Levitico

26 “‘Dikay agaramid iti awan serserbina a didiosen,+ kinitikitan nga imahen,+ sagrado nga adigi, wenno kinitikitan a bato+ a pagdayawanyo;+ ta siak ni Jehova a Diosyo. 2 Masapul a ngilinenyo dagiti sabbathko ken raemenyo* ti santuariok. Siak ni Jehova.

3 “‘No itultuloyyo a suroten dagiti paglintegak ken tungpalen dagiti bilinko ken aramidenyo dagita,+ 4 pagtuduekto iti umiso a tiempo,+ ket agapitkayto+ ken agbunganto dagiti mulayo a kayo. 5 Adunto ti maapityo ta agan-anikayto pay laeng uray no panagbuburasen iti ubas, ken agburburaskayto pay laeng iti ubas uray no panagmumulan iti bin-i. Mapnekkayto a mangan iti taraonyo ken natalgedkayto iti dagayo.+ 6 Mangipaayakto iti talna iti daga,+ ket maturogkayto a saan a mabutbuteng.+ Pukawekto dagiti narungsot nga atap nga animal, ken awanto ti rumaut kadakayo a nakaespada. 7 Siguradonto nga abakenyo dagiti kabusoryo babaen ti espada. 8 Kabaelanto ti 5 kadakayo nga abaken ti 100, ket kabaelanto ti 100 nga abaken ti 10,000 a kabusor babaen ti espada.+

9 “‘Bendisionan* ken paaduenkayto.+ Tungpalekto ti tulagko kadakayo.+ 10 Adunto ti maapityo nga umanay agingga iti sumaruno a tawen nga uray la ibellengyo dagiti immuna nga apityo tapno adda pagyanan dagiti baro a maapityo. 11 Ikabilkonto ti tabernakulok iti tengngayo,+ ket saankayto a laksiden. 12 Addaakto iti tengngayo ken siakto ti Diosyo,+ ket dakayto ti ilik.+ 13 Siak ni Jehova a Diosyo, a nangiruar kadakayo idiay Egipto tapno saankayon a maadipen. Tinukkolko ti sangolyo tapno makapagtakder ken makapagnakayo a saan a nakadumog.*

14 “‘Ngem no saankayo a dumngeg kaniak ken diyo tungpalen amin dagitoy a bilin,+ 15 ken no laksidenyo dagiti paglintegak+ ken no kagurayo dagiti pangngeddengko ket diyo suroten ti amin a bilinko, ken sukirenyo ti tulagko,+ 16 dusaenkayto kadagitoy: Agdanagkayto gapu iti sarut ken nakaro a gurigor, a mamagkapuy kadagiti matayo ken mamagpatingga iti biagyo.* Agmulakayto iti bin-i ngem awanto ti maapityo ta dagiti kabusoryo ti manganto kadagita.+ 17 Ilaksidkayto ket abakendakayto dagiti kabusoryo.+ Ibaddebaddekdakayto dagidiay manggura kadakayo,+ ket agtaraykayto uray awan ti mangkamkamat kadakayo.+

18 “‘No saankay latta a dumngeg, mamimpitonto nga ad-adu a dusaenkayo gapu kadagiti basolyo. 19 Ikkatekto ti kinatangsityo ket pagbalinekto ti langityo a kas landok+ ken ti dagayo a kas gambang. 20 Awanto ti serserbi ti panagtrabahoyo ta awanto ti maapit kadagiti dagayo,+ ken saanto nga agbunga dagiti mulayo a kayo.

21 “‘Ngem no itultuloyyo ti agsukir kaniak ken dikay dumngeg, mamimpitonto nga ad-adu a dusaenkayo gapu kadagiti basolyo. 22 Ibaonkonto dagiti atap nga animal iti tengngayo,+ ket papatayendanto dagiti annakyo+ ken dagiti tarakenyo. Bumassitto ti bilangyo agingga a manmanon ti tao kadagiti kalsadayo.+

23 “‘No diyo latta awaten ti panangilintegko+ ken itultuloyyo ti bumusor kaniak, 24 umadayoakto met kadakayo, ket mamimpitonto nga ad-adu a dusaenkayo gapu kadagiti basolyo. 25 No diyo suroten ti tulagantayo,+ ipaluboskonto a rautendakayo dagiti kabusoryo babaen ti espada tapno madusakayo. No agkamangkayo kadagiti siudadyo, pagsakitenkayto,+ ket maparmekdakayto dagiti kabusoryo.+ 26 Inton dadaelek ti suplayyo* a tinapay,*+ maymaysanto nga urno ti paglutuan ti 10 a babbai iti tinapayyo ket timbangendanto dagiti tinapay nga itedda kadakayo.+ Mangankayto ngem dikay mapnek.+

