Deuteronomio

1 Dagitoy ti imbaga ni Moises iti amin nga Israelita iti rehion ti Jordan iti let-ang, iti tanap iti sango ti Suf, iti nagbaetan ti Paran, Tofel, Laban, Hazerot, ken Dizahab. 2 Ti panagdaliasat manipud Horeb nga agturong idiay Kades-barnea+ a dumalan idiay Bantay Seir ket 11 nga aldaw. 3 Iti umuna nga aldaw ti maika-11 a bulan ti maika-40 a tawen,+ indanon ni Moises kadagiti Israelita* ti amin nga imbilin ni Jehova nga ibagana kadakuada. 4 Napasamak daytoy kalpasan nga inabakna ni Sihon+ nga ari dagiti Amoreo, nga agnanaed idi idiay Hesbon, ken ni Og+ nga ari ti Basan, nga agnanaed idi idiay Astarot, iti Edrei.+ 5 Inlawlawag ni Moises daytoy a Linteg+ idiay Jordan iti Moab, ket kinunana:

6 “Imbaga idi kadatayo ni Jehova a Diostayo idiay Horeb, ‘Nabayag unayen nga agnanaedkayo iti daytoy a kabambantayan.+ 7 Agrubbuatkayo ket mapankayo iti kabambantayan dagiti Amoreo+ ken iti amin a kabangibangda a lugar iti Araba,+ iti kabambantayan, iti Sefela, Negeb, ken iti igid ti baybay,+ iti daga dagiti Canaanita, ken Lebanon,*+ agingga iti dakkel a karayan, ti Eufrates.+ 8 Insaganak kadakayo daytoy a daga. Sumrekkayo ket tagikuaenyo ti daga nga inkari ni Jehova nga ited kadagidi ammayo, kada Abraham, Isaac,+ ken Jacob,+ ken iti kaputotanda.’*+

9 “Imbagak idi kadakayo, ‘Saankayo a kabaelan nga aywanan a sisiak.+ 10 Pinaadunakayo ni Jehova a Diosyo, ket kas kadagiti bituen ti langit ti kaaduyo itan.+ 11 Sapay koma ta maminribu pay a paaduennakayo+ ni Jehova a Dios dagidi ammayo ken bendisionannakayo kas inkarina kadakayo.+ 12 Kasanok a masolbar a sisiak dagiti problema ken reklamoyo?+ 13 Mangpilikayo kadagiti nasaririt, masirib, ken aduan kapadasan a lallaki kadagiti tribuyo, ket pagbalinek ida kas panguloyo.’+ 14 Insungbatyo, ‘Nasayaat ti imbagam nga aramidenmi.’ 15 Gapuna, innalak dagiti pangulo dagiti tribuyo, dagiti masirib ken aduan kapadasan a lallaki, ket pinagbalinko ida kas panguloyo—panguluen ti rinibu, panguluen ti ginasut, panguluen ti limapulo, panguluen ti sangapulo, ken opisial kadagiti tribuyo.+

16 “Imbilinko idi kadagiti ukomyo, ‘No usigenyo ti kaso dagiti kakabsatyo, mangukomkayo a sililinteg,+ kaso man dayta ti dua nga Israelita wenno Israelita ken ganggannaet a residente.+ 17 Masapul a patas ti panangukomyo.+ Agpada ti panangusigyo iti kaso ti nanumo ken ti natan-ok.+ Saankayo nga agbuteng iti tao,+ ta ti panangukom ket biang ti Dios.+ No marigatankayo a mangsolbar iti kaso, umaykayo kaniak ket denggekto.’+ 18 Imbagak idi ti amin a banag a rumbeng nga aramidenyo.

19 “Kalpasanna, pimmanawtayo idiay Horeb ken limmasattayo iti naglawa ken nakabutbuteng a let-ang+ a nakitayo iti dalan nga agturong iti kabambantayan dagiti Amoreo,+ kas imbilin ni Jehova a Diostayo, ket nakadanontayo idi agangay iti Kades-barnea.+ 20 Kinunak kadakayo, ‘Nadanonyon ti kabambantayan dagiti Amoreo, nga ited kadatayo ni Jehova a Diostayo. 21 Inted kadakayo ni Jehova a Diosyo daytoy a daga. Sumang-atkayo, tagikuaenyo dayta, kas imbaga kadakayo ni Jehova a Dios dagidi ammayo.+ Dikay agbuteng wenno agamak.’

