Jeremias

27 Idi rugrugi ti panagturay ti ari ti Juda a ni Jehoiakim nga anak ni Josias, daytoy ti mensahe ni Jehova ken Jeremias: 2 “Daytoy ti imbaga kaniak ni Jehova, ‘Mangaramidka kadagiti galut ken sangol nga ikabilmo iti tengngedmo. 3 Ket ipatulodmo dagita iti ari ti Edom,+ iti ari ti Moab,+ iti ari dagiti Ammonita,+ iti ari ti Tiro,+ ken iti ari ti Sidon.+ Ipaw-itmo dagita kadagiti mensahero nga immay iti Jerusalem a mapan ken Zedekias nga ari ti Juda. 4 Daytoy ti ibilinmo nga ibagada kadagiti arida:

“‘“Daytoy ti imbaga ni Jehova a panguluen dagiti armada, ti Dios ti Israel. Kastoy ti masapul nga ibagayo kadagiti ariyo, 5 ‘Siak ti nangaramid iti daga, tattao, ken kadagiti animal iti rabaw ti daga babaen ti dakkel a pannakabalinko ken nabileg* a takiagko; ket intedko daytan iti asinoman a kayatko a pangtedan.*+ 6 Ket intedkon amin dagitoy a daga iti adipenko a ni Ari Nabucodonosor+ ti Babilonia. Intedko metten kenkuana dagiti atap nga animal iti tay-ak tapno agserbi kenkuana. 7 Amin a nasion ket agserbinto kenkuana ken iti anakna ken iti apokona agingga a dumteng ti tiempo a maparmek ti mismo a dagana,+ inton isu ket adipenen ti adu a nasion ken natan-ok nga ar-ari.’+

8 “‘“‘No adda nasion wenno pagarian a saan nga agserbi ken Ari Nabucodonosor ti Babilonia ken saan nga agpasakup* iti sangol ti panangadipen ti ari ti Babilonia, dusaekto dayta a nasion iti espada,+ nakaro a bisin, ken makapapatay a sakit,’ kuna ni Jehova, ‘agingga a mapagpatinggak ida babaen ti pannakabalinna.’

9 “‘“‘Gapuna, diyo ipangag dagiti propetayo, mammuyonyo, managtagtagainepyo, salamangkeroyo, ken dagiti mangkukulamyo a mangibagbaga kadakayo: “Saankayonto nga agserbi iti ari ti Babilonia.” 10 Ta ulbod ti ipadpadtoda kadakayo, tapno maipanawkayo iti dagayo ket iwarawarakayonto ken madadaelkayo.

11 “‘“‘Ngem ti nasion nga agpasakup iti sangol ti panangadipen ti ari ti Babilonia ken agserbi kenkuana, pagtalinaedekto* iti dagana,’ kuna ni Jehova, ‘tapno talonen ken pagyananna dayta.’”’”

12 Kastoy met laeng ti imbagak ken Ari Zedekias+ ti Juda: “Agpasakupkayo iti sangol ti panangadipen ti ari ti Babilonia ken agserbikayo kenkuana ken kadagiti tattaona, ket agtultuloykayto nga agbiag.+ 13 Apay koma a sika ken dagiti tattaom ket matay iti espada,+ nakaro a bisin,+ ken makapapatay a sakit,+ kas iti imbaga ni Jehova iti nasion a saan nga agserbi iti ari ti Babilonia? 14 Diyo ipangag dagiti propeta a mangibagbaga kadakayo, ‘Saankayonto nga agserbi iti ari ti Babilonia,’+ gapu ta ulbod ti ipadpadtoda kadakayo.+

15 “‘Ta saanko ida nga imbaon,’ kuna ni Jehova, ‘no di ket us-usarenda ti naganko nga agipadto iti ulbod, nga agresulta iti pannakaiwarawara ken pannakadadaelyo, dakayo ken dagiti propeta nga agipadpadto kadakayo.’”+

16 Imbagak met kadagiti papadi ken iti amin a tattao: “Daytoy ti kuna ni Jehova, ‘Diyo ipangag dagiti propeta nga agipadpadto kadakayo: “Kitaenyo! Asidegen a maisubli dagiti alikamen iti balay ni Jehova a naipan idi idiay Babilonia!”+ ta ulbod ti ipadpadtoda kadakayo.+ 17 Saanyo nga ipangag ida. Agserbikayo iti ari ti Babilonia tapno agtultuloykayo nga agbiag.+ Apay koma a madadael daytoy a siudad? 18 Ngem no propeta ida ni Jehova ken naggapu kenkuana ti mensaheda, ipakaasiyo koma nga agpakaasida ken Jehova a panguluen dagiti armada a saan a maipan idiay Babilonia dagiti nabatbati nga alikamen iti balay ni Jehova, iti balay* ti ari ti Juda, ken iti Jerusalem.’

19 “Ta daytoy ti kuna ni Jehova a panguluen dagiti armada maipapan kadagiti adigi,+ iti Baybay,*+ kadagiti kareton,+ ken kadagiti nabatbati nga alikamen iti daytoy a siudad, 20 a saan nga innala ti ari ti Babilonia a ni Nabucodonosor manipud Jerusalem, idi impanna idiay Babilonia ni Jeconias nga anak ni Jehoiakim, ti ari ti Juda, agraman ti amin a natan-ok iti Juda ken Jerusalem.+ 21 Wen, daytoy ti imbaga ni Jehova a panguluen dagiti armada, ti Dios ti Israel, maipapan kadagiti alikamen a nabati iti balay ni Jehova, iti balay* ti ari ti Juda, ken iti Jerusalem: 22 ‘“Maipanto dagita idiay Babilonia,+ ket agtalinaedda idiay agingga nga asikasuek dagita,” kuna ni Jehova. “Ket isublikto dagita ken ikabilkonto manen iti daytoy a lugar.”’”+