakabsatna.+

19 Ket daytoy ti pakasaritaan ni Isaac nga anak ni Abraham.+

Ni Abraham isu ti ama ni Isaac. 20 Ket ni Isaac uppat a pulo ti tawenna idi innalana kas asawana ni Rebecca nga anak a babai ni Betuel+ a Sirio+ ti Padan-aram, ti kabsat ni Laban a Sirio. 21 Ket ni Isaac nagpakpakaasi ken Jehova nangnangruna maipaay iti asawana,+ agsipud ta lupes;+ gapuna impalubos ni Jehova nga isu mapagpakaasian maipaay kenkuana,+ ket nagsikog ni Rebecca nga asawana. 22 Ket ti annak iti unegna nangrugida nga agdangadang,+ iti kasta kinunana: “No kastoy ti mapaspasamak, apay pay laeng a sibibiagak?” Gapu iti dayta isu napan nagimtuod ken Jehova.+ 23 Ket kinuna kenkuana ni Jehova: “Dua a nasion ti adda iti tianmo,+ ket dua a nasional a bunggoy ti mapagsinanto iti makin-uneg a paspasetmo;+ ket ti maysa a nasional a bunggoy napigpigsanto ngem iti sabali a nasional a bunggoy,+ ket ti laklakay agserbinto iti ub-ubing.”+

24 Nagin-inut a dagiti aldawna dimteng iti pannakaan-anay maipaay iti panagpasngayna, ket, adtoy! singin ti adda iti tianna.+ 25 Idin ti umuna rimmuar a nalabaga amin a kas iti opisial a kawes a muldot;+ gapuna pinanagananda iti Esau.+ 26 Ket kalpasan dayta rimmuar ti kabsatna ket ti imana sikakapet idi iti mukod ni Esau;+ gapuna pinanagananna iti Jacob.+ Ket ni Isaac innem a pulo ti tawenna idi impasngay ida ni Rebecca.

27 Ket dagiti ubbing dimmadakkelda, ket ni Esau nagbalin a maysa a lalaki nga ammona ti aganup,+ lalaki ti tay-ak, ngem ni Jacob maysa a lalaki nga awan pakababalawanna,+ agnanaed kadagiti tolda.+ 28 Ket ni Isaac addaan ayat ken Esau, agsipud ta kaipapananna ti aanupen iti ngiwatna, idinto ta ni Rebecca maysa idi a managayat ni Jacob.+ 29 Iti naminsan mangpabpaburek ni Jacob iti gisado, idi a dimteng ni Esau manipud iti tay-ak ket isu nabannogan. 30 Gapuna ni Esau kinunana ken Jacob: “Darasem, pangngaasim, ikkannak ti sangkatilmon iti nalabaga—ti nalabaga dita, ta nabannogak!” Dayta ti makagapu a napanaganan iti Edom.+ 31 Iti daytoy kinuna ni Jacob: “Ilakom kaniak, umuna iti amin, ti kalintegam kas inauna!”+ 32 Ket intuloy ni Esau: “Adtoy matayak met laeng, ket ania ti pagimbagan kaniak ti kalintegan iti pannakayanak?” 33 Ket innayon ni Jacob: “Agsapataka kaniak umuna iti amin!”+ Ket nagsapata kenkuana ket inlakona ken Jacob ti kalinteganna kas inauna.+ 34 Ket ni Jacob nangted ken Esau iti tinapay ken gisado a lentehas, ket isu nangan ken imminum.+ Kalpasanna timmakder ket napanen. Gapuna inumsi ni Esau ti kalintegan iti pannakayanak.+