Josue

8 Kinuna ni Jehova ken ni Josue: “Dika agbuteng wenno agamak.+ Ikuyogmo dagiti soldado ket mapankayo makigubat iti Ai. Intedkon kenka ti ari ken dagiti umilina, agraman ti siudad ken ti dagana.+ 2 Aramidem iti Ai ti kas iti inaramidmo iti Jerico ken iti arina.+ Ngem mabalinyo nga alaen dagiti bambanag a sinamsamna kadagiti pinarmekna agraman dagiti tarakenda nga animal. Agtambangkayo iti likud ti siudad.”

3 Napan ngarud ni Josue ken ti amin a soldado tapno makigubat idiay Ai. Nangpili ni Josue iti 30,000 a nabileg a mannakigubat ket imbaonna ida iti rabii. 4 Imbilinna kadakuada: “Agtambangkayo iti likud ti siudad. Dikay unay umad-adayo ken masapul a nakasaganakayo amin. 5 Umasidegkaminto iti siudad, siak ken dagiti soldado a kaduak, ket no sabtendakami a kas iti immuna nga inaramidda,+ agatraskaminto. 6 Kamatendakaminto ta ipagarupda nga itartarayanmi ida a kas idi damo.+ Ngem itarayanminto ida agingga a mayadayomi ida iti siudad. 7 Iti dayta a tiempo, rumautkayto manipud iti paglemlemmenganyo ket parmekenyo ti siudad. Itedto dayta kadakayo ni Jehova a Diosyo. 8 Apaman a nasakupyon ti siudad, puoranyo dayta+ kas iti imbilin ni Jehova. Tungpalenyo dagita nga imbilinko.”

9 Imbaon ida ni Josue ket napanda agingga iti lugar a pagsaganaanda nga agtambang, iti laud ti Ai a nagbaetan ti Bethel ken Ai. Iti dayta a rabii, imyan ni Josue iti ayan dagiti nabati a soldado.

10 Kabigatanna, nasapa a bimmangon ni Josue ket inummongna dagiti soldado. Kaduana dagiti panglakayen a nangidaulo kadakuada a mapan idiay Ai. 11 Kaduana ti amin a soldado+ a napan iti sango ti siudad ket nagkampoda iti amianan ti Ai. Tanap laeng ti nagbaetanda iti siudad. 12 Kabayatanna, nangibaon iti agarup 5,000 a soldado nga agtambang+ iti laud ti siudad, iti nagbaetan ti Bethel+ ken Ai. 13 Isu a nagkampo ti kaaduan a soldado iti amianan ti siudad+ ken nagpuesto dagiti soldado nga agtambang iti laud ti siudad.+ Iti dayta a rabii, napan ni Josue iti tengnga ti tanap.*

14 Idi makita daytoy ti ari ti Ai, nagdardaras iti agsapa a simmabet a kaduana dagiti tattaona tapno gubatenda dagiti soldado nga Israelita iti lugar a matannawagan ti tanap. Ngem dina ammo nga adda dagiti agtambang kadakuada a nagpuesto iti likud ti siudad. 15 Idi dimmarup dagiti soldado ti Ai, nagtataray da Josue ken ti amin a soldadona sa nagturongda iti let-ang.+ 16 Naibilin iti amin nga umili iti siudad a kamatenda ni Josue ken ti kakaduana isu a nayadayoda iti siudad bayat a kumamkamatda. 17 Awan a pulos ti lalaki a nabati idiay Ai ken Bethel ta napanda kinamat dagiti Israelita. Pinanawanda ti siudad a nakalukat dagiti ruanganna bayat a kamkamatenda dagiti Israelita.

