Ezekiel

36 “Ngem sika, anak ti tao, agipadtoka maipapan kadagiti bantay ti Israel ket ibagam, ‘O bambantay ti Israel, denggenyo ti sao ni Jehova. 2 Daytoy ti kinuna ti Kangatuan* nga Apo Jehova: “Imbaga kadakayo ti kabusor, ‘Gunggonayo! Kukuamin uray dagiti nagkauna a nangato a disso!’”’+

3 “Gapuna, agipadtoka ket ibagam, ‘Daytoy ti kinuna ti Kangatuan nga Apo Jehova: “Gapu ta linangalang ken rinautdakayo iti tunggal direksion, tapno agbalinkayo a sanikua dagiti nakalasat* kadagiti nasion ken agtultuloy a pagsasaritaan ken padpadaksendakayo dagiti tattao,+ 4 denggenyo ngarud ti sao ti Kangatuan nga Apo Jehova, O bambantay ti Israel! Daytoy ti kinuna ti Kangatuan nga Apo Jehova kadagiti bantay ken turod, kadagiti waig ken tanap, kadagiti rebba a nalangalang,+ ken kadagiti napanawan a siudad a naala dagiti sanikuana ken inuy-uyaw dagiti nakalasat kadagiti nasion iti aglawlawda;+ 5 kastoy ti kinuna ti Kangatuan nga Apo Jehova maipapan kadagitoy: ‘Iti apuy ti regtak,+ agsaoakto maibusor kadagiti nakalasat kadagiti nasion ken maibusor iti intero nga Edom, dagidiay nangagaw iti dagak kas bukodda a sanikua buyogen ti panagragsak ken pananglais,*+ tapno alaenda dagiti pagpastoranna ken ti sanikua ti daga.’”’+

6 “Agipadtoka ngarud maipapan iti Israel, ket ibagam kadagiti bantay ken turod, kadagiti waig ken tanap, ‘Daytoy ti kinuna ti Kangatuan nga Apo Jehova: “Agsaoakto gapu iti regta ken pungtotko, ta imbabaindakayo dagiti nasion.”’+

7 “Gapuna, daytoy ti kinuna ti Kangatuan nga Apo Jehova: ‘Ingatok ti imak ket isapatak a maibabainto dagiti nasion iti aglawlaw.+ 8 Ngem dakayo, O bambantay ti Israel, agsaringit ken agbungakayto para iti ilik nga Israel,+ ta asidegen nga agsublida. 9 Ta addaak kadakayo ken taliawenkayto, ket matalon ken mamulaankayto iti bukel. 10 Paaduekto ti tattaoyo—ti intero a sangakabbalayan ti Israel, aminda—ket mapagnaedanto dagiti siudad+ ken maibangonto manen dagiti rebba.+ 11 Wen, paaduekto ti tattao ken tarakenyo;+ umadu ken aganakdanto. Addanto manen agnaed kadakayo a kas iti dati,+ ken pagbalinenkayto a narangrang-ay ngem iti napalabas;+ ket maammuanyonto a siak ni Jehova.+ 12 Pagnaedekto kadakayo ti ilik nga Israel, ket tagikuaendakayto.+ Agbalinkayto a tawidda, ket saanyonto manen a pagbalinen ida nga awanan iti annak.’”+

13 “Daytoy ti kinuna ti Kangatuan nga Apo Jehova: ‘Gapu ta ibagbagada kadakayo, “Maysaka a daga a mangal-alun-on iti tattao ken mangpappapatay iti annak dagiti nasionyo,”’ 14 ‘gapuna, saanyonton nga alun-onen ti tattao wenno pagbalinen nga awanan iti annak dagiti nasionyo,’ kuna ti Kangatuan nga Apo Jehova. 15 ‘Saankonton nga ipalubos nga insultuendakayo dagiti nasion wenno laisen ti tattao,+ ket saanyonton nga itibkol dagiti nasionyo,’ kuna ti Kangatuan nga Apo Jehova.”

