Aramid

10 Itan idiay Cesarea adda idi maysa a lalaki a managan Cornelio, maysa nga opisial ti buyot+ iti bunggoy nga Italiano,+ kas iti pannakaawagna, 2 napeklan a tao+ ken maysa a managbuteng+ iti Dios agraman ti intero a sangakabbalayanna, ket nangipaay iti adu a sagut ti asi kadagiti umili+ ket nagtultuloy nga immararaw iti Dios.+ 3 Idi agarup maikasiam nga oras+ ti aldaw nakitana a silalawag iti sirmata+ nga umay kenkuana ti maysa nga anghel+ ti Dios ket kunana kenkuana: “Cornelio!” 4 Kimmita kenkuana ti lalaki ket, sibubuteng, kinunana: “Ania daydiay, Apo?” Kinunana kenkuana: “Dagiti kararagmo+ ken dagiti sagutmo ti asi nagpangatoda a kas pakalaglagipan iti sanguanan ti Dios.+ 5 Gapuna ita mangibaonka kadagiti lallaki a mapan idiay Joppe ket pasukonmo ti maysa a Simon a napanaganan Pedro. 6 Daytoy a tao sangsangailien ti maysa a Simon, maysa nga agkurkurti iti lalat, nga adda balayna iti igid ti baybay.”+ 7 Apaman a nakapanaw ti anghel a nakisao kenkuana, nangayab iti dua kadagiti adipenna iti balay ken iti maysa a napeklan a soldado manipud kadagidiay naynay nga agserserbi kenkuana,+ 8 ket insalaysayna kadakuada ti isuamin ket imbaonna ida idiay Joppe.+

9 Iti sumaganad nga aldaw bayat nga intultuloyda ti panagbaniagada ken umas-asidegda iti siudad, immuli ni Pedro iti tuktok ti balay+ idi agarup maikanem nga oras tapno agkararag.+ 10 Ngem nagbisin unay ket kayatna idi ti mangan. Bayat nga agisagsaganada, naimayeng+ 11 ket nakitana ti langit a naluktan+ ken ti maysa a kita ti pagkargaan a bumabbaba a kas iti dakkel nga ules a lienso a maipabpababa iti daga babaen iti uppat nga ungtona; 12 ket iti dayta adda dagiti amin a kita ti uppat-sakana a parparsua ken ti agkarkarayam a bambanag iti daga ken dagiti tumatayab sadi langit.+ 13 Ket adda timek nga immay kenkuana: “Tumakderka, Pedro, pumartika ket manganka!”+ 14 Ngem kinuna ni Pedro: “Nikaanoman, Apo, agsipud ta diak pay pulos nangan iti aniaman a natulawan ken narugit.”+ 15 Ket ti timek nagsao manen kenkuana, iti maikadua a daras: “Isardengmon nga awagan natulawan+ ti bambanag a dinalusanen ti Dios.” 16 Napasamak daytoy iti maikatlo a daras, ket dagus a ti pagkargaan naipangato sadi langit.+

17 Itan bayat a ni Pedro mariribukan unay iti unegna no ania ti mabalin a kaipapanan ti sirmata a nakitana, adtoy! dagiti lallaki nga imbaon ni Cornelio nagdamagda maipapan iti balay ni Simon ket nagtakderda idiay ruangan.+ 18 Ket immayabda ket inimtuodda no masangsangaili sadiay ni Simon a napanaganan Pedro. 19 Bayat a ni Pedro us-usigenna iti panunotna ti maipapan iti sirmata, kinuna ti espiritu:+ “Adtoy! Tallo a lallaki ti mangsapsapul kenka. 20 Nupay kasta, tumakderka, umulogka ket mapanka makikuyog kadakuada, a saanka a pulos agduadua, agsipud ta imbaonko ida.”+ 21 Gapuna immulog ni Pedro a nagturong kadagiti lallaki ket kinunana: “Adtoy! Siak daydiay sapsapulenyo. Ania ti makagapu nga addakayo?” 22 Kinunada: “Ni Cornelio, maysa nga opisial ti buyot, lalaki a nalinteg ken managbuteng iti Dios+ ken naimbag ti damagna+ iti intero a nasion dagiti Judio, naipaayan kadagiti nadibinuan a pammilin babaen ti maysa a nasantuan nga anghel tapno paayabannaka nga umay iti balayna ken tapno denggenna ti bambanag a sawem.” 23 Gapuna inawisna ida a sumrek ket sinangailina ida.

