Deuteronomio

3 “Kalpasanna, nagnatayo iti Dalan ti Basan. Sinabetnatayo ni Og nga ari ti Basan, agraman ti amin a tattaona, ket ginubatdatayo idiay Edrei.+ 2 Gapuna, kinuna kaniak ni Jehova, ‘Dika agbuteng ta tulonganka a mangparmek kenkuana ken kadagiti tattaona ket itedkonto kenka ti dagana. Aramidemto kenkuana ti inaramidmo ken Sihon nga ari dagiti Amoreo, nga agnanaed idi idiay Hesbon.’ 3 Iti kasta, tinulongannatayo met ni Jehova a Diostayo a mangparmek ken Ari Og ti Basan ken iti amin a tattaona. Pinapataytayo ida ket awan ti nakalasat. 4 Sinakuptayo ngarud ti amin a siudadna. Awan ti ili a saantayo a naala kadakuada—60 a siudad, ti intero a rehion ti Argob, ti pagarian ni Og idiay Basan.+ 5 Amin dagitoy a siudad ket addaan iti nangato a pader, ruangan, ken trangka, ken adu pay ti ilina. 6 Ngem dinadaeltayo dagita+ kas iti inaramidtayo ken Ari Sihon ti Hesbon. Pinarmektayo ti tunggal siudad, agraman dagiti lallaki, babbai, ken ubbing.+ 7 Innalatayo amin a tarakenda ken amin nga adda kadagiti siudadda.

8 “Innalatayo idi ti daga ti dua nga ari dagiti Amoreo+ nga adda iti rehion ti Jordan, manipud iti Tanap ti Arnon* agingga iti Bantay Hermon+ 9 (ti bantay nga aw-awagan idi dagiti Sidonio iti Sirion ken aw-awagan dagiti Amoreo iti Senir), 10 amin a siudad iti tanap,* ti intero a Gilead, ken ti intero a Basan agingga idiay Saleca ken Edrei,+ dagiti siudad ti pagarian ni Og idiay Basan. 11 Ni Ari Og ti Basan ti natda kadagiti Refaim. Landok* ti lungonna, ken adda pay laeng idiay Rabba a siudad dagiti Ammonita. Siam a kasiko* ti kaatiddogna, ket uppat a kasiko ti kaakabana, sigun iti pagrukodan a kasiko. 12 Iti daydi a tiempo, tinagikuatayo daytoy a daga: manipud Aroer,+ nga adda iti asideg ti Tanap ti Arnon,* ken ti kagudua ti kabambantayan ti Gilead, ket intedko dagiti siudadna kadagiti Rubenita ken Gadita.+ 13 Ti nabati a kagudua iti Gilead ken ti intero a Basan iti pagarian ni Og ket intedko iti kagudua ti tribu ni Manases.+ Ti intero a rehion ti Argob, a paset ti Basan, ket pagaammo idi a daga dagiti Refaim.

14 “Innala ni Jair+ nga anak ni Manases ti intero a rehion ti Argob+ agingga iti pagpatinggaan dagiti Gesurita ken dagiti Maacatita+ ket pinanagananna iti Havot-jair*+ dagidiay a purok ti Basan agingga ita, a naipasurot iti naganna. 15 Intedko ken Makir ti Gilead.+ 16 Intedko kadagiti Rubenita ken kadagiti Gadita+ ti Gilead agingga iti Tanap ti Arnon,* a ti pagpatinggaanna ket ti tengnga ti tanap, ken agingga idiay Jabok, ti tanap a pagpatinggaan dagiti Ammonita, 17 ken ti Araba ken ti Jordan ken ti pagpatinggaan, manipud Kineret agingga iti Baybay ti Araba, ti Asin a Baybay,* iti sakaanan ti Pisga iti daya.+

18 “Daytoy ti imbilinko kadakayo: ‘Inted ni Jehova a Diosyo daytoy a daga tapno tagikuaenyo. Alaen ti amin a nabileg a lallaki ti armasna ket umunada a bumallasiw ngem kadagiti kakabsatyo, dagiti Israelita.+ 19 Dagiti laeng assawayo, annakyo, ken tarakenyo (ammok a nakaad-adu ti tarakenyo) ti agtultuloy nga agnaed kadagiti siudad nga intedko kadakayo, 20 agingga a paginanaen ni Jehova dagiti kakabsatyo, kas iti inaramidna kadakayo, ket matagikuada met ti daga nga ited kadakuada ni Jehova a Diosyo iti ballasiw ti Jordan. Kalpasanna, agsublikayto iti sanikua nga intedko iti tunggal maysa kadakayo.’+

21 “Imbilinko idi ken Josue:+ ‘Nakitayo a mismo ti inaramid ni Jehova a Diosyo kadagitoy dua nga ari. Kasta met laeng ti aramidento ni Jehova iti amin a pagarian a bumallasiwanyo.+ 22 Dikay agbuteng kadakuada, ta ni Jehova a Diosyo ti makilaban para kadakayo.’+

23 “Impakpakaasik idi ken Jehova, 24 ‘O Kangatuan* nga Apo Jehova, impakitam iti adipenmo ti kinanaindaklanmo ken ti mannakabalin a takiagmo,+ ta asino a dios iti langit wenno iti daga ti makaaramid kadagiti nakaskasdaaw nga inaramidmo?+ 25 Pangngaasim ta palubosannak a bumallasiw tapno makitak ti nasayaat a daga iti ballasiw ti Jordan, daytoy a nasayaat a kabambantayan ken ti Lebanon.’+ 26 Ngem makapungtot pay laeng idi kaniak ni Jehova gapu kadakayo,+ isu a dinak impangag. Kinuna ketdi ni Jehova, ‘Huston! Saanmon nga ibagbaga kaniak dayta. 27 Sumang-atka iti tuktok ti Pisga,+ ket kumitaka iti laud, amianan, abagatan, ken daya sa buyaem ti daga, ta saankanto a bumallasiw iti Jordan.+ 28 Dutokam ni Josue+ kas panguluen ket paregtaem ken pabilgem, ta isunto ti mangidaulo kadagitoy a tattao a bumallasiw.+ Iti kasta, tawidendanto ti daga a makitam.’ 29 Napasamak amin daytoy bayat nga agnanaedtayo idi iti tanap iti sango ti Bet-peor.+