Ezekiel

18 Kinuna manen kaniak ni Jehova: 2 “Ania ti kayat a sawen daytoy ibagbagayo a proverbio iti Israel, ‘Dagiti amma ti nangan iti naalsem nga ubas, ngem dagiti ngipen ti annak ti naalino’?+

3 “‘Ikarik,’ kuna ti sibibiag a Kangatuan* nga Apo Jehova, ‘diyonton ibagbaga daytoy a pagsasao iti Israel. 4 Kukuak ti amin a kararua.* Kukuak ti kararua ti ama kasta met ti kararua ti anak. Matayto ti kararua* nga agbasbasol.

5 “‘Kas pagarigan, nalinteg ti maysa a tao ken ar-aramidenna ti nainkalintegan ken umiso. 6 Saan a mangmangan iti naidaton kadagiti idolo iti bambantay;+ saan a tumangtangad kadagiti makarimon nga idolo* iti sangakabbalayan ti Israel; saan a makidendenna iti asawa ti kaarrubana+ wenno iti babai nga agregla;+ 7 awan ti malmaltratuenna,+ no di ket isublina ti pammatalged nga inted ti immutang kenkuana;+ awan ti taktakawanna,+ no di ket it-itedna ti taraonna iti mabisin+ ken baduanna ti lamolamo;+ 8 saan a mangala iti interes wenno dakkel a patubo,+ no di ket liklikanna ti agaramid iti di kinahustisia;+ ipakpakatna ti pudno a hustisia iti nagbaetan ti dua a tao;+ 9 ken tungtungpalenna dagiti paglintegak ken pangngeddengko tapno agbalin a matalek. Nalinteg ti kasta a tao ket sigurado nga agtultuloyto nga agbiag,’+ kuna ti Kangatuan nga Apo Jehova.

10 “‘Ngem no kas pagarigan adda anakna a nagbalin a mannanakaw+ wenno mammapatay*+ wenno nangaramid iti aniaman kadagitoy 11 (ngem awan kadagitoy ti inaramid ti ama)—mangmangan iti naidaton kadagiti idolo iti bambantay, makidendenna iti asawa ti kaarrubana, 12 malmaltratuenna dagiti agkasapulan ken napanglaw,+ agtaktakaw, saanna nga isubsubli ti pammatalged, tumangtangad kadagiti makarimon nga idolo,+ agar-aramid iti dakes,+ 13 agal-ala iti dakkel a patubo ken agsingsingir iti interes+—saanto nga agtultuloy nga agbiag dayta nga anak. Gapu iti amin a dakes nga inaramidna, sigurado a mapapatayto. Basolna ti ipapatayna.

14 “‘Ngem kas pagarigan, adda anak a nakakita iti amin a basol nga inaramid ti amana, ngem saanna a tinulad dagita. 15 Saan a mangmangan iti naidaton kadagiti idolo iti bambantay; saan a tumangtangad kadagiti makarimon nga idolo iti sangakabbalayan ti Israel; saan a makidendenna iti asawa ti kaarrubana; 16 awan ti malmaltratuenna; saan nga agag-agaw iti naited a pammatalged; saan nga agtaktakaw; it-itedna ti taraonna iti mabisin ken baduanna ti lamolamo; 17 saanna a parparigaten dagiti napanglaw; saan nga agal-ala iti patubo wenno agsingsingir iti interes; ken tungtungpalenna dagiti paglintegak ken pangngeddengko. Saanto a matay dayta a tao gapu iti basol ti amana. Sigurado nga agtultuloyto nga agbiag. 18 Ngem gapu ta nangsaur ti amana, tinakawanna ti kabsatna, ken nagaramid iti dakes kadagiti kailianna, matayto ti ama gapu iti basolna.

19 “‘Ngem ibagayonto: “Apay a saan a sungsungbatan ti anak ti basol ti amana?” Gapu ta umiso ken nalinteg ti inaramid ti anak, tinungpal ken inaramidna ti amin a paglintegak, sigurado nga agtultuloyto nga agbiag.+ 20 Matayto ti kararua* nga agbasbasol.+ Saanto a manungsungbat ti anak iti basol ti amana, ket saanto a manungsungbat ti ama iti basol ti anakna. Maukomto ti nalinteg a tao sigun iti kinalintegna, ket maukomto ti dakes sigun iti kinadakesna.+

21 “‘Ngem no tallikudan ti dakes a tao ti amin a basol nga inaramidna ket tungpalenna dagiti paglintegak ken aramidenna ti umiso ken nalinteg, sigurado nga agtultuloyto nga agbiag. Saanto a matay.+ 22 Saanto a maisingir* kenkuana ti aniaman a nagbasolanna.+ Agtultuloyto nga agbiag gapu ta nalinteg ti ar-aramidenna.’+

23 “‘Maragsakanak aya iti ipapatay ti dakes a tao?’+ kuna ti Kangatuan nga Apo Jehova. ‘Saan kadi a kaykayatko a tallikudanna ti dakes nga aramidna ket agtultuloy nga agbiag?’+

24 “‘Ngem no panawan ti nalinteg a tao ti kinalintegna ket agaramid iti di umiso,* a tuladenna ti ar-aramiden dagiti dakes a tattao, agbiagto kadi? Saanto a malagip dagiti nalinteg nga inaramidna.+ Matayto gapu iti basolna ken iti saanna a panagmatalek.+

25 “‘Ngem ibagayonto: “Saan a nainkalintegan ti dalan ni Jehova.”+ Pangngaasiyo ta dumngegkayo, O sangakabbalayan ti Israel! Ti kadi dalanko ti saan a nainkalintegan?+ Saan aya a ti dalanyo ti saan a nainkalintegan?+

26 “‘No panawan ti nalinteg a tao ti kinalintegna ket agaramid iti di umiso ken matay gapu iti dayta, matayto gapu iti basolna.

27 “‘No tallikudan ti dakes a tao ti kinadakesna sa rugianna ti agaramid iti umiso ken nalinteg, agtultuloyto nga agbiag.*+ 28 No mabigbigna ti amin a basol nga inaramidna ket tallikudanna, sigurado nga agtultuloyto nga agbiag. Saanto a matay.

29 “‘Ngem ibaganto ti sangakabbalayan ti Israel: “Saan a nainkalintegan ti dalan ni Jehova.” Talaga kadi a ti dalanko ti saan a nainkalintegan, O sangakabbalayan ti Israel?+ Saan aya a ti dalanyo ti saan a nainkalintegan?’

30 “‘Gapuna, O sangakabbalayan ti Israel, ukomekto ti tunggal maysa kadakayo sigun iti aramidna,’+ kuna ti Kangatuan nga Apo Jehova. ‘Tallikudanyo, wen, naan-anay a tallikudanyo ti amin a basolyo, tapno saan nga agbalin dagita a pakaitibkolan a mamagbasol kadakayo. 31 Ikkatenyo ti amin a basol a naaramidanyo+ ket mangpataudkayo* iti baro a puso ken baro nga espiritu,+ ta apay koma a mataykayo,+ O sangakabbalayan ti Israel?’

32 “‘Diak maragsakan iti ipapatay ti asinoman,’+ kuna ti Kangatuan nga Apo Jehova. ‘Isu nga agsublikayo ket agbiagkayo.’”+