Ti Maikadua a Cronicas

28 Agtawen ni Ahaz+ iti 20 idi nagbalin nga ari, ket nagturay iti 16 a tawen idiay Jerusalem. Saanna nga inaramid ti umiso iti imatang ni Jehova kas iti inaramid ni David nga apongna.+ 2 Tinuladna ketdi dagiti ari ti Israel,+ ken nangaramid pay kadagiti metal nga estatua*+ dagiti Baal. 3 Nangipaay met iti daton a mangpataud iti asuk idiay Tanap ti Anak ni Hinnom* ken pinuoranna dagiti annakna a lallaki.+ Tinuladna dagiti dakes nga aramid dagiti nasion+ a pinapanaw ni Jehova iti sanguanan dagiti Israelita. 4 Nangipapaay met iti daton a mangpataud iti asuk kadagiti nangato a disso,+ turod, ken sirok ti tunggal narukbos a kayo.+

5 Gapuna, inyawat ni Jehova a Diosna iti ari ti Siria,+ ket naabakda ken adu ti tiniliwda nga impan idiay Damasco.+ Nayawat met iti ari ti Israel, ket adu kadakuada ti napapatay. 6 Ti napapatay ni Peka+ nga anak ni Remalias idiay Juda iti maysa laeng nga aldaw ket 120,000 a natured a lallaki, gapu ta tinallikudanda ni Jehova a Dios dagidi ammada.+ 7 Pinapatay met ni Zikri, maysa a mannakigubat nga Efraimita, ti anak ti ari a ni Maasias ken ni Azrikam, a mangay-aywan iti palasio,* ken ni Elkana, a maikadua iti ari. 8 Maysa pay, tiniliw dagiti Israelita ti 200,000 a kakabsatda—babbai, annak a lallaki ken babbai. Adu met a sanikua ti innalada ket impanda dagita idiay Samaria.+

9 Ngem adda sadiay ni Oded a propeta ni Jehova. Sinabatna dagiti soldado nga agturturong iti Samaria ket kinunana: “Nakapungtot ni Jehova a Dios dagidi ammayo iti Juda isu nga inyawatna ida kadakayo.+ Siraranggas a pinapatayyo ida ket naammuan ti Dios dayta. 10 Ita, kayatyo nga adipenen dagiti umili ti Juda ken Jerusalem.+ Panagkunayo, saankayo aya a nakabasol met ken Jehova a Diosyo? 11 Dumngegkayo kaniak ket wayawayaanyo dagiti tiniliwyo a kakabsatyo, ta sumsumged ti pungtot ni Jehova kadakayo.”

12 Iti kasta, ti dadduma a panguluen dagiti Efraimita, ni Azarias nga anak ni Jehohanan, ni Berekias nga anak ni Mesilemot, ni Jehizkias nga anak ni Salum, ken ni Amasa nga anak ni Hadlai, kinomprontada dagiti soldado a naggapu iti gubat, 13 ket kinunada: “Dikay iserrek ditoy dagiti tiniliwyo, ta makabasoltayo ken Jehova. Ti panggepyo nga aramiden nayonanna dagiti basol ken bidduttayo, ta nakaad-adun ti bidduttayo ken sumsumgeden ti pungtot ti Dios iti Israel.” 14 Gapuna, inyawat dagiti armado a soldado kadagiti prinsipe ken iti amin a naguummong nga umili dagiti tiniliwda a tattao ken innalada a banag.+ 15 Timmakder dagiti nadutokan a lallaki ket innalada dagiti natiliw sa inikkanda iti bado dagidiay awanan iti bado. Binaduanda ida ken inikkanda iti sandalias, taraon ken inumen, ken lana para iti kudilda. Inluganda met kadagiti asno dagiti nakapsut sa impanda kadagiti kakabsatda idiay Jerico, ti siudad dagiti palma. Kalpasanna, nagsublida idiay Samaria.

16 Iti dayta a tiempo, nagpatulong ni Ari Ahaz kadagiti ari ti Asiria.+ 17 Rimmaut manen dagiti Edomita iti Juda ket nangtiliwda kadagiti tattao. 18 Dimmarup met dagiti Filisteo+ kadagiti siudad ti Sefela+ ken Negeb iti Juda ket sinakupda ti Bet-semes,+ Aijalon,+ Gederot, Soco ken dagiti ili iti aglawlawna, ti Timna+ ken dagiti ili iti aglawlawna, ken ti Gimzo ken dagiti ili iti aglawlawna; ket nagnaedda sadiay. 19 Impababa ni Jehova ti Juda gapu ken Ari Ahaz ti Israel, ta impalubosna a dumakes ti Juda, isu a saanda a nagmatalek ken Jehova.

20 Idi agangay, bimmusor ni Ari Tilgat-pilneser+ ti Asiria ket pinagproblemana ni Ahaz+ imbes a papigsaenna. 21 Ta innala ni Ahaz ti amin a nagyan ti balay ni Jehova ken ti balay* ti ari+ ken dagiti balay dagiti prinsipe sa insagutna iti ari ti Asiria; ngem saan a nakatulong dayta kenkuana. 22 Bayat ti panagproblema ni Ari Ahaz, ad-adda a saan a nagmatalek ken Jehova. 23 Nagdatdaton kadagiti didiosen ti Damasco+ a nangparmek kenkuana+ ket kinunana: “Gapu ta tultulongan dagiti dios dagiti ari ti Siria, agidatonak kadakuada tapno tulongandak.”+ Ngem dayta ti nakadadaelan ti ari ken ti intero nga Israel. 24 Inummong pay ni Ahaz dagiti alikamen iti balay ti pudno a Dios; pinutedputedna dagiti alikamen iti balay ti pudno a Dios,+ inserrana dagiti ridaw ti balay ni Jehova,+ ken nangaramid kadagiti altarna iti tunggal suli idiay Jerusalem. 25 Iti amin a siudad ti Juda, nangaramid kadagiti nangato a disso a pakaipaayan dagiti daton a mangpataud iti asuk kadagiti sabali a dios,+ ket pinagpungtotna ni Jehova a Dios dagidi ammana.

26 Ti dadduma pay a pasamak iti pakasaritaanna, ti amin nga inaramidna manipud rugi agingga iti ngudona, ket naisurat iti Libro ti Ar-ari ti Juda ken ti Israel.+ 27 Naginana ni Ahaz a kas kadagidi ammana, ket intabonda iti siudad ti Jerusalem, ta saanda nga impan iti pakaitaneman dagiti ari ti Israel.+ Ni Ezekias nga anakna ti simmaruno nga ari.