Exodo

39 Asul a sinulid, purpura a sinulid a delana, ken nalabaga a sinulid+ ti inusarda a nangabel kadagiti napintas a bado nga usaren dagiti agserbi iti santuario. Inaramidda dagiti nasantuan a bado ni Aaron+ kas iti imbilin ni Jehova ken Moises.

2 Inaramidna ti efod+ babaen kadagiti balitok a sinulid, asul a sinulid, purpura a sinulid a delana, nalabaga a sinulid, ken napino a lienso a sinulid. 3 Nangpandayda kadagiti naingpis a pedaso ti balitok sada kinartikartib iti kas kaingpis dagiti sinulid. Dagita ti imbordada iti efod a naabel iti asul a sinulid, purpura a sinulid a delana, nalabaga a sinulid, ken napino a lienso a sinulid. 4 Nangidaitda iti saggaysa a tela iti rabaw ti agsumbangir nga abaga, iti nagsaipan ti efod. 5 Ti naabel a sinturon* a naigalut a naimbag iti efod ket naaramid kadagiti isu met la a materiales:+ balitok a sinulid, asul a sinulid, purpura a sinulid a delana, nalabaga a sinulid, ken napino a lienso a sinulid, kas iti imbilin ni Jehova ken Moises.

6 Kalpasanna, immontarda dagiti bato nga onix kadagiti balitok, ket inkitikitda kadagita a bato dagiti nagan ti annak ni Israel a kas iti panangaramidda iti maysa a pagselio.+ 7 Inkabilna ti dua a bato iti rabaw ti naidait a tela iti agsumbangir nga abaga ti efod kas maysa a palagip kadagiti annak ni Israel,+ kas iti imbilin ni Jehova ken Moises. 8 Binordaanna ti pektoral+ kas iti inaramidna iti efod. Nagusar kadagiti balitok a sinulid, asul a sinulid, purpura a sinulid a delana, nalabaga a sinulid, ken napino a lienso a sinulid.+ 9 Kuadrado no makupin, sangadangan* ti kaatiddogna ken sangadangan ti kaakabana. 10 Dayta ti nangikabilanda kadagiti naimontar a batbato a nayurnos iti uppat nga intar. Ti umuna nga intar ket rubi, topasio, ken esmeralda. 11 Ti maikadua nga intar ket turkesa, safiro, ken jaspe. 12 Ti maikatlo nga intar ket bato a lesem,* agata, ken amatista. 13 Ti maikapat nga intar ket krisolito, onix, ken jade. Balitok ti nakaimontaranda. 14 Maysa a bato para iti tunggal anak ti Israel. Nakitikitan ti tunggal bato kas iti pannakakitikit ti maysa a pagselio. Naikitikit iti tunggal bato ti nagan ti maysa kadagiti 12 a tribu.

15 Ket nangaramidda kadagiti puro a balitok a sinantali a singdan para iti pektoral.+ 16 Nangaramidda met iti dua a sinansingsing a pagyusokan a balitok ken inkabilda dagita iti dua a makinngato a suli ti pektoral. 17 Ti dua a sinantali a balitok ket inyusokda iti dua a sinansingsing a pagyusokan kadagiti makinngato a suli ti pektoral. 18 Ti dua a murdong ti dua a sinantali a balitok ket inkabitda iti dua a nakaimontaran dagiti bato iti rabaw ti agsumbangir nga abaga ti efod, iti makinsango a paset. 19 Kalpasanna, nangaramidda iti dua a sinansingsing a balitok ket inkabilda dagita iti dua a suli ti makin-uneg a paset ti pektoral a maisagid iti efod.+ 20 Nangaramidda iti dua pay a sinansingsing a balitok nga inkabilda iti sango ti efod, iti baba ti dua a naidait a tela iti agsumbangir nga abaga, nga asideg iti nagsaipanna, iti ngato ti naabel a sinturon* ti efod. 21 Kamaudiananna, inggalutda ti asul a singdan iti pektoral ken kadagiti sinansingsing a pagyusokan nga adda iti efod tapno agtalinaed a nakaplastar ti pektoral iti ngato ti naabel a sinturon* ti efod, kas iti imbilin ni Jehova ken Moises.

