Deuteronomio

11 “Masapul nga ayatenyo ni Jehova a Diosyo+ ken kanayon nga itungpalyo ti obligasionyo kenkuana ken tungpalenyo dagiti linteg, pangngeddeng, ken bilinna. 2 Pagaammoyo ita nga aldaw a dakayo ti kasarsaritak, saan a dagiti annakyo a di nakakita wenno di nakaammo iti disiplina ni Jehova a Diosyo,+ ti kinanaindaklanna,+ mannakabalin nga imana,+ ken nabileg* a takiagna. 3 Saanda a nakita dagiti impakitana a pagilasinan ken dagiti inaramidna idiay Egipto ken Faraon nga ari ti Egipto ken iti intero a dagana;+ 4 wenno ti inaramidna iti armada ti Egipto, kadagiti kabalio ken karuahe a pakigubat ni Faraon, a linapunos ti danum ti Nalabaga a Baybay idi kamkamatendakayo, ket namimpinsan a dinadael ida+ ni Jehova. 5 Saanda a nakita ti inaramidna para kadakayo* idiay let-ang agingga a nakadanonkayo iti daytoy a lugar, 6 wenno ti inaramidna kada Datan ken Abiram, nga annak ni Eliab nga anak ni Ruben, idi nagnganga ti daga ket inalun-onna ida agraman ti sangakabbalayanda ken dagiti toldada ken ti tunggal sibibiag a simmurot kadakuada, iti imatang ti intero nga Israel.+ 7 Nakitayo a mismo ti amin a nakaskasdaaw nga inaramid ni Jehova.

8 “Masapul a tungpalenyo ti amin a bilin nga itedko kadakayo ita nga aldaw, tapno pumigsakayo ket makastrekkayo iti daga a tagikuaenyo, 9 ken tapno napaut ti biagyo+ iti daga nga inkari ni Jehova nga ited kadagidi ammayo ken iti kaputotanda,*+ maysa a daga a pagay-ayusan ti gatas ken diro.+

10 “Ti daga a tagikuaenyo ket saan a kas iti Egipto a rimmuaranyo, a nagmulmulaanyo iti bin-iyo ken pinadpadanumanyo babaen ti sakayo,* kas pagmulaan kadagiti nateng. 11 Ngem ti daga a sumrekan ken tagikuaenyo ket addaan kadagiti bantay ken tanap.+ Masansan nga agtudo sadiay;+ 12 ken tartaripatuen dayta ni Jehova a Diosyo. Ay-aywanan dayta ni Jehova a Diosyo, manipud rugi agingga iti ngudo ti tawen.

13 “No tungpalenyo a naimbag dagiti bilin nga itedko kadakayo ket ayatenyo ni Jehova a Diosyo ken agserbikayo kenkuana iti amin a puso ken iti amin a kararuayo,*+ 14 pagtuduekto met iti dagayo iti umiso a tiempo, ti nasapa ken naladaw a panagtutudo, ket agapitkayto iti bukbukel, baro nga arak, ken lana.+ 15 Pagtubuekto ti ruot kadagiti tanapyo para kadagiti tarakenyo, ket mangan ken mapnekkayto.+ 16 Agannadkayo tapno saan a maallukoy a sumina ti pusoyo ket agdayaw ken agruknoykayo kadagiti sabali a dios.+ 17 Ta no saan, makapungtot kadakayo ni Jehova, ket rikpanna ti langit tapno saan nga agtudo+ ken saan a mangpataud ti daga iti apitenyo. Iti kasta, alistonto a mapukawkayo iti nasayaat a daga nga ited kadakayo ni Jehova.+

18 “Masapul nga ipaganetgetyo dagitoy a sasaok iti pusoyo ken iti kararuayo* ket igalutyo dagitoy iti imayo kas pammalagip, ken kas bedbed iti mugingyo.*+ 19 Isuroyo dagitoy kadagiti annakyo, nga isarsaritayo kadakuada no nakatugawkayo iti balayyo, no magmagnakayo iti dalan, no nakaiddakayo, ken no bumangonkayo.+ 20 Isuratyo dagitoy kadagiti hamba ti ridawyo ken kadagiti ruangan ti siudadyo, 21 tapno napaut ti biagyo ken dagiti annakyo+ iti daga nga inkari ni Jehova nga ited kadagidi ammayo,+ agingga nga adda ti langit iti ngatuen ti daga.

22 “No tungpalenyo a naimbag daytoy a bilin nga intedko kadakayo, ket ayatenyo ni Jehova a Diosyo,+ magnakayo iti amin a dalanna, ken kumpetkayo kenkuana,+ 23 papanawento ni Jehova amin dagitoy a nasion iti sanguananyo,+ ket sakupenyonto dagiti nasion a dakdakkel ken ad-adu ngem dakayo.+ 24 Agbalinto a kukuayo ti amin a daga a mabaddekanyo.+ Agbalinto a pagpatinggaan ti teritoriayo ti let-ang agingga iti Lebanon, ti Karayan, ti karayan a Eufrates, agingga iti makinlaud a baybay.*+ 25 Awanto ti tao a makaabak kadakayo.+ Tignayento ni Jehova a Diosyo ti intero a daga a pagnaanyo nga agpigerger ken agbuteng kadakayo,+ kas inkarina kadakayo.

26 “Ikabilko iti sanguananyo ita nga aldaw ti bendision ken lunod:+ 27 bendision no agtulnogkayo kadagiti bilin ni Jehova a Diosyo nga itedko kadakayo ita nga aldaw,+ 28 ken lunod no sukirenyo dagiti bilin ni Jehova a Diosyo+ ken suminakayo iti dalan nga ibagbagak a surotenyo ita ket agserbikayo kadagiti dios a saanyo nga am-ammo.

29 “Inton maiserreknakayo ni Jehova a Diosyo iti daga a tagikuaenyo, masapul nga ibagayo* ti bendision idiay Bantay Gerizim ken ti lunod idiay Bantay Ebal.+ 30 Saan kadi nga adda dagitoy iti sabali a paset ti Jordan iti laud,* iti daga dagiti Canaanita nga agnanaed idiay Araba, iti sango ti Gilgal, iti abay ti dadakkel a kayo ni More?+ 31 Ta bumallasiwkayo iti Jordan tapno sumrek ken tagikuaenyo ti daga nga ited kadakayo ni Jehova a Diosyo.+ Inton tagikuaen ken agnaedkayo iti dayta, 32 masapul a tungpalenyo a naimbag ti amin a regulasion ken pangngeddeng nga intedko kadakayo ita nga aldaw.+