1 Cronicas

29 Ni David nga ari kinunana ita iti intero a kongregasion:+ “Ni Solomon nga anakko, daydiay pinili ti Dios,+ agtutubo+ ken nalami, ngem ti trabaho dakkel; ta ti kastilio saan nga agpaay iti tao,+ no di ket agpaay ken Jehova a Dios. 2 Ket maitunos iti isuamin a pannakabalinko+ insaganak+ maipaay iti balay ti Diosko ti balitok+ maipaay iti aramid a balitok, ken ti pirak maipaay iti aramid a pirak, ken ti gambang maipaay iti aramid a gambang, ken ti landok+ maipaay iti aramid a landok, ken dagiti kayo+ maipaay iti aramid a kayo; batbato nga onix,+ ken batbato a maitampok iti natangken nga argamasa, ken dagiti mosaiko a bagging, ken tunggal napateg a bato, ken nakaad-adu unay nga alabastro a bato. 3 Ket yantangay maragragsakanak+ iti balay ti Diosko, adda pay naisangsangayan a sanikuak,+ balitok ken pirak; itedko dayta iti balay ti Diosko ken kangrunaan iti isuamin nga insaganak maipaay iti nasantuan a balay:+ 4 tallo ribu a talento a balitok iti balitok ti Ofir,+ ken pito ribu a talento a napasudi a pirak, a pangkalupkop kadagiti diding ti balbalay; 5 iti balitok maipaay iti aramid a balitok, ken iti pirak maipaay iti aramid a pirak ken maipaay iti isuamin nga aramid babaen iti ima dagiti nasigo a trabahador. Ket siasino ti agboluntario tapno punnuenna ti imana ita nga aldaw iti sagut a maipaay ken Jehova?”+

6 Ket nagboluntario ti piprinsipe+ dagiti balay ti amma+ ken ti piprinsipe+ dagiti tribu ti Israel ken dagiti panguluen ti rinibu+ ken ti ginasut+ ken dagiti panguluen ti aramid+ ti ari. 7 Iti kasta nangtedda maipaay iti panagserbi iti balay ti pudno a Dios iti balitok nga aggatad iti lima ribu a talento ken sangapulo a ribu a darik ken pirak nga aggatad iti sangapulo a ribu a talento ken gambang nga aggatad iti sangapulo ket walo a ribu a talento ken landok nga aggatad iti sangagasut a ribu a talento.+ 8 Ket no ania a batbato ti nasarakan iti asinoman a tao intedda iti gameng ti balay ni Jehova iti sidong ti panangaywan ni Jehiel+ a Gersonita.+ 9 Ket nagragrag-o dagiti umili gapu iti panangaramidda kadagiti boluntario a panagidaton, ta buyogen idi iti naan-anay a puso a nangipaayda kadagiti boluntario a daton ken Jehova;+ ket uray ni David nga ari nagrag-o a mismo buyogen ti dakkel a rag-o.+

10 Iti kasta ni David binenditona+ ni Jehova iti imatang ti intero a kongregasion+ ket kinuna ni David: “Benditoka koma,+ O Jehova a Dios ni Israel+ nga amami, manipud tiempo a di nakedngan agingga a mismo iti tiempo a di nakedngan. 11 Kukuam, O Jehova, ti kinanaindaklan+ ken ti kinamannakabalin+ ken ti kinapintas+ ken ti kinatan-ok+ ken ti dayaw;+ ta ti isuamin nga adda iti langlangit ken iti daga kukuam.+ Kukuam ti pagarian,+ O Jehova, Daydiay mangipangato met iti bagim kas pannakaulo ti isuamin.+ 12 Ti kinabaknang+ ken ti dayag+ maigapuda kenka, ket dominaram+ ti isuamin; ket ita imam adda bileg+ ken kinamannakabalin,+ ket ita imam adda pannakabael a panamagbalin a naindaklan+ ken panangipaay iti pigsa iti isuamin.+ 13 Ket ita, O Diosmi, agyamankami kenka+ ken idaydayawmi+ ti napintas+ a naganmo.