22 Nangaramid met iti awan manggasna a bado a maisuot nga umuna sakbay ti efod. Naabel dayta iti puro nga asul a sinulid.+ 23 Ti tengnga ti bado ket nayaramidan iti tengnged a pangyusokan iti ulo, kas iti pannakakuelio ti kabal nga isuot ti soldado. Ti aglawlaw ti tengnged dayta a bado a pangyusokan iti ulo ket naidaitan iti natabas nga inabel tapno saan a mapigis. 24 Kalpasanna, ti gayadanna ket naikkan kadagiti sinanprutas a granada a naaramid iti nagsisinnallapid nga asul a sinulid, purpura a sinulid a delana, ken nalabaga a sinulid. 25 Nangaramidda pay kadagiti balitok a kampanilia ken imbitinda iti nagbabaetan dagiti sinanprutas a granada iti intero a gayadan ti awan manggasna a bado. 26 Binaetbaetanda ti sinanprutas a granada iti balitok a kampanilia ti intero a gayadan ti awan manggasna a bado a mausar iti panagserbi, kas iti imbilin ni Jehova ken Moises.

27 Nagusarda kadagiti napino a lienso a sinulid a nangabel iti nagayad a bado para ken Aaron ken kadagiti annakna.+ 28 Kasta met la a sinulid ti inusarda para iti espesial a turbante+ ni Aaron, kadagiti napintas a turbante+ dagiti annakna, ken kadagiti sapinda.+ 29 Napino a lienso a sinulid, asul a sinulid, purpura a sinulid a delana, ken nalabaga a sinulid ti inusarda a nangabel iti barikes, kas iti imbilin ni Jehova ken Moises.

30 Kamaudiananna, nangaramidda iti nasileng a metal a puro a balitok, ti nasantuan a tanda ti dedikasion.* Inaramidda dayta a kas iti pannakakitikit ti pagselio ket kastoy ti inkitikitda: “Ni Jehova ket nasantuan.”+ 31 Siningdananda dayta iti asul a sinulid tapno maigalut iti espesial a turbante, kas iti imbilin ni Jehova ken Moises.

32 Gapuna, nalpas ti amin a trabaho para iti tabernakulo, ti tolda a pagkonsultaan, ket inaramid dagiti Israelita ti amin nga imbilin ni Jehova ken Moises.+ Kasta ti eksakto nga inaramidda.

33 Inyegda ken Moises ti tabernakulo,+ ti tolda+ ken ti amin nga alikamen iti dayta: dagiti kawit,+ dagiti hamba+ agraman dagiti trangka,+ adigi, ken batay a pakaisulbongan dagita;+ 34 ti abbongna a lalat dagiti kalakian a karnero a natinaan iti nalabaga,+ ti abbongna a lalat ti foka, ti kortina para iti tabing;+ 35 ti lakasa ti Testimonia agraman dagiti assiw+ ken ti kalubna;+ 36 ti lamisaan, amin nga alikamenna+ ken ti pamarang a tinapay; 37 ti kandelero a puro a balitok, dagiti naintar a lamparana,+ ken amin nga alikamenna+ ken ti lanada;+ 38 ti balitok nga altar,+ ti nasantuan a lana,+ ti nabanglo nga insienso,+ ti tabing*+ iti ruangan ti paraangan ti tolda; 39 ti gambang nga altar+ ken ti gambang a pariliana, dagiti assiwna,+ ti amin nga alikamenna,+ ti palanggana ken ti pagbatayanna;+ 40 dagiti kortina iti paraangan, dagiti adigi ken batay a pakaisulbonganda,+ ti tabing*+ iti ruangan ti paraangan, dagiti galut ken pasokna+ ken ti amin nga alikamen a mausar iti panagserbi iti tabernakulo, ti tolda a pagkonsultaan; 41 dagiti napintas a naabel a bado nga usaren dagiti agserbi iti santuario, dagiti nasantuan a bado ni Aaron a padi,+ ken dagiti bado ti annakna nga agserbi kas papadi.

42 Kasta ti panangaramid dagiti Israelita iti amin a trabaho maitunos iti amin nga imbilin ni Jehova ken Moises.+ 43 Idi ininspeksion ni Moises ti amin nga inaramidda, nakitana nga inaramidda dayta kas iti imbilin ni Jehova; ket binendisionan ida ni Moises.