Jeremias
28 Kalpasanna naaramid iti dayta a tawen, iti panangrugi ti pagarian ni Zedekias+ nga ari ti Juda, iti maikapat a tawen, iti maikalima a bulan, a ni Hananias+ nga anak ni Azur, ti mammadto a naggapu iti Gabaon,+ kinunana kaniak iti balay ni Jehova iti imatang ti papadi ken dagiti amin nga umili: 2 “Daytoy ti kinuna ni Jehova ti buybuyot, ti Dios ti Israel, ‘Tukkolekto ti sangol ti ari ti Babilonia.+ 3 Iti las-ud ti dua pay a naan-anay a tawen isublik iti daytoy a disso amin dagiti aruaten ti balay ni Jehova nga innala ni Nabucodonosor nga ari ti Babilonia+ manipud iti daytoy a disso tapno ipanna ida idiay Babilonia.’” 4 “‘Ket ni Jeconias+ nga anak ni Jehoiaquim,+ ti ari ti Juda, ken amin dagiti destiero ti Juda a naipan iti Babilonia+ isublik iti daytoy a disso,’ kuna ni Jehova, ‘ta tukkolekto ti sangol+ ti ari ti Babilonia.’”
5 Ket ni Jeremias a mammadto kinunana ken Hananias a mammadto iti imatang ti papadi ken iti imatang dagiti amin nga umili a sitatakder iti balay ni Jehova;+ 6 wen, ni Jeremias a mammadto kinunana: “Amen!+ Kasta koma ti aramiden ni Jehova! Patalgedan koma ni Jehova ti sasaom nga impadtom babaen ti panangisublina iti daytoy a disso manipud Babilonia kadagiti aruaten ti balay ni Jehova ken amin dagiti naidestiero nga umili!+ 7 Nupay kasta, denggem, pangngaasim, daytoy a sao a sawek kadagiti lapayagmo ken kadagiti lapayag dagiti amin nga umili.+ 8 No maipapan kadagiti mammadto nga immun-una idi ngem siak ken immun-una ngem sika manipud iti nabayagen a tiempo,+ agipadpadtoda met idi maipapan kadagiti adu a daga ken maipapan kadagiti dadakkel a pagarian, iti gubat ken iti didigra ken iti angol.+ 9 No maipapan iti mammadto nga agipadto iti talna,+ inton pumudno ti sao ti mammadto, maammuanto ti mammadto a pudno nga imbaon ni Jehova.”+
10 Gapu itoy ni Hananias a mammadto innalana ti barra ti sangol iti tengnged ni Jeremias a mammadto ket tinukkolna.+ 11 Ket kinuna ni Hananias+ iti imatang dagiti amin nga umili: “Daytoy ti kinuna ni Jehova,+ ‘Kastoy ti panangtukkolkonto iti sangol ni Nabucodonosor nga ari ti Babilonia iti las-ud ti intero a dua pay a tawen manipud iti tengnged dagiti amin a nasion.’”+ Ket ni Jeremias a mammadto napan iti dalanna.+
12 Idin ti sao ni Jehova dimteng ken Jeremias,+ kalpasan a ni Hananias a mammadto tinukkolna ti barra ti sangol manipud iti tengnged ni Jeremias a mammadto, a kunkunana: 13 “Mapanka, ket masapul a kunaem ken Hananias, ‘Daytoy ti kinuna ni Jehova: “Dagiti barra ti sangol+ a kayo tinukkolmo, ket imbes a dagita kasapulan a mangaramidkanto kadagiti barra ti sangol a landok.”+ 14 Ta daytoy ti kinuna ni Jehova ti buybuyot, ti Dios ti Israel: “Maysa a sangol a landok ikabilkonto iti tengnged dagitoy amin a nasion, tapno agserbida ken Nabucodonosor nga ari ti Babilonia;+ ket masapul nga agserbida kenkuana.+ Ket uray dagiti atap nga animal iti tay-ak itedkonto kenkuana.”’”+
15 Ket ni Jeremias a mammadto kinunana ken Hananias+ a mammadto: “Umimdengka, pangngaasim, O Hananias! Saannaka nga imbaon ni Jehova, ngem daytoy nga ili pinagtalekmo iti kinaulbod.+ 16 Gapuna daytoy ti kinuna ni Jehova, ‘Adtoy! Papanawenka iti rabaw ti daga. Iti daytoy a tawen mataykanto,+ ta nagsaoka iti nalawag nga iyaalsa ken Jehova.’”+
17 Gapuna ni Hananias a mammadto natay iti dayta a tawen, iti maikapito a bulan.+