Jeremias

35 Ti sao a dimteng ken Jeremias manipud ken Jehova idi kaaldawan ni Jehoiaquim+ nga anak ni Josias, ti ari ti Juda, a kunkunana: 2 “Mapanka iti balay dagiti Recabita,+ ket masapul a makisaoka kadakuada ket iserrekmo ida iti balay ni Jehova, iti maysa kadagiti siled a panganan; ket masapul nga ikkam ida iti arak nga inumen.”

3 Gapuna innalak ni Jaazanias nga anak ni Jeremias nga anak ni Habazinias ken ti kakabsatna, ken amin nga annakna, ken ti isuamin a sangakabbalayan dagiti Recabita, 4 ket inserrekko ida iti balay ni Jehova, iti siled a panganan+ ti annak ni Hanan nga anak ni Igdalias, maysa a lalaki ti pudno a Dios, nga adda idi iti abay ti siled a panganan dagiti prinsipe nga adda iti ngatuen ti siled a panganan ni Maasias nga anak ni Sallum+ nga agay-aywan iti ruangan. 5 Kalpasanna iti sanguanan ti annak ti balay dagiti Recabita nangikabilak kadagiti kopa a napno iti arak ken kopkopita ket kinunak kadakuada: “Uminumkayo iti arak.”

6 Ngem kinunada: “Saankamto nga uminum iti arak, agsipud ta ni Jonadab nga anak ni Recab,+ daydi amami, isu daydiay nangipasdek iti bilin kadakami, a kinunana, ‘Dikay uminum iti arak, uray dakayo wenno ti annakyo, agingga iti tiempo a di nakedngan.+ 7 Ket dikay mangbangon iti balay, ken dikay agimula iti bin-i; ket dikay agmula iti kaubasan, dikay met tagikuaen dayta. No di ket rebbeng nga agnaedkay kadagiti tolda iti amin nga al-aldawyo, tapno makapagtultuloykayo nga agbiag iti adu nga aldaw iti rabaw ti daga a pagtataenganyo kas ganggannaet.’+ 8 Gapuna itultuloymi ti agtulnog iti timek ni Jehonadab nga anak ni Recab nga amami iti isuamin nga imbilinna+ kadakami iti saanmi nga iyiinum iti arak iti amin nga al-aldawmi, dakami, dagiti assawami, ti annakmi a lallaki ken annakmi a babbai,+ 9 ken iti saan a panagbangon iti balbalay a pagnaedanmi, tapno awan kaubasan wenno talon wenno bin-i nga agbalinto a kukuami. 10 Ket agtultuloykami nga agnaed kadagiti tolda ken agtulnog ken agaramid maitunos iti isuamin nga imbilin kadakami ni Jonadab+ nga amami.+ 11 Ngem naaramid idi a ni Nabucodorosor nga ari ti Babilonia simmang-at a maibusor iti daga+ a rinugianmi a kunaen, ‘Umaykayo, ket sumrektayo iti Jerusalem gapu iti puersa militar dagiti Caldeo ken gapu iti puersa militar dagiti Sirio, ket agnaedtayo iti Jerusalem.’”+

12 Ket ti sao ni Jehova dimteng ken Jeremias, a kunkunana: 13 “Daytoy ti kinuna ni Jehova ti buybuyot, ti Dios ti Israel, ‘Mapanka, ket masapul a kunaem kadagiti lallaki ti Juda ken kadagiti agnanaed iti Jerusalem: “Saan kadi a nagtultuloykayo nga immawat iti pammagbaga nga agtulnogkayo iti sasaok?”+ kuna ni Jehova. 14 “Adda panangitungpal iti sasao ni Jehonadab nga anak ni Recab,+ nga imbilinna iti annakna, a saanda nga uminum iti arak, ket awan ininumda agingga itoy nga aldaw, agsipud ta nagtulnogda iti bilin daydi amada.+ Ket no maipapan kaniak, nagsaoak kadakayo, a bimmangonak a nasapa ket nagsaoak,+ ngem saankayo a nagtulnog kaniak.+ 15 Ket imbabaonko kadakayo dagiti amin nga adipenko a mammadto,+ a bimmangonak a nasapa ket imbaonko ida, a kinunak, ‘Agbaw-ingkayo, pangngaasiyo, tunggal maysa manipud dakes a dalanna,+ ket pasayaatenyo dagiti pannakilangenyo,+ ket dikay sumurot kadagiti sabali a didios tapno agserbikayo kadakuada.+ Ket nagnanaedkayo iti daga nga intedko kadakayo ken kadagidi ammayo.’+ Ngem saanyo nga inyallingag ti lapayagyo, saankayo met nga immimdeng kaniak.+ 16 Ngem intungpal ti annak ni Jehonadab nga anak ni Recab+ ti bilin daydi amada nga imbilinna kadakuada;+ ngem no maipapan iti daytoy nga ili, saanda nga immimdeng kaniak.”’”+

17 “Gapuna daytoy ti kinuna ni Jehova, ti Dios ti buybuyot, ti Dios ti Israel, ‘Adtoy ipagtengko iti Juda ken kadagiti amin nga agnanaed iti Jerusalem ti isuamin a didigra a sinaok maibusor kadakuada,+ gapu ta nagsaoak kadakuada ngem saanda nga immimdeng, ket immaw-awagak kadakuada ngem saanda a simmungbat.’”+

18 Ket iti sangakabbalayan dagiti Recabita kinuna ni Jeremias: “Daytoy ti kinuna ni Jehova ti buybuyot, ti Dios ti Israel, ‘Gapu ta nagtulnogkayo iti bilin ni Jehonadab+ nga amayo ken itultuloyyo a salimetmetan amin dagiti bilinna ken aramiden ti maitunos iti isuamin nga imbilinna kadakayo,+ 19 gapuna daytoy ti kinuna ni Jehova ti buybuyot, ti Dios ti Israel: “Manipud ken Jonadab nga anak ni Recab awanto ti magessat a maysa a lalaki nga agtakder+ iti sanguanak a kanayon.”’”+