Genesis

37 Ket ni Jacob nagtultuloy nga agnaed iti daga a nagnanaedan kas ganggannaet ni amana,+ idiay daga ti Canaan.+

2 Daytoy ti pakasaritaan ni Jacob.

Ni Jose,+ idi sangapulo ket pito ti tawenna, agay-aywan iti karnero a kadua ti kakabsatna iti tengnga ti arban,+ ket, yantangay ubing pay laeng, kaduana ti annak ni Bilha+ ken ti annak ni Zilpa,+ ti assawa ni amana. Gapuna ni Jose nangyeg ken amada iti dakes a damag maipapan kadakuada.+ 3 Ket ni Israel inayatna ni Jose nga ad-adda ngem iti amin a sabsabali pay nga annakna,+ agsipud ta isu idi ti anak iti kinalakayna; ket addaan iti nagayad, garitgaritan a kasla kamisadentro a kawes a naaramid maipaay kenkuana.+ 4 Idi nakita ti kakabsatna nga isu inayat ni amada nga ad-adda ngem iti amin a kakabsatna, rinugianda a guraen,+ ket saanda a makapagsao a sitatalna kenkuana.+

5 Idi agangay naaddaan ni Jose iti tagtagainep ket imbagana iti kakabsatna,+ ket nakasarakda iti kanayonan a rason tapno guraenda. 6 Ket kinunana kadakuada: “Imdenganyo, pangngaasiyo, daytoy tagtagainep a natagtagainepko.+ 7 Ala ket, adtoy agrepreppettayo kadagiti binettek iti tengnga ti talon idi nga adtoy ti binettekko bimmangon ken kasta met a nagtakder a sililinteg ket adtoy dagiti binettekyo linawlawda ken nagruknoyanda ti binettekko.”+ 8 Ket rinugian a kunaen kenkuana ti kakabsatna: “Pudno kadi nga agarikanto kadakami?+ wenno, Pudno kadi a dominarannakamto?”+ Gapuna nakasarakda iti kabbaro a rason tapno guraenda gapu kadagiti tagtagainepna ken gapu iti sasaona.

9 Kalpasan dayta naaddaan iti sabali pay a tagtagainep, ket insalaysayna iti kakabsatna ket kinunana: “Adtoy naminsan pay a naaddaanak iti tagtagainep, ket adtoy ti init ken ti bulan ken ti sangapulo ket maysa a bituen agrukruknoyda idi kaniak.”+ 10 Kalpasanna insalaysayna dayta iti amana kasta met iti kakabsatna, ket rinugian a babalawen ni amana ken kunaen kenkuana:+ “Ania ti kaipapanan daytoy tagtagainep a natagtagainepmo? Pudno kadi a siak ken kasta met ni inam ken ti kakabsatmo umaykamto ket agruknoykami kenka agingga iti daga?” 11 Ket nagimon kenkuana ti kakabsatna,+ ngem sinalimetmetan ni amana ti sao.+

12 Ti kakabsatna napanda ita tapno ipaarabda ti arban ni amada idiay asideg ti Siquem.+ 13 Idi agangay ni Israel kinunana ken Jose: “Saan aya a ti kakabsatmo agay-aywanda kadagiti arban idiay asideg ti Siquem? Umayka, ket ibaonka kadakuada.” Gapu itoy kinunana kenkuana: “Adtoyak!”+ 14 Gapuna kinunana kenkuana: “Inka, pangngaasim. Kitaem no ti kakabsatmo natalged ken nakaradkadda ken no ti arban natalged ken nakaradkad, ket iyegannak iti damag.”+ Iti kasta imbaonna manipud iti nababa a tanap ti Hebron,+ ket napan a nagturong idiay Siquem. 15 Idi agangay isu nasarakan ti maysa a lalaki ket adtoy agallaalla idi iti tay-ak. Idin nagimtuod kenkuana ti lalaki, a kunkunana: “Ania ti sapsapulem?” 16 Iti daytoy kinunana: “Ti kakabsatko ti sapsapulek. Ibagam kaniak, pangngaasim, Sadino ti pangay-aywananda kadagiti arban?” 17 Ket intuloy ti lalaki: “Pimmanawdan ditoy, agsipud ta nangngegko a kunkunada, ‘Mapantayo idiay Dotan.’” Gapuna sinurot ni Jose ti kakabsatna ket nasarakanna ida idiay Dotan.

