Deuteronomio

18 “Dagiti papadi a Levita, ken ti intero a tribu ni Levi ket saanto a maikkan iti bingay wenno tawid iti Israel. Manganda kadagiti daton a mapuoran para ken Jehova, ta dagita ti tawidna.+ 2 Gapuna, awan ti bingayda iti tawid dagiti kakabsatda. Ni Jehova ti tawidda, kas imbagana kadakuada.

3 “Daytoy ti maiparbeng a bingay dagiti papadi manipud kadagiti tattao: Asinoman nga agidaton iti baka wenno karnero, itedna iti padi ti abaga, panga, ken tian. 4 Itedyo kenkuana ti umuna nga apityo a bukbukel, baro nga arak, lana, ken ti umuna a delana manipud iti dutdot ti karnero.+ 5 Dagiti papadi ken dagiti annakda ti pinili ni Jehova a Diosyo manipud iti amin a tribu ti Israel tapno kanayon nga agserbi iti nagan ni Jehova.+

6 “Ngem no pumanaw ti Levita iti maysa kadagiti siudadyo iti Israel a pagnanaedanna+ ket kayatna ti mapan iti disso a pilien ni Jehova,*+ 7 mabalin nga agserbi sadiay iti nagan ni Jehova a Diosna a kas met laeng iti amin a kakabsatna a Levita, nga agserserbi sadiay iti sanguanan ni Jehova.+ 8 Ti awatenna a taraon ket kapada ti bingayda,+ malaksid pay iti maalana kadagiti ilakona a sanikua a tinawidna.

9 “Inton makastrekkayo iti daga nga ited kadakayo ni Jehova a Diosyo, diyo tultuladen dagiti dakes nga aramid dagiti nasion sadiay.+ 10 Awan koma kadakayo ti mangipalasat iti anakna a lalaki wenno babai iti apuy,+ mammuyon,+ salamangkero,+ agbirbirok iti partaan,+ mangkukulam,+ 11 agor-orasion, makiuman iti espiritista+ wenno mammadles,+ wenno makisarita iti natay.+ 12 Ta kagura ni Jehova ti asinoman nga agar-aramid kadagita a banag, ket dagitoy ti makagapu a papanawen ida ni Jehova a Diosyo iti sanguananyo. 13 Masapul a nalintegkayo iti sanguanan ni Jehova a Diosyo.+

14 “Ta dagiti nasion a sakupenyo ket mamati kadagiti salamangkero+ ken mammuyon,+ ngem saan nga ipalubos ni Jehova a Diosyo nga aramidenyo ti kas kadagita. 15 Mangdutokto ni Jehova a Diosyo iti propeta a kas kaniak manipud kadagiti kakabsatyo. Masapul a dumngegkayo kenkuana.+ 16 Daytoy ti sungbat ti kiddawyo ken Jehova a Diosyo idiay Horeb idi naguummongkayo sadiay+ ket kinunayo, ‘Dika ipangngegen kadakami ti timek ni Jehova a Diosmi wenno ipakita pay daytoy dakkel nga apuy tapno saankami a matay.’+ 17 Insungbat kaniak ni Jehova, ‘Nasayaat ti imbagada. 18 Mangdutokakto iti propeta a kas kenka+ manipud kadagiti kakabsatda. Ikabilkonto dagiti saok iti ngiwatna,+ ket ibagananto kadakuada ti amin nga ibilinko kenkuana.+ 19 Dusaekto ti asinoman a saan a dumngeg kadagiti saok nga ibagana babaen ti naganko.+

20 “‘Masapul a mapapatay ti asinoman a propeta a sidadarasudos nga agsao babaen ti naganko a saanko nga imbilin wenno agsao babaen ti nagan dagiti sabali a dios.+ 21 Ngem no ibagayo iti pusoyo: “Kasanomi a maammuan a saan a ni Jehova ti naggapuan ti sao?” 22 No agsao ti propeta babaen ti nagan ni Jehova ket saan a mapasamak wenno pumudno, saan ngarud a ni Jehova ti naggapuan ti sao. Sidadarasudos a nagsao ti propeta. Dikay agbuteng kenkuana.’