Ti Maikadua a Cronicas

6 Iti dayta a tiempo, kinuna ni Solomon: “Imbaga ni Jehova nga agtalinaed iti nakaro a kinasipnget.+ 2 Naibangonkon ti nadayag a balay a pagnaedam iti agnanayon.”+

3 Kalpasanna, simmango ti ari iti amin a naguummong nga Israelita ket binendisionanna ida bayat a sitatakderda.+ 4 Kinunana: “Maidaydayaw koma ni Jehova a Dios ti Israel, a nagkari* ken David nga amak ken nangtungpal iti dayta babaen ti imana, idi imbagana, 5 ‘Manipud idi aldaw nga inruarko ti ilik idiay Egipto, saanak a nangpili iti siudad manipud iti amin a tribu ti Israel a pakaibangonan ti maysa a balay a pagtalinaedan ti naganko,+ ken saanak a nangpili iti lalaki a mangidaulo iti ilik nga Israel. 6 No di ket pinilik ti Jerusalem+ a pagtalinaedan ti naganko, ken pinilik ni David a mangidaulo iti ilik nga Israel.’+ 7 Tinarigagayan idi ti puso ni David nga amak nga ibangon ti maysa a balay para iti nagan ni Jehova a Dios ti Israel.+ 8 Ngem kinuna ni Jehova ken ni David nga amak, ‘Tarigagayan ti pusom nga ibangon ti maysa a balay para iti naganko, ket naimbag dayta a tarigagay ti pusom. 9 Ngem saanto a sika ti mangibangon iti balay, no di ket ti mismo nga anakmo* ti mangibangonto iti balay para iti naganko.’+ 10 Tinungpal ni Jehova ti inkarina, ta siak ti simmaruno ken David nga amak ken agtugtugawak iti trono ti Israel,+ kas inkari ni Jehova.+ Imbangonko met ti balay para iti nagan ni Jehova a Dios ti Israel, 11 ken inkabilko sadiay ti Lakasa a nakaikabilan ti tulag+ ni Jehova iti ili ti Israel.”

12 Kalpasanna, nagtakder ti ari iti sango ti altar ni Jehova iti sanguanan ti amin a naguummong nga Israelita, ket inyunnatna dagiti imana.+ 13 (Ta nangaramid ni Solomon iti plataporma a gambang nga inkabilna iti tengnga ti paraangan.*+ Lima a kasiko* ti kaatiddogna, lima a kasiko ti kaakabana, ken tallo a kasiko ti kangatona; ket nagtakder iti dayta.) Nagparintumeng iti sanguanan ti amin a naguummong nga Israelita ket inyunnatna dagiti imana iti langit,+ 14 sa kinunana: “O Jehova a Dios ti Israel, awan ti Dios a kas kenka iti langit wenno ditoy daga. Tungtungpalem ti tulagmo ken ipakpakitam ti napudno nga ayatmo kadagiti adipenmo nga agserserbi kenka* iti amin a pusoda.+ 15 Tinungpalmo ti karim ken amak a David nga adipenmo.+ Inkarim a mismo dayta, ket tinungpalmo+ ita nga aldaw. 16 Ita, O Jehova a Dios ti Israel, tungpalem koma ti karim ken amak a David nga adipenmo idi kinunam: ‘Kanayon nga addanto lalaki a miembro ti pamiliam nga agtugaw iti trono ti Israel, no agtulnog dagiti annakmo iti lintegko,+ kas iti panagtulnogmo kaniak.’+ 17 Ita, O Jehova a Dios ti Israel, paneknekam koma a mapagtalkan ti inkarim ken David nga adipenmo.

18 “Ngem makipagnaedto kadi ti Dios kadagiti tattao ditoy daga?+ No ti langit, wen, ti nakalawlawa a langit, saannaka a malaon;+ anian nga ad-adda pay daytoy a balay nga imbangonko!+ 19 Denggem koma ti kararag ti adipenmo nga agpakpakaasi kenka, O Jehova a Diosko, ken ipangagmo ti panagpatulong ken ti kararag daytoy adipenmo iti sanguanam. 20 Aldaw ken rabii koma a bantayan dagita matam daytoy a balay, ti lugar nga imbagam a pangikabilam iti naganmo,+ tapno denggem ti kararag ti adipenmo nga agkarkararag a sumango iti daytoy a lugar. 21 Ket ipangagmo ti panagpatulong ti adipenmo ken ti ilim nga Israel no agkararagda a sumango iti daytoy a lugar,+ ket denggem koma manipud langit a pagnanaedam;+ wen, dumngegka koma ken mamakawanka.+

22 “No nakabasol ti maysa a tao iti padana a tao sa pagsapataen* ti nakabasolanna ket umay iti sanguanan ti altarmo iti daytoy a balay gapu iti sapatana,*+ 23 dumngegka koma dita langit sa agtignayka ken ukomem dagiti adipenmo ket dusaem daydiay dakes gapu iti inaramidna,+ ken ipakaammom nga inosente* daydiay nalinteg ken gunggonaam maitunos iti kinalintegna.+