16 Kinuna manen kaniak ni Jehova: 17 “Anak ti tao, idi agnanaed ti sangakabbalayan ti Israel iti dagada, rinugitanda dayta babaen ti kababalin ken aramidda.+ Ti aramidda ket kas iti kinarugit ti babai nga agregla.+ 18 Iti kasta, imbuyatko kadakuada ti pungtotko gapu iti dara nga imbukbokda iti daga+ ken rinugitanda ti daga babaen kadagiti makarimon nga idoloda.*+ 19 Inwarawarak ida kadagiti nasion ken inwarasko ida iti nadumaduma a daga.+ Inukomko ida sigun iti kababalin ken aramidda. 20 Ngem idi napanda kadagidiay a nasion, imbabain dagiti tattao ti nasantuan a naganko+ babaen ti panangibagada, ‘Daytoy ti ili ni Jehova, ngem masapul a panawanda ti dagana.’ 21 Iti kasta, isakitkonto ti nasantuan a naganko, nga imbabain ti sangakabbalayan ti Israel iti tengnga dagiti nasion a napananda.”+

22 “Gapuna, ibagam iti sangakabbalayan ti Israel, ‘Daytoy ti kinuna ti Kangatuan nga Apo Jehova: “Agtignayak saan a para kadakayo, O sangakabbalayan ti Israel, no di ket para iti nasantuan a naganko, nga imbabainyo iti tengnga dagiti nasion a napananyo.”’+ 23 ‘Ipakitakto a nasantuan ti naindaklan a naganko,+ nga imbabainyo iti tengnga dagiti nasion; ket maammuanto dagiti nasion a siak ni Jehova,’+ kuna ti Kangatuan nga Apo Jehova, ‘inton ipakitak kadakuada a nasantuanak iti tengngayo. 24 Alaenkayto kadagiti nasion ken ummongenkayo iti amin a daga ket ipankayo iti dagayo.+ 25 Warsiankayto iti nadalus a danum, ket madalusankayto;+ dalusankayto iti amin a kinarugityo+ ken iti amin a makarimon nga idoloyo.+ 26 Ikkankayto iti baro a puso+ ken mangikabilak iti baro nga espiritu iti unegyo.+ Ikkatekto ti puso a bato+ iti bagiyo ket ikkankayo iti puso a lasag.* 27 Ikabilkonto ti espirituk iti unegyo, ket surotenyonto dagiti regulasionko+ ken tungpalen ken aramidenyo dagiti pangngeddengko. 28 Iti kasta, agnaedkayto iti daga nga intedko kadagidi ammayo, ket agbalinkayto nga ilik ken siakto ti Diosyo.’+

29 “‘Isalakankayto iti amin a kinarugityo ken ibagakto iti bukel nga agbunga iti adu, ket saanakto a mangyeg kadakayo iti nakaro a bisin.+ 30 Paaduekto ti bunga ti kayo ken ti apit iti talon, tapno saanyonton a sagabaen ti nakababain a nakaro a bisin iti tengnga dagiti nasion.+ 31 Iti kasta, malagipyonto ti dakes a kababalinyo ken ti saan a naimbag nga aramidyo, ket kagurayonto ti bagiyo gapu iti basol ken dakes nga aramidyo.+ 32 Ngem laglagipenyo daytoy: Saanko nga aramiden daytoy para kadakayo,’+ kuna ti Kangatuan nga Apo Jehova. ‘Agbainkayo ketdi gapu iti aramidyo, O sangakabbalayan ti Israel.’

33 “Daytoy ti kinuna ti Kangatuan nga Apo Jehova: ‘Iti aldaw a dalusankayo iti amin a basolyo, agnaedkayto manen kadagiti siudadyo+ ken bangonenyo dagiti rebba.+ 34 Ti nadadael a daga a napanawan tapno makita ti tunggal lumabas ket matalonto. 35 Ibaganto ti tattao: “Nagbalin a kasla hardin ti Eden+ ti nadadael a daga, ket napaderan ken napagnaedan manen dagiti siudad a nadadael ken napanawan ken narba.”+ 36 Maammuanto dagiti nasion a mabati iti aglawlawyo a siak, ni Jehova, binangonko ti narba, ken minulaak ti napanawan a disso. Siak, ni Jehova, ti nagsao, ket inaramidko dayta.’+

37 “Daytoy ti kinuna ti Kangatuan nga Apo Jehova: ‘Bay-akto met a kiddawen ti sangakabbalayan ti Israel a paaduek ti tattaona a kas kadagiti taraken iti arban. 38 Kas iti adu a nasantuan a tattao, kas iti arban idiay Jerusalem* bayat dagiti piestana,+ mapnonto iti tattao dagiti siudad a narba;+ ket maammuandanto a siak ni Jehova.’”