Ti Maikadua a Cronicas

29 Nagbalin nga ari ni Ezekias+ idi agtawen iti 25, ket nagturay iti 29 a tawen idiay Jerusalem. Ti nanangna ket ni Abias nga anak ni Zacarias.+ 2 Inar-aramidna ti umiso iti imatang ni Jehova,+ kas iti inaramid ni David nga apongna.+ 3 Iti umuna a bulan ti umuna a tawen ti panagturayna, linuktanna dagiti ridaw ti balay ni Jehova ket tinarimaanna dagita.+ 4 Kalpasanna, inayabanna dagiti papadi ken Levita ket inummongna ida iti plasa iti daya. 5 Kinunana kadakuada: “Denggendak, dakayo a Levita. Pagbalinenyo a nasantuan ti bagiyo+ ken ti balay ni Jehova a Dios dagidi ammayo, ket ikkatenyo ti aniaman a narugit iti nasantuan a disso.+ 6 Ta saan a nagmatalek dagiti ammatayo ken inaramidda ti dakes iti imatang ni Jehova a Diostayo.+ Binaybay-an ken tinallikudanda ni Jehova ken ti tabernakulona.+ 7 Inserrada met dagiti ridaw ti beranda+ ken iniddepda dagiti lampara.+ Insardengda ti agpuor iti insienso+ ken mangipaay kadagiti daton a mapuoran+ iti nasantuan a disso para iti Dios ti Israel. 8 Iti kasta, nakapungtot ni Jehova iti Juda ken Jerusalem,+ ket inaramidna ida a pagbutngan, pagsiddaawan, ken pagsagawisiwan,* kas iti mismo a makitkitayo.+ 9 Natay iti espada dagidi ammatayo,+ ken natiliw a naipanaw dagiti annaktayo a lallaki ken babbai, ken dagiti assawatayo.+ 10 Tarigagayan ti pusok ti mangaramid iti tulag ken Jehova a Dios ti Israel,+ tapno bumaaw ti sumsumged a pungtotna kadatayo. 11 Annakko, saan nga ita ti tiempo nga agliwaytayo,* ta pinilinakayo ni Jehova nga agtakder iti sanguananna, tapno agserbi+ ken mangipaaykayo kenkuana kadagiti daton a mangpataud iti asuk.”+

12 Iti kasta, timmakder dagiti Levita: ni Mahat nga anak ni Amasai ken ni Joel nga anak ni Azarias manipud kadagiti Cohatita;+ ni Kis nga anak ni Abdi ken ni Azarias nga anak ni Jehalelel manipud kadagiti Merarita;+ ni Joa nga anak ni Zima ken ni Eden nga anak ni Joa manipud kadagiti Gersonita;+ 13 da Simri ken Jeuel manipud kadagiti annak ni Elizafan; da Zacarias ken Matanias manipud kadagiti annak ni Asaf;+ 14 da Jehiel ken Simei manipud kadagiti annak ni Heman;+ da Semaias ken Uziel manipud kadagiti annak ni Jedutun.+ 15 Kalpasanna, inummongda dagiti kakabsatda, pinagbalinda a nasantuan ti bagida, sa immayda tapno dalusanda ti balay ni Jehova, kas imbilin ti ari maitunos iti sao ni Jehova.+ 16 Simrek dagiti papadi iti balay ni Jehova tapno dalusanda ken iruarda ti amin a narugit a nasarakan iti templo ni Jehova sa impanda iti paraangan+ ti balay ni Jehova. Innala dagita dagiti Levita ket impanda iti ruar, iti Tanap ti Kidron.+ 17 Iti kasta, inrugida a pagbalinen a nasantuan ti umuna nga aldaw ti umuna a bulan, ket iti maikawalo nga aldaw ti bulan nakadanonda iti beranda ni Jehova.+ Pinagbalinda a nasantuan ti balay ni Jehova iti walo nga aldaw, ket nalpasda iti maika-16 nga aldaw ti umuna a bulan.

18 Kalpasan dayta, napanda ken Ari Ezekias ket kinunada: “Nadalusanmin ti intero a balay ni Jehova, ti altar ti daton a mapuoran+ ken ti amin nga alikamenna,+ ken ti lamisaan ti napagtutuon a tinapay*+ ken ti amin nga alikamenna. 19 Ti amin nga alikamen nga inruar ni Ari Ahaz bayat ti panagturayna idi saan a nagmatalek+ ket insaganami ken pinagbalinmi a nasantuan.+ Addada iti sanguanan ti altar ni Jehova.”

