Levitico

12 Intuloy a kinuna ni Jehova ken ni Moises: 2 “Ibagam kadagiti Israelita, ‘No agsikog ti maysa a babai ket mangyanak iti lalaki, maibilang a narugit iti pito nga aldaw, kas iti pannakaibilangna a narugit bayat ti panagreglana.+ 3 Makugitto ti anakna iti maikawalo nga aldaw.+ 4 Agtultuloy a dalusan ti babai ti bagina manipud iti dara iti sumaruno a 33 nga aldaw. Saanna a rumbeng a sagiden ti aniaman a nasantuan a banag ken saan a mapan iti nasantuan a disso agingga a makompleto dagiti aldaw a pannakadalusna.

5 “‘No babai ti iyanakna, maibilang a narugit iti 14 nga aldaw, kas iti kasasaadna bayat ti panagreglana. Agtultuloy a dalusanna ti bagina manipud iti dara iti sumaruno nga 66 nga aldaw. 6 No makompleton dagiti aldaw a pannakadalusna para iti panangyanakna iti lalaki wenno babai, mapan iti padi iti ruangan ti tolda a pagkonsultaan ket mangipaay iti maysa a kalakian a karnero nga agarup maysa ti tawenna kas daton a mapuoran,+ ken maysa a sibong ti atap a kalapati wenno pagaw kas daton gapu iti basol. 7 Idaton dayta ti padi iti sanguanan ni Jehova tapno maabbongan ti basol ti babai ket maibilangto a nadalus manipud iti panagpadarana. Daytoy ti linteg maipapan iti babai a mangyanak iti lalaki wenno babai. 8 Ngem no saanna a kabaelan ti mangidaton iti karnero, mabalin a mangidaton iti dua a pagaw wenno dua a sibong ti atap a kalapati+—maysa para iti daton a mapuoran ken maysa para iti daton gapu iti basol. Idaton dayta ti padi tapno maabbongan ti basol ti babai ket maibilangto a nadalus.’”