Eclesiastes
3 Adda tiempo ti tunggal banag,
Adda tiempo ti tunggal aramid iti baba ti langit:
2 Tiempo ti pannakayanak ken tiempo ti ipapatay;
Tiempo ti panagmula ken tiempo ti panagparut iti naimula;
3 Tiempo ti panangpatay ken tiempo ti panangpaimbag;
Tiempo ti panagrebba ken tiempo ti panagbangon;
4 Tiempo ti panagsangit ken tiempo ti panagkatawa;
Tiempo ti panagdung-aw ken tiempo ti panagsala;*
5 Tiempo ti panagipuruak iti bato ken tiempo ti panagurnong iti bato;
Tiempo ti panagarakup ken tiempo ti saan a panagarakup;
6 Tiempo ti panagsapul ken tiempo ti panangakseptar iti pukaw;
Tiempo ti panagidulin ken tiempo ti panagibelleng;
7 Tiempo ti panagpisang+ ken tiempo ti panagdait;
Tiempo ti panagulimek+ ken tiempo ti panagsao;+
8 Tiempo ti panagayat ken tiempo ti pananggura;+
Tiempo ti gubat ken tiempo ti talna.
9 Ania ti magunggona ti trabahador iti amin a panagreggetna?+ 10 Nakitak ti trabaho nga inted ti Dios iti annak ti tao tapno makumikomda. 11 Inaramidna a napintas* ti amin a banag iti umiso a tiempo.+ Inkabilna pay iti pusoda ti kinaagnanayon; ngem saanto a pulos matarusan ti sangatauan ti aramid ti pudno a Dios manipud rugi agingga iti ngudona.
12 Nabigbigko nga awanen ti nasaysayaat para kadakuada no di ti panagragsak ken panagaramid iti naimbag bayat ti panagbiagda,+ 13 kasta met a mangan, uminum, ken tagiragsaken koma ti amin ti bunga ti napasnek a panagtrabahona. Sagut ti Dios dayta.+
14 Naammuak nga agpaut iti agnanayon ti amin nga aramiden ti pudno a Dios. Awan ti mabalin nga inayon ken ikissay iti dayta. Kastoy ti panangaramid ti pudno a Dios iti amin a banag tapno agbuteng ti tattao kenkuana.+
15 Napasamaken ti aniaman a mapasamak, ket simmangpeten ti aniaman nga umay;+ ngem biroken ti pudno a Dios daydiay natiliw.*
16 Nakitak met daytoy iti baba ti init: Adda kinadakes iti ayan ti kinahustisia, ken adda kinadakes iti ayan ti kinalinteg.+ 17 Isu a kinunak iti pusok: “Ukomento ti pudno a Dios agpadpada ti nalinteg ken ti nakillo,+ ta adda tiempo ti tunggal aramid ken tignay.”
18 Imbagak pay iti pusok a subokento ti pudno a Dios ti annak ti tattao ken ipakitana kadakuada a kaslada kadagiti animal, 19 ta adda maysa a pagbanagan* ti tattao ken animal; agpada ti pagbanaganda amin.+ No matay ti animal, matay met ti tao; ken agpada nga addaanda iti espiritu.+ Isu a saan a nasaysayaat ti tao ngem ti animal, ta awan serserbi ti amin. 20 Mapanda amin iti maymaysa a lugar.+ Naggapuda amin iti tapok,+ ket agsublida amin iti tapok.+ 21 Asino ti makaammo no agpangato ti espiritu ti tao, wenno agpababa iti daga ti espiritu ti animal?+ 22 Nakitak nga awan ti nasaysayaat ngem ti panangtagiragsak ti tao iti bunga ti trabahona,+ ta dayta ti gunggonana;* ta asino ti makaipakita no anianto ti mapasamak inton matay?+