14 “Ket kaskasdi, siasinoak+ ken siasino ti ilik, tapno maaddaankami iti pannakabalin a mangaramid kadagiti boluntario a panagidaton a kas iti daytoy?+ Ta aggapu kenka ti amin a banag,+ ket manipud iti bukodmo nga ima nangtedkami kenka. 15 Ta ganggannaetkami nga agnanaed iti sanguanam ken makipaggigian+ a kas met laeng kadagidi amin nga ammami. Dagiti aldawmi ket kas iti maysa nga anniniwan iti rabaw ti daga+ ket awanan namnama. 16 O Jehova a Diosmi, isuamin daytoy a kinaruay nga insaganami tapno ibangonandaka iti balay maipaay iti nasantuan a naganmo, naggapu dayta iti imam, ket kukuam amin dayta.+ 17 Ket pagaammok unay, O Diosko, a maysaka a manangsukimat iti puso,+ ket pagragsakam ti kinalinteg.+ Siak, iti biangko, iti kinapalungdo ti pusok siboboluntario nga indatonko amin dagitoy a banag, ket ita ti ilim nga adda ditoy tinagiragsakko a makita a mangaramid kadagiti siboboluntario a panagidaton kenka. 18 O Jehova a Dios da Abraham, Isaac ken Israel nga ammami,+ salimetmetam daytoy agingga iti tiempo a di nakedngan kas ti pagannayasan dagiti panunot ti puso ti ilim,+ ket iturongmo kenka ti pusoda.+ 19 Ket itdem ken Solomon nga anakko ti maysa a naan-anay a puso+ tapno salimetmetanna dagiti bilinmo,+ dagiti pammaneknekmo+ ken dagiti alagadem,+ ken tapno aramidenna ti amin a banag, ken tapno ibangonna ti kastilio+ nga insaganaak.”+

20 Ket kinuna ni David iti intero a kongregasion:+ “Bendituenyo,+ ita, ni Jehova a Diosyo.” Ket ti intero a kongregasion binenditoda ni Jehova a Dios dagidi ammada ket nagrukobda+ ket inruknoyda+ ti bagbagida ken Jehova ken iti ari. 21 Ket intuloyda ti agisakripisio+ kadagiti sakripisio ken Jehova ken agidaton iti mapuoran a datdaton+ ken Jehova iti aldaw a simmaruno iti dayta nga aldaw, sangaribu nga urbon a toro, sangaribu a kalakian a karnero, sangaribu a kalakian a kordero ken datdatonda nga inumen,+ uray dagiti sakripisio iti dakkel a bilang maipaay iti intero nga Israel.+ 22 Ket intuloyda ti nangan ken imminum iti sanguanan ni Jehova iti dayta nga aldaw buyogen ti dakkel a panagrag-o;+ ket iti maikadua a daras pinagbalinda nga ari ni Solomon nga anak ni David+ ket pinulotanda ken Jehova kas panguluen+ ken kasta met ni Sadok+ kas padi. 23 Ket nangrugi nga agtugaw ni Solomon iti trono ni Jehova+ kas ari a mangsandi ken David nga amana ken maaddaan balligi iti dayta,+ ket amin dagiti Israelita nagtulnogda kenkuana. 24 No maipapan kadagiti amin a prinsipe+ ken kadagiti nabileg a lallaki+ ken kasta met iti amin nga annak ni Ari David,+ nagpasakupda ken Solomon nga ari. 25 Ket intuloy ni Jehova a pagbalinen ni Solomon a naindaklan unay+ iti imatang ti intero nga Israel ken ikabil kenkuana ti kasta a naarian a dayaw a saan pay a dimteng iti asinoman nga ari sakbay kenkuana iti Israel.+

26 No maipapan ken David nga anak ni Jesse, nagturay iti intero nga Israel;+ 27 Ket dagiti aldaw a panagturayna iti Israel uppat a puloda a tawen.+ Idiay Hebron nagturay iti pito a tawen,+ ket idiay Jerusalem nagturay iti tallopulo ket tallo a tawen.+ 28 Ket idi agangay natay iti maysa a naimbag a kinalakay,+ napnek iti al-aldaw, kinabaknang+ ken dayag;+ ket ni Solomon nga anakna nangrugi nga agturay a mangsandi kenkuana.+ 29 No maipapan kadagiti pasamak ni David nga ari, dagidiay immuna ken ti naudi, sadiay naisuratda kadagiti sao ni Samuel a pumaparmata+ ken kadagiti sao ni Natan+ a mammadto ken kadagiti sao ni Gad+ a managsirmata, 30 agraman ti isuamin a kinaarina ken kinamannakabalinna ken dagiti tiempo+ a limmabas kenkuana ken iti Israel ken kadagiti amin a pagarian ti dagdaga.+