Iti sumaganad nga aldaw bimmangon ket kimmuyog kadakuada, ket sumagmamano kadagiti kakabsat manipud Joppe kimmuyogda kenkuana. 24 Iti aldaw kalpasan dayta isu simrek idiay Cesarea. Ni Cornelio, siempre, sinegseggaanna ida ket inayabanna a sangsangkamaysa dagiti kabagianna ken nasinged a gagayyemna. 25 Idi simrek ni Pedro, sinabet ni Cornelio, nagkurno iti sakaananna ket nagruknoy kenkuana. 26 Ngem isu pinatakder ni Pedro, a kunkunana: “Tumakderka; siak maysaak met a tao.”+ 27 Ket bayat a nakisasao kenkuana isu simrek ket nasarakanna ti adu a tattao a naguummong, 28 ket kinunana kadakuada: “Pagaammoyo unay no kasano nga iparit ti linteg a ti maysa a Judio makitipon wenno umasideg iti tao a sabali ti pulina;+ ket kaskasdi a ti Dios impakitana kaniak nga awan koma ti tao a naganek iti natulawan wenno narugit.+ 29 Gapuna immayak, pudno nga awanan panagkedked, idi napaayabanak. Gapuna imtuodek ti rason no apay a pinaayabandak.”

30 Iti kasta kinuna ni Cornelio: “Uppat nga aldaw ti napalabasen no bilangen manipud itoy nga oras agkarkararagak idi iti balayko iti maikasiam nga oras,+ idi nga, adtoy! maysa a lalaki a nasileng ti kawesna+ nagtakder iti sanguanak 31 ket kinunana, ‘Cornelio, ti kararagmo siaanamong a naimdengan ket dagiti sagutmo ti asi nalagip iti sanguanan ti Dios.+ 32 Agbaonka, ngarud, idiay Joppe ket paayabam ni Simon, a napanaganan Pedro.+ Daytoy a lalaki masangsangaili iti balay ni Simon, maysa nga agkurkurti iti lalat, iti igid ti baybay.’+ 33 Gapuna nagbaonak a dagus kenka, ket naimbag ti inaramidmo nga immayka ditoy. Ket ngarud iti daytoy a tiempo addakami amin iti sanguanan ti Dios tapno denggenmi ti amin a bambanag nga imbilin kenka ni Jehova a sawem.”+

34 Gapu itoy linuktan ni Pedro ti ngiwatna ket kinunana: “Iti kinapudnona makitak a ti Dios saan a mangidumduma,+ 35 no di ket iti tunggal nasion anamonganna ti tao nga agbuteng kenkuana ken agaramid iti kinalinteg.+ 36 Impatulodna ti sao+ iti annak ti Israel tapno ideklara kadakuada ti naimbag a damag ti talna+ baeten ken Jesu-Kristo: Daytoy ket Apo ti amin a sabsabali.+ 37 Ammoyo ti banag a napagsasaritaan iti intero a Judea, mangrugi idiay Galilea kalpasan ti pammautisar nga inkaskasaba ni Juan,+ 38 awan sabali, ni Jesus a taga Nazaret, no kasano a pinulotan ti Dios iti nasantuan nga espiritu+ ken pannakabalin, ket namagpagna iti daga nga ar-aramidenna ti naimbag ket papaimbagenna amin dagidiay inrurumen ti Diablo;+ agsipud ta ti Dios adda kenkuana.+ 39 Ket saksikami iti amin a bambanag nga inaramidna agpadpada idiay pagilian dagiti Judio ken idiay Jerusalem; ngem pinapatayda met babaen iti panangibitinda kenkuana iti maysa a kayo.+ 40 Ti Dios imbangonna Daytoy iti maikatlo nga aldaw ket pinalubosanna a maiparangarang,+ 41 saan a kadagiti amin a tattao, no di ket kadagiti saksi a nasaksakbay a dinutokan ti Dios,+ kadakami, a nakipangan ken nakiinum kenkuana+ kalpasan ti panagungarna kadagiti natay. 42 Kasta met, imbilinna a mangasabakami+ kadagiti tattao ken mangipaay iti naan-anay a pangsaksi nga isu daytoy ti Maysa nga inkeddeng ti Dios nga agbalin nga ukom dagiti sibibiag ken dagiti natay.+ 43 Kenkuana dagiti amin a mammadto mangsaksida,+ a tunggal maysa a maaddaan iti pammati kenkuana umawat iti pannakapakawan ti basbasol babaen iti naganna.”+

44 Bayat nga agsasao pay laeng ni Pedro maipapan kadagitoy a banag bimmaba ti nasantuan nga espiritu kadagidiay amin a dumdumngeg iti sao.+ 45 Ket nagsiddaaw dagiti matalek a nakikuyog ken Pedro isuda a kameng dagidiay nakugit, agsipud ta ti awan bayadna a sagut ti nasantuan nga espiritu maiparparukpok met kadagiti tattao iti nasnasion.+ 46 Ta nangngegda ida nga agsasao kadagiti pagsasao ken mangitantan-ok iti Dios.+ Idin simmungbat ni Pedro: 47 “Adda kadi asinoman a makaipawil iti danum tapno saan a mabautisaran+ dagitoy nga immawat iti nasantuan nga espiritu a kas met kadatayo?” 48 Iti kasta imbilinna kadakuada a mabautisaranda iti nagan ni Jesu-Kristo.+ Kalpasanna kiniddawda kenkuana nga agtalinaed iti sumagmamano nga aldaw.