Ipatpateg ti ili ni Jehova ti kinapudno a masarakan iti Sao ti Dios. Iti dayta a naibatay ti pammatitayo. (Roma 10:17) Nakombinsirtayo a ni Jehova ti nangipasdek iti kongregasion Kristiano kas “maysa nga adigi ken pundasion ti kinapudno.” (1 Tim. 3:15) Awanen ti sabali pay a kayat ni Satanas no saan a tay mapukawtayo ti panagtalektayo iti Biblia wenno ti panagtalektayo iti panangiwanwan ti organisasion ti Dios. (Efe. 4:14) Dandanin mangusar ti Diablo iti nabileg a propaganda tapno mayaw-awanna ti amin a nasion a bumusor ken Jehova. (Apoc. 16:13, 14) Ammotayo met a lallalo pay nga ikagumaan ni Satanas nga iyaw-awan ti ili ni Jehova. (Apoc. 12:9) Masapul ngarud a sanayentayo ti bagitayo a mangilasin iti nagdumaan ti kinapudno ken kinaulbod, ken agtulnogtayo iti kinapudno. (Roma 6:17; 1 Ped. 1:22) Nakadepende iti dayta ti pannakaisalakantayo inton dakkel a rigat! w24.07 8 ¶1-3

Idi inted ni Jehova dagiti lintegna kadagiti Israelita, inkarida nga agtulnogda kenkuana. No aramidenda dayta, protektaran ken bendisionanna ida. Ngem no saanda nga agtulnog kadagiti lintegna—wenno no agdaydayawda kadagiti didiosen—saanna a bendisionan ida ket agrigatda. Ngem dina kayat a sawen dayta a naan-anayen a baybay-an ida ti Dios. Mabalinda ti ‘agsubli ken Jehova a Diosda ken ipangagda ti timekna.’ (Deut. 30:1-3, 17-20) Iti sabali a pannao, mabalinda ti agbabawi. No aramidenda dayta, umasideg kadakuada ni Jehova ken bendisionanna manen ida. Maulit-ulit a nagrebelde ken Jehova ti ili a pinilina. Kas resultana, nagrigatda. Ngem saan a nauma ni Jehova iti nasukir nga ilina. Maulit-ulit a nangibaon kadagiti propetana tapno kombinsirenna ida nga agbabawi ken agsublida kenkuana.—2 Ar. 17:13, 14. w24.08 9 ¶4-5

Kalpasan a natay ni Jesus, nagrigat ti napadasan dagiti Hebreo a Kristiano nga agnanaed idiay Jerusalem ken Judea. Di nagbayag kalpasan unay a nabuangay ti kongregasion Kristiano, napadasanda ti nakaro a pannakaidadanes. Sa kalpasan ti agarup 20 a tawen, rimmigat ti biag dagiti pasurot ni Kristo a posible a gapu iti bisin a napasamak sakbay dayta. (Ara. 11:27-30) Ngem idi agarup 61 C.E., napadasan dagiti Kristiano ti apagbiit a talna. Iti dayta a tiempo, nakaawatda iti surat manipud ken apostol Pablo. Dayta nga impaisurat ti Dios ket talaga a naintiempuan unay. Ti surat para kadagiti Hebreo ket naintiempuan unay. Ngamin, saan nga agbayag ti talna a mapadpadasan dagiti Kristiano sadiay. Nangted ni Pablo iti makatulong a balakad tapno makapagibturda iti rigat a dandanidan mapasaran. w24.09 8 ¶1-2