Eclesiastes
10 Dagiti natay a ngilaw isuda ti mangpabangsit iti lana ti agar-aramid iti sapsapo,+ mamagburek. Kasta ti aramiden ti bassit a kinamaag iti maysa a napateg gapu iti sirib ken dayag.+
2 Ti puso ti masirib adda iti makannawanna,+ ngem ti puso ti maag adda iti makannigidna.+ 3 Ken kasta met nga iti aniaman a dalan a pagpagnaan daydiay maag,+ ti bukodna a puso agkurang, ket pudno a sawenna iti isuamin nga isu ket maag.+
4 No ti espiritu ti maysa nga agturay ngumato a bumusor kenka, saanmo a panawan ti bukodmo a disso,+ ta ti met laeng kinaalumamay ep-epenna dagiti dadakkel a basol.+
5 Adda maysa a banag a makadidigra a nakitak iti baba ti init, kas no adda biddut+ a tumataud maigapu iti daydiay adda iti pannakabalin:+ 6 Ti kinamaag naikabil kadagiti adu a nangato a saad,+ ngem dagidiay baknang agtultuloyda nga agnaed laeng iti nababa a kasasaad.
7 Nakakitaak kadagiti adipen a nakakabalio ngem dagiti prinsipe magmagnada iti daga a kaslada ad-adipen.+
8 Ti mangkalkali iti abut matnagto a mismo iti dayta;+ ket ti manggutgutbaw iti pader a bato, isu kagatento ti serpiente.+
9 Ti mangtebtebbag kadagiti bato masaktanto kadakuada. Ti mangpispisi kadagiti tarikayo kasapulanto nga agannad kadakuada.+
10 No ti landok a rimienta ngumudel ket ti tademna saan nga inasa ti asinoman,+ ngarud gaedannanto nga usaren dagiti bukodna a kired. Gapuna ti panangusar iti sirib tapno agballigi kaipapananna ti pagsayaatan.+
11 No ti serpiente kumagat idinto ta awan pay naibunga a panangkayaw,+ ngarud awan pagsayaatan daydiay agus-usar iti dila.
12 Ti sasao ti ngiwat daydiay masirib kaipapananna ti parabur,+ ngem daydiay maag alun-onen a mismo dagiti bibigna.+ 13 Ti rugi ti sasao ti ngiwatna kinamaag,+ ket ti tungpal kalpasanna ti ngiwatna isu ti makadidigra a kinamauyong. 14 Ket daydiay maag agsao iti adu a sasao.+
Ti tao saanna nga ammo no ania ti maaddanto; ket daydiay maaddanto a sumaruno kenkuana, siasino ti makaibaga kenkuana?+
15 Ti napinget a panagtrabaho dagidiay maag pakilenna ida,+ agsipud ta awan maysa a makaammo no kasano ti ipapan idiay siudad.+
16 Kasanonto dayta kenka, O daga, no ti arim maysa nga ubing+ ket dagiti bukodmo a prinsipe agtultuloyda a mangan uray iti bigat? 17 Naragsakka, O daga, no ti arim isu ti anak dagidiay natatan-ok ket dagiti bukodmo a prinsipe manganda iti umiso a tiempo maipaay iti kinabileg, saan a maipaay iti iyiinum laeng.+
18 Gapu iti dakkel a kinasadut agbayukyok ti aramid nga awanan, ket gapu iti panangibaba kadagiti ima agubo ti balay.+
19 Ti tinapay ket agpaay iti panagkatawa dagiti trabahador, ket ti met laeng arak pagrag-oenna ti biag;+ ngem ti kuarta isu ti mangipaay ti sungbat iti amin a bambanag.+
20 Uray iti siled a pagturogam saanmo nga idawdawat ti pakadaksan ti mismo nga ari,+ ket kadagiti makin-uneg a siled a pagiddaam saanmo nga idawdawat ti pakadaksan ti asinoman a nabaknang;+ ta ti maysa nga agtaytayab a parsua iti langlangit idanonnanto ti timek ket ti maysa nga addaan kadagiti payak ibagananto daydiay a banag.+