18 Ala ket, isu naimatanganda iti adayo, ket sakbay a makaasideg kadakuada rinugianda ti nangisikat a sisisikap maibusor kenkuana tapno papatayenda.+ 19 Gapuna kinunada iti maysa ken maysa: “Adtoy! Sumungsungad dayta a managtagtagainep.+ 20 Ket ita umaykayo ket papatayentayo ket itapuaktayo iti maysa kadagiti bito;+ ket kunaentayto nga isu inalun-on ti maysa a nadamsak nga atap nga animal.+ Kalpasanna kitaentayo no anianto ti pagbalinan dagiti tagtagainepna.” 21 Idi a nangngeg daytoy ni Ruben isu pinadpadasna nga ispalen iti imada.+ Gapuna kinunana: “Saantayo a kabilen a papatayen ti kararuana.”+ 22 Ket intultuloy ni Ruben a kunaen kadakuada: “Dikay mangibuyat iti dara.+ Itapuakyo iti daytoy a bito nga adda iti let-ang ket dikay iyunnat kenkuana ti nadawel nga ima.”+ Ti panggepna isu ti panangispal kenkuana iti imada tapno isublina ken amana.

23 Gapuna naaramid nga apaman a nakagteng ni Jose iti kakabsatna, inuksobanda ni Jose iti nagayad a kawesna, ti mismo a nagayad a garitgaritan a kawes a sikakapet idi kenkuana;+ 24 a kalpasan dayta isu innalada ket intapuakda iti bito.+ Iti dayta a tiempo awan nagyan ti abut; awan danum iti dayta.

25 Kalpasanna nagtugawda tapno manganda iti tinapay.+ Idi intangwada dagiti matada ket kimmitada, ay ket, adtoy adda sangkakuyogan a managbiahe nga Ismaelita+ nga um-umay manipud Galaad, ket dagiti kamelioda siaawit iti labdanum ken balsamo ken natutot nga ukis ti kayo,+ nga addada iti dalanda tapno isalogda dayta idiay Egipto. 26 Gapu itoy kinuna ni Juda iti kakabsatna: “Ania ti magunggona no kas pagarigan pinapataytayo ti kabsattayo ket inlemmengtayo ti darana?+ 27 Umaykayo ket ilakotayo kadagiti Ismaelita,+ ket ditay ipatay kenkuana ti imatayo.+ Uray ket, isu kabsattayo, lasagtayo.” Gapuna immimdengda iti kabsatda.+ 28 Ita dagiti lallaki, dagiti Midianita a komersiante,+ lumablabasda idi. Ngarud inaon ken inngatoda ni Jose iti bito+ ket kalpasanna inlakoda ni Jose kadagiti Ismaelita iti duapulo a kapisi a pirak.+ Iti kamaudiananna, dagitoy impanda ni Jose idiay Egipto.

29 Idi agangay nagsubli ni Ruben iti bito ket adtoy awan ni Jose iti bito. Gapu itoy rinay-abna dagiti kawesna.+ 30 Idi nagsubli kadagiti dadduma a kakabsatna inyebkasna: “Awanen ti ubing! Ket siak—sadino ngaruden ti papanak?”+

31 Nupay kasta, innalada ti nagayad a kawes ni Jose ket nangpartida iti maysa a kalakian a kalding ket maulit-ulit nga insawsawda ti nagayad a kawes iti dara.+ 32 Kalpasan dayta impatulodda ti nagayad a garitgaritan a kawes ket impaipanda ken amada ket kinunada: “Daytoy ti nasarakanmi. Sukimatem,+ pangngaasim, no isu ti nagayad a kawes ti anakmo wenno saan.”+ 33 Ket sinuksukimatna dayta ket inyebkasna: “Isu ti nagayad a kawes ti anakko! Maysa la ketdi a nadamsak nga atap nga animal ti nangalun-on kenkuana!+ Sigurado a ni Jose narangrangkay!”+ 34 Iti dayta rinay-ab ni Jacob dagiti kagayna ket nangikapet iti tinakpil iti padingpadingna ket nagtultuloy a nagleddaang gapu iti anakna iti adu nga aldaw.+ 35 Ket amin nga annakna a lallaki ken amin nga annakna a babbai timmaktakderda tapno liwliwaenda,+ ngem nagkitkitakit a paliwliwa ket kunkunana:+ “Ta bumabaakto a sileleddaang iti anakko idiay Sheol!” Ket nagtultuloy a sinangitan ni amana.

36 Nupay kasta, isu inlako dagiti Midianita idiay Egipto ken ni Potifar nga opisial ti palasio ni Faraon,+ ti panguluen dagiti para-guardia.+