27 “‘No dikay latta dumngeg kaniak ken itultuloyyo ti bumusor kaniak, 28 ad-addanto a busorenkayo,+ ket mamimpitonto nga ad-adu a dusaenkayo gapu kadagiti basolyo. 29 Iti kasta, kanenyonto ti lasag dagiti annakyo a lallaki ken babbai.+ 30 Dadaelekto dagiti nangato a disso a pagdaydayawanyo+ ken dagiti altar ti insienso ket pagtutuonekto dagiti bangkayyo iti rabaw dagiti awan biagna ken makarimon nga idoloyo,*+ ket karurodkayto.+ 31 Dadaelekto dagiti siudadyo+ ken dagiti pagdaydayawanyo, ket saanakto a maay-ayo* iti banglo dagiti datonyo. 32 Awanto ti agnaed iti daga,+ ket masdaawto dagiti kabusoryo a makakita iti dayta.+ 33 Iwarawarakayto kadagiti nasion,+ ket ipaluboskonto nga abakendakayo dagiti kabusoryo babaen ti espada.+ Awanto ti agnaed iti dagayo,+ ket madadaelto dagiti siudadyo.

34 “‘Iti tiempo nga addakayo iti daga dagiti kabusoryo, mapanawan ken makainananto ti dagayo, ta saan a napalubosan nga aginana ti dagayo* ken namulaan latta uray kadagiti sabbath.+ 35 Gapuna, no saanto a mamulaan ti dagayo, makainananto gapu ta idi pagnanaedanyo dayta, minulaanyo uray kadagiti tawen ti sabbath.

36 “‘No maipapan kadagiti makalasat,+ lapunosekto ti pusoda iti buteng iti daga dagiti kabusorda; ket agtaraydanto gapu iti mangngegda a karasakas ti maitayab a bulong, ken tumarayda a kasla kamkamaten ida ti nakaespada ken matumbada uray no awan ti kumamkamat kadakuada.+ 37 Agdidinnungpardanto uray awan ti nakaespada a mangkamkamat kadakuada. Diyonto kabaelan nga abaken dagiti kabusoryo.+ 38 Mataykayto iti tengnga dagiti nasion,+ ket maibuskayto iti daga dagiti kabusoryo. 39 Dagidiay makalasat iti daga dagiti kabusoryo+ in-inutto a marunotda gapu iti basolda ken iti basol dagiti ammada.+ 40 Iti kasta, ipudnodanto ti basolda+ ken ti saan a kinamatalek dagiti ammada ket aklonenda a saanda a nagmatalek ta intultuloyda ti nagsukir kaniak.+ 41 Umadayoakto kadakuada,+ ket itedkonto ida iti daga dagiti kabusorda.+

“‘Mabalin nga ipakumbabadanto ti nasukir* a pusoda,+ ket sagabaendanto ti epekto ti basolda. 42 Lagipekto ti tulagko ken Jacob,+ ti tulagko ken Isaac,+ ti tulagko ken Abraham,+ ket lagipekto ti daga. 43 Mapanawanto ti daga, a kasla napalubosan nga aginana, ta saanda a pinaginana kadagiti sabbath.+ Ikarodanto dagiti basolda ta sinukirda dagiti pangngeddengko ken ginurada dagiti paglintegak.+ 44 Ngem bayat nga addada iti daga dagiti kabusorda, saankonto a naan-anay a laksiden ida+ wenno guraen ida nga uray la mamimpinsan a papatayek ida ta saan a maitunos dayta iti tulagko+ kadakuada. Siak ni Jehova a Diosda. 45 Maigapu kadakuada, lagipekto ti tulagko kadagidi ammada+ nga inruarko idiay Egipto a nakita dagiti nasion,+ tapno agbalinak a Diosda. Siak ni Jehova.’”

46 Dagitoy ti regulasion, pangngeddeng, ken linteg nga inted ni Jehova kadagiti Israelita idiay Bantay Sinai babaen ken Moises.+