24 “Ken no abaken ti kabusor ti ilim nga Israel gapu ta itultuloyda ti agbasol kenka,+ ket agsubli ken idayawda ti naganmo+ sa agkararag+ ken agpakpakaasida iti sanguanam iti daytoy a balay,+ 25 dumngegka koma dita langit+ ket pakawanem ti basol ti ilim nga Israel ken isublim ida iti daga nga intedmo kadakuada ken kadagidi ammada.+

26 “No maserraan ti langit ket saan nga agtudo+ gapu ta itultuloyda ti agbasol kenka,+ ngem agkararagda a sumango iti daytoy a lugar ket idayawda ti naganmo ken pagbabawyanda ti basolda ta pinagpakumbabam* ida,+ 27 dumngegka koma dita langit ket pakawanem ti basol dagiti adipenmo, ti ilim nga Israel, ta isuromto kadakuada ti naimbag a dalan a rumbeng a pagnaanda;+ ket pagtuduem+ iti daga nga intedmo kas tawid ti ilim.

28 “No dumteng iti daga ti nakaro a bisin,+ wenno makapapatay a sakit,+ nakaro a pudot, panagbuot,+ dagiti rineprep a dudon, wenno dagiti narawet a dudon;+ wenno no rauten ida dagiti kabusorda iti aniaman a siudad iti daga*+ wenno no dumteng ti didigra wenno sakit,+ 29 uray ania ti ikararag+ ken ipakaasi+ ti asinoman a tao wenno ti intero nga ilim nga Israel (ta ammo ti tunggal maysa ti bukodna a rigat ken panagsagaba)+ ket iyunnatda dagiti imada a maiturong iti daytoy a balay,+ 30 dumngegka koma dita langit a pagnanaedam+ ken mamakawanka;+ ket gunggonaam ti tunggal maysa sigun iti amin nga aramidna, ta ammom ti pusona (sika laeng ti pudno a makaammo iti puso ti tao),+ 31 tapno agbutengda koma kenka babaen ti pannagnada kadagiti dalanmo iti amin nga aldaw ti panagbiagda iti daga nga intedmo kadagidi ammami.

32 “No addanto met ganggannaet a saan a paset ti ilim nga Israel nga aggapu iti adayo a daga nga umay gapu iti naindaklan a naganmo*+ ken iti mannakabalin nga imam ken nabileg* a takiagmo, ket umay ken agkararag a sumango iti daytoy a balay,+ 33 dumngegka koma dita langit a pagnanaedam, ket aramidem ti amin a kidkiddawen ti ganggannaet, tapno maammuan ti amin a tattao iti daga ti naganmo+ ket agbutengda kenka, kas iti panagbuteng ti ilim nga Israel, ken maammuanda koma a naipanagan ti naganmo iti daytoy a balay nga imbangonko.

34 “No mapan makigubat ti ilim kadagiti kabusorda iti pangibaonam kadakuada,+ ket agkararagda+ kenka a sumango iti daytoy a siudad a pinilim ken iti balay nga imbangonko para iti naganmo,+ 35 denggem koma dita langit ti kararag ken panagpakaasida ket ipaayam ida iti hustisia.+

36 “No agbasolda kenka (ta awan ti tao a saan nga agbasol),+ ket makapungtotka kadakuada ken baybay-am nga abaken ida ti kabusorda sa matiliw ken maipanda iti sabali a daga, adayo man wenno asideg,+ 37 ket mabigbigda sadiay ti basolda, ken agsublida kenka ken agpakaasida iti daga a nakaipananda, nga ibagbagada, ‘Nagbasol ken nagbiddutkami; dakes ti inaramidmi,’+ 38 ket agsublida kenka iti amin a puso+ ken kararuada* iti daga a nakaipananda,+ sa agkararagda a sumango iti dagada nga intedmo kadagidi ammada ken iti siudad a pinilim+ ken iti balay nga imbangonko para iti naganmo, 39 denggem koma dita langit a pagnanaedam ti kararag ken panagpakaasida, ket ipaayam ida iti hustisia+ ken pakawanem ti ilim a nagbasol kenka.

40 “Ita, O Diosko, kumita koma dagiti matam ken dumngeg dagiti lapayagmo iti kararag* iti daytoy a lugar.+ 41 Mapanka koma, O Jehova a Dios, iti pagyanam,+ sika ken ti Lakasa a simbolo ti bilegmo. O Jehova a Dios, makawesan koma dagiti papadim iti pannakaisalakan, ket agrag-o koma dagiti napudno kenka gapu iti kinaimbagmo.+ 42 Dimo koma laksiden* ti dinutokam,*+ O Jehova a Dios. Lagipem koma ti napudno nga ayat nga impakitam ken David nga adipenmo.”+