22 “Ngem immasidegkayo amin kaniak ket kinunayo, ‘Mangibaontayo kadagiti lallaki a mangsukimat nga umuna iti daga ket ibagadanto no sadino ti pagnaantayo ken no ania a kita a siudad dagiti papanantayo.’+ 23 Nasayaat ti insingasingyo isu a nangpiliak iti 12 a lallaki, maysa iti tunggal tribu.+ 24 Simmang-atda iti kabambantayan+ ket nakadanonda idiay Tanap* ti Escol sa inespiada dayta. 25 Nangalada iti sumagmamano a bunga ti daga ket inyegda kadatayo sa impadamagda, ‘Nasayaat ti daga nga ited kadatayo ni Jehova a Diostayo.’+ 26 Ngem saanyo a kinayat ti napan ken sinukiryo ti bilin ni Jehova a Diosyo.+ 27 Inrekreklamoyo kadagiti toldayo, ‘Kagurguranatayo ni Jehova isu nga inruarnatayo idiay Egipto tapno iyawatnatayo kadagiti Amoreo a mangpapatay kadatayo. 28 Ania a kita ti daga ti papanantayo? Nagbutengtayo*+ idi imbaga dagiti kakabsattayo, “Napigpigsa ken nataytayag dagiti tattao sadiay ngem datayo, ken dadakkel ken dumanon idiay langit ti pader dagiti siudadda.*+ Nakitami met sadiay ti annak dagiti Anakim.”’+

29 “Isu nga imbagak kadakayo, ‘Saankayo a maamak wenno agbuteng kadakuada.+ 30 Tulongannakayo ni Jehova a Diosyo ken makilaban para kadakayo+ kas iti nakitayo nga inaramidna idiay Egipto.+ 31 Nakitayo idiay let-ang ti panangaywan kadakayo ni Jehova a Diosyo a kas iti panangaywan ti ama iti anakna, iti sadinoman a papananyo agingga a nakadanonkayo iti daytoy a lugar.’ 32 Ngem iti laksid dagitoy, saankayo a namati ken Jehova a Diosyo,+ 33 nga immun-una ngem kadakayo, tapno espiaenna ti lugar a pagkampuanyo. Nagparang kadakayo babaen ti apuy iti rabii ken babaen ti ulep iti aldaw tapno ipakitana ti dalan a pagnaanyo.+

34 “Nangngeg ni Jehova ti amin nga imbagbagayo, ket nakapungtot ken insapatana,+ 35 ‘Awanto ti uray maysa iti daytoy a dakes a henerasion ti makakita iti nasayaat a daga nga inkarik nga ited kadagidi ammayo,+ 36 malaksid ken Caleb nga anak ni Jefune. Makitananto dayta, ket itedkonto kenkuana ken iti annakna ti daga a napananna, gapu ta naimpusuan* a nagtulnog ken Jehova.+ 37 (Nakapungtot pay kaniak ni Jehova gapu kadakayo ket kinunana, “Saankanto met a mapan sadiay.+ 38 Ni Josue nga anak ni Nun, a katulongam,*+ ti sumrekto iti dayta a daga.+ Papigsaem,*+ ta idauluannanto ti Israel a mangtagikua iti dayta.”) 39 Maysa pay, dagiti ubbingyo nga imbagayo a matiliw kas adipen+ ken dagiti annakyo a saan pay a makaammo iti naimbag ken dakes ti makastrekto iti daga ket itedkonto dayta kadakuada.+ 40 Ngem dakayo, agsublikayo idiay let-ang nga agturong iti Nalabaga a Baybay.’+

41 “Gapu iti daytoy, imbagayo kaniak, ‘Nagbasolkami ken Jehova. Mapankami makilaban, kas imbilin ni Jehova a Diosmi!’ Gapuna, innalayo dagiti armasyo, ket impagarupyo a nalaka ti sumang-at iti bantay.+ 42 Ngem kinuna kaniak ni Jehova, ‘Ibagam kadakuada: “Saankayo a mapan makilaban, ta saankayo a tulongan.+ No aramidenyo dayta, abakendakayto dagiti kabusoryo.”’ 43 Indanonko dayta kadakayo ngem saankayo a dimngeg. Sinukiryo ti bilin ni Jehova ket nagdarasudoskayo a simmang-at iti bantay. 44 Gapuna, sinabetdakayo dagiti Amoreo nga agnanaed iti dayta a bantay ken kasda la uyokan a kimmamat kadakayo, ket inwarawaradakayo idiay Seir agingga idiay Horma. 45 Gapuna, nagsubli ken nagsangitkayo iti sanguanan ni Jehova, ngem saannakayo a dinengngeg wenno inkankano ni Jehova. 46 Iti kasta, nabayag a nagnaedkayo idiay Kades.