Deuteronomio

26 “Inton makastrekkayon iti daga nga ited ni Jehova a Diosyo kas tawidyo, ket natagikua ken agnanaedkayon iti dayta, 2 mangalakayo iti sumagmamano iti amin nga umuna a bungbunga ti apit* iti daga nga inted kadakayo ni Jehova a Diosyo. Ikabilyo dagita iti basket ket mapankayo iti disso a pilien ni Jehova a Diosyo a pakaidaydayawan ti naganna.+ 3 Mapankayo iti agdama a padi ket ibagayo, ‘Kayatko nga ipakaammo ken Jehova a Diosyo a nakadanonak iti daga nga inkari ni Jehova kadagidi ammatayo nga itedna kadatayo.’+

4 “Alaen ti padi ti basket ket ikabilna iti sanguanan ti altar ni Jehova a Diosyo. 5 Kalpasanna, ibagayo iti sanguanan ni Jehova a Diosyo, ‘Maysa nga agakar-akar* nga Arameano+ ti amak, ken napan nagnaed idiay Egipto+ kas ganggannaet agraman ti bassit a sangakabbalayanna.+ Ngem nagbalin a dakkel ken nabileg a nasion.+ 6 Minaltrato, inrurumen, ken nakaro ti panangadipen dagiti Egipcio kadakami.+ 7 Gapuna, nagpatulongkami ken Jehova a Dios dagidi ammami, ket impangagnakami ni Jehova ta nakitana a marigrigatan, marirriribukan, ken mairurrurumenkami.+ 8 Kamaudiananna, inruarnakami ni Jehova idiay Egipto babaen ti mannakabalin nga ima, nabileg* a takiag,+ ken nakabutbuteng nga ar-aramid, pagilasinan, ken milagro.+ 9 Impannakami iti daytoy a disso ken intedna kadakami daytoy a daga, a pagay-ayusan ti gatas ken diro.+ 10 Ita, iyegko dagitoy umuna a bungbunga ti daga nga inted kaniak ni Jehova.’+

“Ikabilyo dagita iti sanguanan ni Jehova a Diosyo ket agruknoykayo iti sanguanan ni Jehova a Diosyo. 11 Iti kasta, agragsakkayo gapu iti amin a naimbag nga inted kadakayo ni Jehova a Diosyo ken iti sangakabbalayanyo—dakayo, dagiti Levita, ken dagiti ganggannaet a residente.+

12 “Iti maikatlo a tawen, ti tawen ti apagkapullo, urnongenyo ti apagkapullo+ ti amin nga apityo ket itedyo kadagiti Levita, ganggannaet a residente, awanan ama nga ubbing,* balo a babbai, ket manganda agingga a mapnekda iti uneg dagiti siudadyo.*+ 13 Kalpasanna, ibagayonto iti sanguanan ni Jehova a Diosyo, ‘Nailasinkon dagiti nasantuan a banag iti balayko ken naitedkon iti Levita, ganggannaet a residente, awanan ama nga ubing, ken balo a babai,+ kas imbilinmo. Diak sinukir wenno linipatan dagiti bilinmo. 14 Diak nangan iti aniaman a nasantuan bayat nga agladladingitak, ken diak sinagid dagita bayat a narugitak, ken diak inusar dagita kadagiti natay. Tinungpalko ti timekmo, Jehova a Diosko, ken inaramidko amin nga imbilinmo kaniak. 15 Ita, tuman-awka manipud iti nasantuan a pagnanaedam, ti langit, ket bendisionam ti ilim nga Israel ken ti daga nga intedmo kadakami,+ kas inkarim kadagidi ammami,+ ti daga a pagay-ayusan ti gatas ken diro.’+

16 “Ita nga aldaw, ibilin kadakayo ni Jehova a Diosyo a tungpalenyo dagitoy a regulasion ken pangngeddeng. Salimetmetan ken tungpalenyo dagitoy iti amin a puso+ ken iti amin a kararuayo.* 17 Ita, imbaga kadakayo ni Jehova nga agbalin a Diosyo no magnakayo iti dalanna ken tungpalenyo dagiti regulasion,+ bilin,+ ken pangngeddengna,+ ken no ipangagyo ti timekna. 18 Bigbigen met ita ni Jehova a dakayo ti ilina, ti espesial a sanikuana,*+ kas inkarina kadakayo, ket tungpalenyo ti amin a bilinna. 19 Iti kasta, pagbalinennakayto a natantan-ok ngem iti amin a nasion nga inaramidna,+ ket ipaayannakayo iti dayaw, kinalatak, ken dayag no la ket ta paneknekanyo ken Jehova a Diosyo a nasantuankayo nga ili,+ kas inkarina.”