18 Kinuna ni Jehova ken ni Josue: “Ipaturongmo iti Ai+ ti ig-iggamam a pika, ta iyawatko kenka dayta a siudad.”+ Isu nga impaturong ni Josue ti pikana iti siudad. 19 Apaman nga impaturong ni Josue ti pikana iti Ai, dagus a rimmuar dagiti agtambang a soldado ken nagtatarayda a simrek iti siudad. Sinakupda dayta sada pinuoran a dagus.+

20 Idi tumaliaw dagiti lallaki ti Ai, nakitada nga umas-asuken ti siudad isu nga awanen ti turedda nga agtalaw ta awanen ti pagtarayanda. Dagiti kamkamatenda nga Israelita nga agturturong idiay let-ang ti mangkamkamat itan kadakuada. 21 Idi nakita ni Josue ken ti amin a kakaduana a ti siudad ket sinakupen dagiti imbaonna nga agtambang ken pinuorandan dayta, nagsublida tapno rautenda dagiti lallaki ti Ai. 22 Rimmuar dagiti soldado a nangsakup iti siudad tapno sabtenda ni Josue ken ti kakaduana. Nakita dagiti lallaki ti Ai a pinalawlawan idan dagiti Israelita. Pinapatay amin ida dagiti Israelita ket awan uray maysa a natedda wenno nakalibas.+ 23 Ngem natiliwda a sibibiag ti ari ti Ai+ ket impanda ken Josue.

24 Pinatay dagiti soldado nga Israelita ti amin nga umili iti Ai idiay let-ang a nakakamatanda kadakuada. Pinatayda amin ida iti espada. Kalpasanna, nagsublida idiay Ai tapno patayenda ti amin a nabatbati sadiay. 25 Iti dayta nga aldaw, napapatay ti amin a lallaki ken babbai nga umili ti Ai nga agdagup iti 12,000. 26 Saan nga inib-ibbatan ni Josue ti pikana+ a nakaturong iti Ai agingga a naikisap ti amin nga umili dayta a siudad.+ 27 Ngem kas imbilin ni Jehova ken Josue, innala dagiti Israelita dagiti bambanag a sinamsam ti Ai kadagiti pinarmekna agraman dagiti animal.+

28 Kalpasanna, pinuoran ni Josue ti Ai ket agingga ita, kasla turod dagiti nagtutuon a rebbana.+ 29 Imbitin ni Josue ti ari ti Ai iti maysa a poste* agingga iti sumipnget. Idi lumnek ti init, impaibabana ti bangkay+ ken impaipuruakna iti ruangan ti siudad. Ginaburanda ti bangkay iti batbato nga adda pay laeng agingga ita.

30 Idiay Bantay Ebal, nangaramid ni Josue iti altar+ para ken Jehova a Dios ti Israel, 31 kas iti imbilin ni Moises nga adipen ni Jehova kadagiti Israelita, ken kas naisurat iti libro ti Linteg+ ni Moises: “Mangaramidkayo iti altar a batbato, dikay agusar kadagiti bato a tinikap ti remienta a landok.”+ Iti rabaw ti altar, nangipaayda ken Jehova kadagiti daton a mapuoran ken daton a pakikappia.+

32 Kalpasanna, insurat ni Josue kadagiti bato ti kopia ti Linteg+ nga insurat ni Moises iti imatang dagiti Israelita.+ 33 Amin nga Israelita, agraman dagiti panglakayen, opisial, ukom, ken dagiti ganggannaet a residente+ ket nagtakder iti agsumbangir ti Lakasa, a sangsanguenda dagiti papadi a Levita a mangbagbagkat iti lakasa ti tulag ni Jehova. Kagudua kadakuada ti nagtakder iti sanguanan ti Bantay Gerizim ken ti sabali a kagudua iti sanguanan ti Bantay Ebal+ (kas iti imbilin idi ni Moises nga adipen ni Jehova),+ tapno mabendisionan dagiti Israelita. 34 Kalpasanna, binasa ni Josue iti napigsa ti amin a linaon ti Linteg,+ a pakairamanan dagiti bendision+ ken lunod+ sigun iti amin a naisurat iti libro ti Linteg. 35 Imbasa ni Josue ti tunggal imbilin ni Moises iti sanguanan ti amin nga Israelita,+ a pakairamanan dagiti babbai, ubbing, ken dagiti ganggannaet a residente+ a makipagnanaed* kadakuada.+