Levitico

1 Inayaban ni Jehova ni Moises ket kinunana kenkuana iti tolda a pagkonsultaan:*+ 2 “Ibagam kadagiti Israelita,* ‘No mangidatonkayo iti animal ken Jehova, masapul a mangtedkayo iti baka, karnero, wenno kalding.+

3 “‘No adda mangted iti baka kas daton a mapuoran, masapul a nasalun-at a kalakian.+ Masapul a boluntario+ nga idatonna dayta ken Jehova iti ruangan ti tolda a pagkonsultaan. 4 Iparabawna ti imana iti ulo ti daton a mapuoran, ket awatento ti Dios ti datonna ken mapakawan dagiti basolna.

5 “‘Kalpasanna, maparti ti urbon a kalakian a baka iti sanguanan ni Jehova, ket dagiti papadi+ nga annak ni Aaron idatagda ti dara ken iwarsida iti amin a sikigan ti altar,+ nga adda iti ruangan ti tolda a pagkonsultaan. 6 Masapul a malalatan ti daton a mapuoran ken maguduagudua.+ 7 Urnosen dagiti papadi nga annak ni Aaron dagiti kayo ket pasgedanda dagita iti rabaw ti altar.+ 8 Masapul nga urnosenda dagiti naguduagudua a karne+ sa iparabawda dagita agraman ti ulo ken ti taba* iti sumsumged a kayo iti rabaw ti altar. 9 Mabugguan dagiti bagis ken dagiti gurong, ket puoran amin dagita ti padi iti rabaw ti altar kas daton a mapuoran, a makaay-ayo* ti banglona ken Jehova.+

10 “‘No mangted iti urbon a karnero wenno kalding manipud iti arban kas daton a mapuoran,+ masapul a nasalun-at a kalakian.+ 11 Masapul a maparti dayta iti amianan a sikigan ti altar iti sanguanan ni Jehova, ket iwarsi dagiti papadi nga annak ni Aaron ti dara ti animal iti amin a sikigan ti altar.+ 12 Maguduagudua dagita sa urnosen ti padi nga iparabaw agraman ti ulo ken ti taba* iti sumsumged a kayo iti rabaw ti altar. 13 Mabugguan dagiti bagis ken dagiti gurong, sa idaton dagita ti padi ken puoranna iti altar. Dayta ket daton a mapuoran, a makaay-ayo* ti banglona ken Jehova.

14 “‘Ngem no mangted ken Jehova iti billit kas daton a mapuoran, masapul a pagaw wenno sibong ti atap a kalapati.+ 15 Ipan dayta ti padi iti altar ket tukkolenna ti tengnged ti billit sa puoranna iti rabaw ti altar, ngem ibukbokna ti dara iti sikigan ti altar. 16 Ikkatenna ti kinarakaran ti billit agraman dagiti dutdotna sa ipuruakna iti dayaen ti altar a pakaikabilan dagiti dapo.*+ 17 Tukkolenna dagiti payak ti billit ngem saanna a pagsinaen. Kalpasanna, ipuor dayta ti padi iti sumsumged a kayo iti rabaw ti altar. Dayta ket daton a mapuoran, a makaay-ayo* ti banglona ken Jehova.