Deuteronomio

29 Dagitoy ti sasao ti tulag nga imbilin ni Jehova nga aramiden ni Moises kadagiti Israelita idiay Moab, kas kanayonan iti tulag nga inaramidna kadakuada idiay Horeb.+

2 Iti kasta, pinaayaban ni Moises ti intero nga Israel ket kinunana: “Nakitayo ti amin nga inaramid ni Jehova idiay Egipto—ken Faraon, iti amin nga adipenna, ken iti intero a dagana+— 3 dagiti nakaro a pannusa,* dagidiay nakaam-amak a pagilasinan ken milagro.+ 4 Ngem dinakayo inikkan ni Jehova iti puso a makatarus, mata a makakita, ken lapayag a makangngeg, agingga ita nga aldaw.+ 5 ‘Bayat nga idaldalankayo iti 40 a tawen idiay let-ang,+ saan a narunot dagiti badoyo ken saan a narunot dagiti sandalias iti sakayo.+ 6 Dikay nangan iti tinapay, ken dikay imminum iti arak ken aniaman a makabartek nga inumen, tapno maammuanyo a siak ni Jehova a Diosyo.’ 7 Kamaudiananna, nakadanonkayo iti daytoy a lugar, ket nakilaban kadatayo ni Sihon nga ari ti Hesbon+ ken ni Og nga ari ti Basan,+ ngem inabaktayo ida.+ 8 Kalpasanna, innalatayo ti dagada ket intedtayo kas tawid dagiti Rubenita, Gadita, ken ti kagudua ti tribu dagiti Manasesita.+ 9 Gapuna, suroten ken tungpalenyo ti sasao daytoy a tulag, tapno nasayaatto ti pagbanagan ti amin nga aramidenyo.+

10 “Agtaktakderkayo amin ita nga aldaw iti sanguanan ni Jehova a Diosyo, dagiti pannakaulo dagiti tribuyo, dagiti panglakayenyo, dagiti opisialyo, tunggal lalaki iti Israel, 11 dagiti annakyo, assawayo,+ ken ganggannaet a residente+ iti kampoyo, manipud iti paraala iti kayoyo agingga iti parasakdo iti danumyo. 12 Addakayo ditoy tapno awatenyo ti tulag ken sapata ni Jehova a Diosyo, nga aramiden kadakayo ni Jehova a Diosyo ita nga aldaw+ 13 tapno pagbalinennakayo ita nga ilina+ ken agbalin a Diosyo,+ kas inkarina kadakayo ken insapatana kadagidi ammayo, da Abraham,+ Isaac,+ ken Jacob.+

14 “Saan laeng a kadakayo ti pangaramidak iti daytoy a tulag ken sapata, 15 no di ket kadagiti pay kakaduatayo nga agtaktakder ita nga aldaw iti sanguanan ni Jehova a Diostayo ken kadagidiay awan kadatayo ditoy ita nga aldaw. 16 (Ta ammoyo no kasano a nagnaedtayo idiay Egipto ken no kasano a limmasattayo iti nadumaduma a nasion bayat ti panagdaliasattayo.+ 17 Nakitkitayo dagiti makarimon nga estatua ken idoloda*+ a naaramid iti kayo ken bato, pirak ken balitok.) 18 Agannadkayo amangan no adda lalaki wenno babai, pamilia wenno tribu, a tumallikud ti pusona ita nga aldaw ken Jehova a Diostayo ket agserbi kadagiti dios dagidiay a nasion.+ Iti kasta, awan kadakayo ti kasla ramut nga agtubo ken mangpataud iti napait ken makasabidong a bunga.+

19 “Ngem no ti asinoman a makangngeg iti sasao daytoy a sapata ibagana iti pusona, ‘Awan ti dakes a mapasamak kaniak uray no surotek ti kayat ti pusok,’ tapno dadaelenna ti amin a banag* iti dalanna, 20 saanto a pakawanen ni Jehova dayta a tao.+ Imbes ketdi, makapungtotto kenkuana ni Jehova ken sigurado a lak-amennanto ti amin a lunod a naisurat iti daytoy a libro,+ ket punasento ni Jehova ti naganna iti baba ti langit. 21 Ilasinto ni Jehova daytoy a tao manipud iti amin a tribu ti Israel ket didigraenna maitunos iti amin a lunod a linaon ti tulag a naisurat iti daytoy a libro ti Linteg.

22 “Inton ti masanguanan a henerasion dagiti annakyo ken ti ganggannaet manipud iti adayo a daga makitada dagiti didigra nga inyeg ni Jehova iti dayta a daga— 23 ti asupre ken asin ken uram, tapno awanto ti maimula wenno agtubo a bukel iti intero a daga, kas iti pannakadadael ti Sodoma ken Gomorra,+ Adma ken Zeboiim,+ a dinadael ni Jehova gapu iti unget ken pungtotna— 24 ibagadanto ken ti amin a nasion, ‘Apay a kastoy ti inaramid ni Jehova iti daytoy a daga?+ Apay a kasta unay ti pungtotna?’ 25 Iti kasta, ibagadanto, ‘Gapu ta binaybay-anda ti tulag ni Jehova,+ ti Dios dagidi ammada, nga inaramidna kadakuada idi inruarna ida idiay Egipto.+ 26 Ngem nagserbi ken nagruknoyda kadagiti sabali a dios, a saanda nga am-ammo ken imparitna a pagdayawanda.*+ 27 Kalpasanna, nakapungtot ni Jehova iti dayta a daga ket impalak-amna ti amin a lunod a naisurat iti daytoy a libro.+ 28 Gapuna, inikkat ida ni Jehova iti daga gapu iti unget,+ pungtot, ken nakaro a rurodna ket impanna ida iti sabali a daga, a pagnanaedanda ita nga aldaw.’+

29 “Ammo ni Jehova a Diostayo ti amin a palimed,+ ngem dagiti kayatna nga ipalgak ket intalekna iti agnanayon kadatayo ken iti annaktayo tapno maitungpaltayo ti amin a sasao daytoy a Linteg.+