20 Nasapa a bimmangon ni Ari Ezekias ket inummongna dagiti prinsipe ti siudad sa napanda iti balay ni Jehova. 21 Nangtedda iti pito a kalakian a baka, pito a kalakian a karnero, pito a kalakian nga urbon a karnero, ken pito a kalakian a kalding kas daton gapu iti basol para iti pagarian, iti santuario, ken iti Juda.+ Imbagana kadagiti papadi a kaputotan ni Aaron nga idatonda dagita iti altar ni Jehova. 22 Pinartida dagiti baka,+ ket innala dagiti papadi ti dara sa inwarsida iti altar.+ Pinartida met dagiti karnero ket inwarsida ti dara iti altar, sa pinartida dagiti urbon a karnero ken inwarsida ti dara iti altar. 23 Kalpasanna, inyegda dagiti kalding kas daton gapu iti basol iti sanguanan ti ari ken ti naguummong a tattao ket imparabawda ti imada kadagita. 24 Pinarti dagita dagiti papadi sa indatagda kas daton gapu iti basol. Inkabilda ti dara iti altar tapno maabbongan ti basol ti intero nga Israel, ta imbaga ti ari a para iti intero nga Israel ti daton a mapuoran ken ti daton gapu iti basol.

25 Kabayatanna, impuestona dagiti Levita iti balay ni Jehova, nga addaan kadagiti piangpiang, dekuerdas nga instrumento, ken arpa,+ sigun iti imbilin ni David+ ken ni Gad+ a managsirmata ti ari ken ni Natan+ a propeta, ta imbilin dayta ni Jehova babaen kadagiti propetana. 26 Gapuna, nakatakder dagiti Levita a nakaiggem kadagiti instrumento ni David, ken dagiti papadi a nakaiggem kadagiti trumpeta.+

27 Kalpasanna, imbilin ni Ezekias a maidatag iti altar ti daton a mapuoran.+ Idi mangrugi a mapuoran ti daton, nangrugi met ti kanta para ken Jehova ken napuyotan met dagiti trumpeta, a maigiddan kadagiti instrumento ni Ari David ti Israel. 28 Nagruknoy dagiti naguummong nga umili bayat ti kanta ken ti pannakapuyot dagiti trumpeta—nagtultuloy daytoy agingga a naibus ti daton a mapuoran. 29 Apaman a nalpasda a nagidaton, nagrukob ken nagruknoy ti ari ken ti amin a kakaduana. 30 Imbaga ni Ari Ezekias ken dagiti prinsipe nga idaydayaw dagiti Levita ni Jehova babaen ti sasao ni David+ ken ni Asaf+ a managsirmata. Iti kasta, siraragsak a kinantada dagiti salmo, nagparintumengda, ken nagruknoyda.

31 Kinuna ni Ezekias: “Ita ta naisinakayon* para ken Jehova, mangyegkayo iti balay ni Jehova kadagiti sagut ken daton ti panagyaman.” Nangyeg ngarud dagiti umili kadagiti sagut ken daton ti panagyaman, ket adda met dagiti situtulok a nangyeg kadagiti daton a mapuoran.+ 32 Ti dagup dagiti daton a mapuoran nga inyeg dagiti umili ket 70 a baka, 100 a kalakian a karnero, 200 a kalakian nga urbon a karnero—amin dagitoy ket daton a mapuoran para ken Jehova+— 33 ken dagiti nasantuan a daton ket 600 a baka ken 3,000 a karnero. 34 Ngem manmano dagiti papadi ket saanda a kabaelan a lalatan ti amin a daton a mapuoran isu a tinulongan ida+ dagiti kakabsatda a Levita agingga a nalpas ti trabaho ken agingga a nadalusan dagiti papadi ti bagida,+ ta sipapanunot* dagiti Levita a mangdalus iti bagida ngem kadagiti papadi. 35 Nakaad-adu met ti daton a mapuoran,+ ken ti taba dagiti daton a pakikappia+ ken dagiti daton nga inumen a kakuyog dagiti daton a mapuoran.+ Iti kasta, naisubli* ti panagserbi iti balay ni Jehova. 36 Gapuna, nagrag-o ni Ezekias ken ti amin nga umili gapu iti inaramid kadakuada ti pudno a Dios,+ ta alisto a napasamak amin dagitoy.