Oseas

3 Imbaga kaniak ni Jehova: “Inka manen ayaten ti babai nga ay-ayaten ti sabali a lalaki ken makikamkamalala,+ kas iti panagayat ni Jehova kadagiti tattao iti Israel+ bayat nga agdaydayawda kadagiti sabali a dios+ ken magusgustuanda dagiti bibingka a pasas.”*

2 Isu a ginatangko iti 15 a pedaso a pirak ken maysa ket kagudua a homer* a sebada. 3 Kalpasanna, imbagak kenkuana: “Makipagyankanto kaniak iti adu nga aldaw. Saanka nga agbalangkantis,* ken saanka a makirelasion iti sabali a lalaki, ket kastaakto met kenka.”*

4 Gapu ta iti adu a tiempo,* dagiti tattao iti Israel ket awananto iti ari,+ prinsipe, daton, sagrado nga adigi, efod,+ ken terafim nga estatua.*+ 5 Kalpasanna, agsublinto dagiti tattao iti Israel ken sapulenda ni Jehova a Diosda+ ken ni David nga arida,+ ket umaydanto ken Jehova gapu iti panagbutengda kenkuana ken gapu iti kinaimbagna iti maudi a paset dagiti aldaw.+